19 قىركۇيەك, 12:17 392 0 نۇر وتان انار لەپەسوۆا

مۇگەدەكتىك كەدەرگى ەمەس

«Nur Otan» پارتياسى وبلىستىق فيليالىنىڭ ۇيىمداستىرۋىمەن پارتيانىڭ «كەدەرگىسىز كەلەشەك» جوباسى اياسىندا مۇمكىندىگى شەكتەۋلى جاندارعا ارنالعان بوس جۇمىس ورىندارى جارمەڭكەسى ءوتتى.

پارتيا دوكتريناسىنا سايكەس جوعارى ءومىر ءسۇرۋ ستاندارتى بويىنشا بارلىق ازاماتقا الەۋمەتتىك قىزمەتتەر تەڭ قولجەتىمدى بولۋ قاجەت. بۇل مەملەكەتتىڭ، ازاماتتاردىڭ جانە جۇمىس بەرۋشىلەردىڭ تىلەۋلەس جاۋاپكەرشىلىگى ارقىلى قامتاماسىز ەتىلۋى ءتيىس. وسى ماقساتتا ۇكىمەت مۇگەدەكتەردىڭ قۇقىعىن قامتاماسىز ەتۋ جانە ءومىر ءسۇرۋ ساپاسىن ارتتىرۋ بويىنشا ءىس-شارالار جوسپارىن قابىلداپ، كەزەڭ-كەزەڭمەن جۇزەگە اسىرۋدا. ناتيجەسىندە قازاقستاندا حالىقتىڭ ەڭبەككە جارامسىز بولىپ قالۋ تاۋەكەلدەرىن الدىن الۋعا، ءومىردىڭ قيىنشىلىعىنا تاپ بولعاندار مەن مۇگەدەكتىكتىڭ باستالۋ كەزى مەن مۇگەدەكتىكتى وڭالتۋعا – ارنايى الەۋمەتتىك كومەك كورسەتۋگە باعىتتالعان بىرقاتار زاڭ قابىلداندى.

پارتيانىڭ «كەدەرگىسىز كەلەشەك» جوباسىن ىسكە اسىرۋ ەلباسى – «Nur Otan» پارتياسىنىڭ توراعاسى ن.نازارباەۆتىڭ تاپسىرمالارىنىڭ تيىمدىلىگىن ارتتىرادى جانە مۇمكىندىگى شەكتەۋلى جانداردىڭ ءومىر ءسۇرۋ ساپاسىن ارتتىرۋدا مەملەكەتتىك ۋاكىلەتتى ورگاندار مەن ۇكىمەتتىك ەمەس ۇيىمداردىڭ كۇشتەرىن بىرىكتىرۋگە مۇمكىندىك بەرەدى.

شارانى پارتيانىڭ وبلىستىق فيليالى توراعاسىنىڭ ورىنباسارى شابدەن تىلەۋمۇرات اشىپ، جارمەڭكە جۇمىسىنا ساتتىلىك تىلەدى. ول ءوز سوزىندە سوڭعى ءۇش جىلدا پارتيانىڭ جامبىل وبلىستىق جانە اۋماقتىق فيليالدارىنىڭ قوعامدىق قابىلداۋ بولمەلەرىنە 187 مۇمكىندىگى شەكتەۋلى جان وتىنىشپەن كەلىپ، ونىڭ 66-سى وڭ شەشىمىن تاپقانىن جەتكىزدى.

– تۇسكەن وتىنىشتەردىڭ باسىم بولىگى مۇمكىندىگى شەكتەۋلى جانداردى جۇمىسقا ورنالاستىرۋ، ماتەريالدىق كومەك بەرۋ، تۇرعىن-ءۇي ماسەلەلەرى بولعان. وسى ماسەلەلەردى ەسكەرە كەلە، پارتيا وبلىستىق جانە اۋماقتىق فيليالدارى «كەدەرگىسىز كەلەشەك» پارتيالىق جوباسىن جۇزەگە اسىرۋ ماقساتىندا جىل سايىن مۇمكىندىگى شەكتەۋلى جاندارعا ارنالعان بوس جۇمىس ورىندارىنىڭ جارمەڭكەسىن ۇيىمداستىرادى. بيىل بۇل جارمەڭكە ەكىنشى رەت وتكىزىلۋدە. سوڭعى ءۇش جىلدا مۇمكىندىگى شەكتەۋلى جاندارعا ارنالعان بوس جۇمىس ورىندارى جارمەڭكەسىنىڭ قورىتىندىسى بويىنشا 400-گە جۋىق مۇگەدەك جان جۇمىسقا ورنالاسقان، – دەپ اتاپ ءوتتى شابدەن تىلەۋمۇرات.

بوس جۇمىس ورىندارى جارمەڭكەسىندە 24 جۇمىس بەرۋشى مەكەمەدەن 70 ماماندىق بويىنشا 166 جۇمىس ورنى ۇسىنىلدى.

 

سوڭعى جاڭالىقتار