19 قىركۇيەك, 12:14 387 0 نۇر وتان انار لەپەسوۆا

كوش قايتا جاندانادى

ەل تۇرعىندارىن حالقى تىعىز قونىستانعان ايماقتاردان سولتۇستىك وڭىرلەرگە كوشىرۋ ءۇردىسى جالعاسۋدا. سوڭعى 4 جىلدا تۇركىستان وبلىسىنان 4 مىڭعا جۋىق وتباسى سولتۇستىككە قونىس اۋدارىپ، مەملەكەتتىك قولداۋدىڭ ارقاسىندا تۇرمىستارىن تۇزەپ ۇلگەردى. بۇگىندە بۇل جوبانى جانداندىرۋعا «Nur Otan» پارتياسى تۇركىستان وبلىستىق فيليالىنىڭ ماماندارى جۇمىلا كىرىسكەن. وسى ورايدا،  پارتيا فيليالى سايرام اۋدانىن ارالاۋ بارىسىندا وزبەك دياسپوراسىن دا  «ەڭبەك» باعدارلاماسىن جۇزەگە اسىرۋدا بەلسەندى بولۋعا شاقىردى. ناتيجەسىندە، 52 وتباسى سولتۇستىككە كوشۋگە نيەت ءبىلدىردى. وزبەك ەتنوس وكىلدەرىنىڭ اراسىندا مۇنداي ستراتەگيالىق ماڭىزدى كەزدەسۋ بۇرىن-سوڭدى بولماعان. 

«Nur Otan» پارتياسى تۇركىستان وبلىستىق فيليالى «ەڭبەك» باعدارلاماسىن ناسيحاتتاۋ ماقساتىندا وڭىرىمىزدەگى حالقى تىعىز اۋدان تۇرعىندارىمەن كەزدەسۋلەر ۇيىمداستىرۋدا.

ەلباسىنىڭ باستاماسىمەن 2015 جىلدان بەرى جۇزەگە اسىپ كەلە جاتقان «ەڭبەك ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا تۇركىستان وبلىسىندا سوڭعى 4 جىلدا 881 وتباسى نەمەسە 3377 ادام قونىس اۋدارىپ، مەملەكەت تاراپىنان الەۋمەتتىك كومەكپەن قامتاماسىز ەتىلگەن.

تۇركىستان وبلىستىق پارتيا فيليالى توراعاسىنىڭ ءبىرىنشى ورىنباسارى بەيسەن تاجىباەۆ باستاعان اقپاراتتىق-ناسيحاتتىق توپ حالىق سانى جوعارى، تىعىز ورنالاسقان سايرام اۋدانى، قارابۇلاق ەلدىمەكەنى تۇرعىندارىمەن كەزدەستى.

كەزدەسۋگە تۇركىستان وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى ع.رىسبەكوۆ، سايرام اۋدانى اكىمىنىڭ ورىنباسارى م.ورازاليەۆ، اۋداندىق فيليالى توراعاسىنىڭ ءبىرىنشى ورىنباسارى ا.ابدىقادىروۆ جانە وبلىستىق ءماسليحات دەپۋتاتتارى ج.اعابەكوۆ، ب.نىشانقۇلوۆ قاتىستى. سونداي-اق ءبىلىم سالاسىنىڭ قۇرمەتتى قىزمەتكەرى، قوعام بەلسەندىسى ءو.شىنىبەكۇلى، پاۆلودار وبلىسى ەرتىس اۋدانى اكىمىنىڭ ورىنباسارى ج.ساعىناەۆ، سولتۇستىك قازاقستان وبلىسى م.جۇماباەۆ اۋدانىنىڭ جۇمىسپەن قامتۋ ءبولىمىنىڭ باس مامانى ن.تانبەتوۆا جانە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ وكىلدەرى دە ءىس-شاراعا ارنايى كەلدى.

«Nur Otan» پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن داۋلەت­ۇلى كەزدەسۋ بارىسىندا پرەزيدەنت قاسىم-جومارت توقاەۆتىڭ قازاقستان حالقىنا ارناعان جولداۋىنا توقتالىپ، وزبەك دياسپوراسىن «ەڭبەك» باعدارلاماسىن جۇزەگە اسىرۋدا بەلسەندى بولۋعا شاقىردى.

– قارابۇلاق – ەلىمىزدەگى ەڭ تۇرعىنى كوپ اۋىل. بۇل اۋىلدا 60 مىڭنان استام xالىق بار. الايدا بيىل اۋداننان سولتۇستىككە ءبىر وتباسى عانا شىققان. جوبادا سولتۇستىككە بارۋشىلار ءۇشىن ارنايى مال باعۋ مەن ەگىن سالۋعا جەر بەرىلەدى. وڭىردە 400 مىڭنان استام شارۋاقور وزبەك اعايىندار تۇرادى. ولار وسى باعدارلامانى ورىنداۋعا بەلسەنە قاتىسسا، حالىق جۇمىسپەن قامتىلىپ، باسپانالى بولىپ، سولتۇستىك جايناپ، ەلىمىزدەگى كوپتەگەن ماسەلەلەر شەشىمىن تاباتىن ەدى، – دەپ جۇرتشىلىقتى مۇمكىندىكتى بارىنشا پايدالانۋعا شاقىردى.

جيىندا سونداي-اق تۇركىستان وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى ع.رىسبەكوۆ «وڭتۇستىكتەن سولتۇستىككە كوشىرۋ» باعدارلاماسىنىڭ ماڭىزى تۋرالى بايانداما جاسادى. سولتۇستىككە قونىس اۋدارعان جەرلەستەرىمىزدىڭ تىنىس-تىرشىلىگىمەن جاقىندا عانا تانىسىپ قايتقان ناسيحاتتىق توپ مۇشەلەرى اۋىل تۇرعىندارىنا مەملەكەت تاراپىنان بەرىلىپ جاتقان قولداۋلار مەن مۇمكىندىكتەر تۋرالى كەڭىنەن ءتۇسىندىرىپ، ولاردىڭ سۇراقتارىنا جاۋاپ بەردى.

سوڭعى جاڭالىقتار