20 قىركۇيەك, 10:02 436 0 رۋحانيات انار لەپەسوۆا

قاراعاندىدا وتكەن حالىقارالىق ايتىستىڭ جەڭىمپازدارى انىقتالدى

قاراعاندى قالاسىندا «Nur Otan» پارتياسىنىڭ قولداۋىمەن جانە وبلىس اكىمدىگىنىڭ ۇيىمداستىرۋىمەن وتكەن حالىقارالىق اقىندار ايتىسى ءوز مارەسىنە جەتتى.

ەكى كۇن بويى ايتىسسۇيەر قاۋىمنىڭ دەلەبەسىن قوزدىرعان جىر دوداسىندا ارقالى اقىنداردىڭ قازاقتىڭ ساف ونەرىن ءوز بيىگىندە كورسەتە ءبىلدى. قاراعاندى جۇرتشىلىعىنىڭ ايتىسقا شولىركەپ قالعانى قالىڭ كورەرمەننەن بايقالادى. سىيماعان جۇرتشىلىق كىشى زالعا قويىلعان ەكراننان ايتىستى تاماشالادى. جىر دوداسىنا ءتورت ەلدىڭ اقىندارى كەلگەن. العاشقى كۇنى قحر، قىرعىزستاننان، موڭعوليادان جانە ەلىمىزدىڭ ءار وڭىرىنەن كەلگەن 18 اقىن سىنعا ءتۇسىپ، سودان ۇزدىك دەپ تاڭدالعان 7 جۇپ كەلەسى كەزەڭگە ءوتتى.

فينالدىق باسەكەدە ايتىس تىپتەن قىزا ءتۇستى. اقىندار قوعامداعى تۇيتكىلدەردى بۇكپەسىز ايتىپ، حالىقتىڭ كوكەيىندەگى ماسەلەنى ءدوپ باسىپ جەتكىزۋگە تىرىستى. «Nur Otan» پارتياسى قازاقتىڭ ۇلتتىق ونەر ايتىستىڭ ورىستەۋىنە، اقىنداردىڭ شىعارماشىلىق دەڭگەيىنىڭ وسۋىنە باسا كوڭىل بولۋدە. بيىلدىڭ وزىندە ەل كولەمىندە 5 ۇلكەن ايتىستى وتكىزۋگە مۇرىندىق بولىپ وتىر.

ايتىستى تاماشالاۋعا ارنايى كەلگەن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ەلدىڭ مۇددەسىن جىرعا قوسقان اقىنداردىڭ تاپقىرلىعىنا ريزاشىلىعىن ءبىلدىردى. ءوز سوزىندە باۋىرجان بايبەك قوعامدىق وي مەن مادەني تاريحىمىزدا ەرەكشە ورنى بار كۇرەسكەر تۇلعاعا ارناپ وتكىزىلگەن بۇل ايتىس «تار جول، تايعاق كەشۋ» زاماندا ءومىر سۇرگەن اياۋلى اقىننىڭ رۋحىن اسقاقتاتىپ قانا قويماي، بىرلىگىمىز بەن ىنتىماعىمىزدى دا نىعايتا تۇسكەنىن ايتتى.

سونداي-اق ول ايتىستىڭ ۇلتتىق مۇرامىز عانا ەمەس، قوعامداعى وزەكتى ماسەلەلەردى اشىق ايتىپ، ولاردىڭ الدىن الۋ جولدارىن ۇسىناتىن ۇتىمدى تەتىك ەكەنىن دە تىلگە تيەك ەتتى.

– قازاقتا «اۋرۋىن جاسىرعان ولەدى» دەگەن ءسوز بار. سونلدىقتان ءبىز كەمشىلىكتەرىمىزدى اشىق ايتىپ، ولاردى شەشۋ جولدارىن قاراستىرۋىمىز كەرەك. بۇل رەتتە ايتىستىڭ ءرولى ەرەكشە. ايتىس – ءبىزدىڭ رۋحاني بايلىعىمىز. سول سەبەپتى پارتيا ءتول ونەرىمىزدى قولعا الىپ، جۇيەلى تۇردە قولداۋ كورسەتەتىن بولادى، – دەدى باۋىرجان بايبەك.

سونىمەن پارتيا توراعاسىنىڭ ءبىرىنشى ورىنباسارى پارتيانىڭ ساياسي دوكتريناسىندا رۋحانيات، مادەنيەت، ۇلتتىق قۇندىلىق ماسەلەسىنە ۇلكەن كوڭىل بولىنگەنىن جەتكىزدى.

– ءتول مادەنيەتىمىزدى تورگە شىعارماساق جەتىستىكتەرگە جەتە المايمىز. سوندىقتان ءبىزدىڭ پارتيا ايتىستى قولعا الىپ وتىر. تەك بيىلعى جىلدىڭ سوڭىنا دەيىن «Nur Otan»-نىڭ قولداۋىمەن بەس الامان ايتىس وتەدى. ونىڭ العاشقىسى اتىراۋدا وتكەن فاريزا وڭعارسىنوۆانىڭ 80 جىلدىعىنا ارنالعان ايتىس بولسا، ەكىنشىسى سارىارقا تورىندەگى بۇگىنگى ءسوز سايىسى. ودان بولەك، قىركۇيەكتىڭ سوڭىندا الماتى قالاسىندا «وتان وتباسىنان باستالادى» اتتى وتباسىلىق ايتىس وتەدى. ال قازان ايىندا نۇر-سۇلتان قالاسىندا جانە جىل سوڭىندا ورال قالاسىندا «التىن دومبىرا» رەسپۋبليكالىق اقىندار ايتىسى ۇيىمداستىرىلادى، – دەدى باۋىرجان بايبەك.

ءاسانالى ءاشىموۆ باستاعان قازىلار القاسىنىڭ شەشىمىمەن قاراعاندىلىق ماقسات احانوۆ پەن استانالىق جانداربەك بۇلعاقوۆ باس جۇلدەنى (2 ملن تەڭگەدەن) جەڭىپ الدى. باتىسقازاقستاندىق باۋىرجان شيرمەدينۇلى مەن استانالىق ءومىرجان كوپبوسىنوۆ ءبىرىنشى ورىنعا (1 ملن تەڭگەدەن) يە بولدى.

 

 

سوڭعى جاڭالىقتار