20 قىركۇيەك, 23:06 478 0 قوعام دينارا مىڭجاسارقىزى

عالىمنىڭ حاتى ولمەيدى

بەلگىلى عالىم، تەحنيكا عىلىمدارىنىڭ كانديداتى، پروفەسسور، قر ۇلتتىق ينجەنەرلىك اكادەمياسى ۇيىمداستىرۋشىلارىنىڭ ءبىرى بەركىمباي پارىمبەتوۆ كوزى ءتىرى بولسا 90 جاسقا تولار ەدى. "عالىمنىڭ حاتى ولمەيدى" دەمەكشى، ارتىندا مول عىلىمي ەڭبەگى مەن وشپەس ءىزى قالعان تۇلعانىڭ اتى ۇمىتىلماق ەمەس.
ەلىمىزدىڭ قۇرىلىس يندۋسترياسىندا وزىندىك قولتاڭباسى بار قوعام قايراتكەرى بەركىمباي پارىمبەتوۆتىڭ 90 جىلدىعىنا وراي ەكى كۇندىك "قازازقستانداعى ءححى عاسىر قۇرىلىس يندۋسترياسى: جەتىستىكتەر مەن بولاشاعى" اتتى رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلدى.
شارا اياسىندا 4 عىلىمي ءبولىمنىڭ باياندامالارى ۇسىنىلدى. وعان عالىمدار، جوبالىق قۇرىلىس كەشەنىنىڭ ماماندارى، جوو وقتىتۋشىلارى قاتىستى. سونداي-اق، قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆتىڭ قۇتتتىقتاۋ حاتىن وقىپ بەردى.

«بەركىمباي پارىمبەتۇلى – ەلىمىزدىڭ دارىندى ۇلدارىنىڭ ءبىرى. وتە جاس مينيستر بولدى. كەزىندە قازاقستان دامىپ كەلە جاتقاندا قۇرىلىس سالاسىنىڭ تۇڭعىش ءمينيسترى بولدى. بۇگىندە وسى سالادا 130 مىڭ ادام جۇمىس ىستەيدى. قازاقستاندا قۇرىلىس جاقسى دامىپ كەلە جاتىر. مىنە، ونىڭ نەگىزى سول كەزدە قالاندى»، – دەدى «تۇران» ۋنيۆەرسيتەتىنىڭ رەكتورى راحمان الشانوۆ.

شاراعا جينالعاندار عالىمنىڭ كوپكە ۇلگى بولاتىن تاعدىرى مەن ەڭبەكتەرى جايلى ءسوز قوزعادى. اكادەميك 36 جاسىندا قازاقستاننىڭ قۇرىلىس ماتەريالدارى ونەركاسىبى ءمينيسترى لاۋازىمىنا سايلانعان. ءتۇرلى جىلدارى باسشىلىق قىزمەتتەر اتقارعان.

«وكىنىشكە قاراي، اكەمىز ومىردەن ەرتە كەتتى. بار بولعانى 67 جاسىندا باقيلىق بولدى. ەگەر بالالىق شاعىمدى ەسكە السام، اكەمىزدىڭ ءبىر دەمالعانىن كورگەن ەمەسپىز. ۇيگە كەلسە دە قولىنان گازەت تۇسپەيتىن. ۇنەمى وقۋ وقىپ، كۇنى-ءتۇنى جۇمىس ىستەيتىن. بۇگىنگى كونفەرەنتسياعا جاستار دا قاتىسىپ وتىر. ولار ءبىر عانا دۇنيەنى تۇسىنسە دەيمىن. ەڭبەك پەن تاباندىلىقتىڭ ارقاسىندا جەتىستىككە جەتۋگە بولادى. سوندىقتان، وقۋدان قاشاندا تالماۋ قاجەت»، – دەدى ب. پارىمبەتوۆتىڭ قىزى روزا پارىمبەتوۆا.

سوڭعى جاڭالىقتار