20 قىركۇيەك, 10:56 365 0 الەۋمەت انار لەپەسوۆا

"باسپاناعا مۇقتاج بولسا، اۋەلى كەزەككە تۇرسىن!": ەلوردا اكىمدىگى زاڭسىز ميتينگىلەردى سىنادى

 ەلوردا اكىمدىگىندە وتكەن بريفينگتە نۇر-سۇلتان اكىمدىگى قوعامدىق دامۋ باسقارماسىنىڭ باستىعى تالعات راحمانبەردى باسپانا سۇراپ، زاڭسىز ميتينگىگە شىعىپ جۇرگەندەرگە زاڭدى ءتۇسىندىردى. 

قالا اكىمشىلىگىنىڭ وكىلى نارازىلىق بىلدىرۋشىلەردىڭ بارلىق تالابى باسپانا ءبولۋ ماسەلەسىنە كەلىپ تىرەلەتىنىن ايتتى. ادامدار ەلوردا باسشىلىعىنىڭ قابىلداۋلارىندا دا ءوز تالابىن قويعان.

"كوپتەگەن ايەل ءتىپتى باسپانا الۋعا كەزەككە تۇرماي جاتىپ، تۇرعىن ءۇي ماسەلەسىن شەشۋدى تالاپ ەتەدى. ءبىز باسپانا قاتاڭ تۇردە زاڭ اياسىندا بەرىلەتىنىن ايتقىمىز كەلەدى. زاڭ بار، قولدانىستاعى نورمالار بار. ءبىرىنشى نەگىزگى تالاپ – باسپاناعا مۇقتاج رەتىندە كەزەككە تۇرۋ كەرەك. سوندىقتان پيكەتتەرگە، ميتينگىلەرگە شىعىپ، باسپانا تالاپ ەتۋ تولىعىمەن زاڭسىز", - دەپ حابارلادى جۋرناليستەرگە باسقارما باسشىسى.

تالعات راحمانبەردى قازاقستان اۋماعىندا بەيبىت ميتينگىلەر، جيىندار، شەرۋلەر، پيكەتتەر مەن دەمونستراتسيالار ۇيىمداستىرۋ جانە وتكىزۋ ءتارتىبى تۋرالى زاڭعا سايكەس، اكتسيا وتكىزگىسى كەلەتىندەر قالا اكىمدىگىنە ءوتىنىش بەرۋى كەرەك ەكەنىن ەسكە سالدى.

ال وسى ۋاقىتقا دەيىن كوپبالالى انالاردان اكتسيا وتكىزۋ تۋرالى بىردە-ءبىر ءوتىنىش تۇسپەگەن.

 

سوڭعى جاڭالىقتار