18 قىركۇيەك, 17:03 464 0 ونەر انار لەپەسوۆا

قاراعاندىدا حالىقارالىق اقىندار ايتىسى باستالدى

قاراعاندى قالاسىندا «رۋحاني جاڭعىرۋ» باعدارلاماسى اياسىندا ايگىلى اقىن، جازۋشى، مەملەكەت جانە قوعام قايراتكەرى ساكەن سەيفۋلليننىڭ 125 جىلدىعىنا ارنالعان حالىقارالىق ايتىستىڭ شىمىلدىعى ءتۇرىلدى. اقىننىڭ اتىن يەمدەنگەن وبلىستىق قازاق دراما تەاترىندا ايتۋلى دودانىڭ سالتاناتتى اشىلۋ ءراسىمى ءوتتى. 

قاراعاندى جۇرتشىلىعى ەلوردا مەن ەلىمىزدىڭ باسقا قالالارىنان، سونداي-اق مونعوليادان، قىرعىزستاننان، قىتايدان كەلگەن ايتىسكەرلەردى ۇلكەن قۇرمەتپەن قارسى الدى. حالىق انشىلەرى قىزىل كىلەم بويىمەن تەاتر عيماراتىنا ءوتتى.

– ايتىس – ول سەنىم. سەبەبى كەيدە حالىق باسقالارعا سەنبەۋى مۇمكىن. بىراق ايتىسكەرلەرگە سەنەدى. مەنىڭ ويىمشا، ايتىسكەرلەر ءۇشىن ەڭ جوعارعى ماندات، ەڭ جوعارى قۇرمەت – وسى حالىقتىڭ نيەتى مەن سەنىمى. سەبەبى حالىق اقىنداردان تەك قانا شىندىقتى كۇتەدى. اقىن مىنەزى مەن ارىن ەشۋاقىتتا ساتپايدى. سەبەبى ول اقىننىڭ جەكە ارى مەن مىنەزى ەمەس، ول – كوپ جاعدايدا حالىقتىڭ ارى، جۇرتتىڭ كوڭىل- كۇيى. ساكەن سەيفۋللينىڭ تىلىمەن ايتقاندا: «ايتىس – زاماننىڭ اقيقاتى». ەكىنشىدەن، ايتىس – ول جۇرەك. اشىعىن ايتۋ كەرەك، كەيدە ادامدى كوز الدايدى، قۇلاق الدايدى، ءتىپتى ءتىل دە الداۋى مۇمكىن. بىردەڭەگە الىپ كەلىپ، سوقتىرۋى مۇمكىن. بىراق – جۇرەك الدامايدى. ال اقىن – ماسەلەنى جۇرەكپەن كورەدى، جۇرەكپەن جەتكىزەدى. سوندىقتان جۇرەكتەن شىققان جىرلاردى حالىق جۇرەكپەن قابىلدايدى، – دەدى قاراعاندى وبلىسىنىڭ اكىمى ەرلان قوشانوۆ.

حالىقارالىق ايتىس جانە جىرشى-تەرمەشىلەر وداعىنىڭ باسشىسى ەرمان ءجۇرسىننىڭ ايتۋىنشا، قاراعاندى حالقى وسى ونەر ءتۇرىن ەڭ ىستىق ءارى قۇمارلىقپەن قابىلدايتىن كورەرمەندەر.

– مەن ساكەن اعانىڭ تۋعان جەرىندە ونىڭ مەرەيتويىن وسىنداي اۋقىمدا اتاپ وتەتىنىنە قۋانىشتىمىن. ۇلى تۇلعانىڭ قۇرمەتىنە بىرنەشە سالتاناتتى شارالار ءوتتى. اقىندار ايتىسى سول مەرەيتويلىق جيىنداردى جالعاستىردى جانە مىقتى اقىنداردىڭ باسىن قوستى. بۇل ءبىزدىڭ ەلباسى – قازاقستان رەسپۋبليكاسىنىڭ تۇڭعىش پرەزيدەنتى ۇسىنعان «رۋحاني جاڭعىرۋ» ۇلى يدەياسىنىڭ ناقتى ىسكە اسىرىلۋى، - دەپ اتاپ ءوتتى ءجۇرسىن ەرمان.

«ايتىس – قازاقتىڭ ەجەلگى ونەرى جانە وتە كۇردەلى، سەبەبى اقىندار تولىعىمەن سۋىرىپ سالما ونەرىنىڭ كومەگىمەن جەڭىسكە جەتە الادى. ءبىزدىڭ حالىق اقىنداردى وتە جاقسى كورەدى. ءار ايتىستا ارقاشان زالدا ينە شانشار جەر بولمايدى. سەبەبى ءاردايىم مىقتى اقىندار جينالادى»، - دەيدى قازىلار القاسىنىڭ توراعاسى، تانىمال اكتەر جانە رەجيسسەر، حالىق ءارتىسى، قازاقستاننىڭ ەڭبەك ەرى ءاسانالى ءاشىموۆ.

ايتىستىڭ بۇكىل ەلگە  Qazaqstan تەلەارناسىنىڭ ەفيرىندە كورسەتىلەتىنى ونەرسۇيەر قاۋىم ءۇشىن ۇلكەن ولجا بولدى. بۇل تەلەراديوكورپوراتسيا، Nur Otan پارتياسى جانە ءبىزدىڭ قوعامدىق بىرلەستىك جاساعان مەموراندۋمنىڭ ارقاسىندا مۇمكىن بولدى. مۇنداي جوبالار رۋحانياتتى جانداندىرۋعا، ۇلتتىڭ مادەني كودتىڭ ساقتالۋىنا ىقپال ەتەدى دەيدى ۇيىمداستىرۋشىلار.

–ساكەن سەيفۋللين قۇرمەتىنە وتكىزىلەتىن وسى ايتىس قازاق حالقى ءۇشىن وتە ماڭىزدى. قازاقستاندا ايتىستار مەنىڭ وتانىما قاراعاندا ءجيى وتكىزىلەدى. وسىلايشا مادەني مۇرانى باعالايتىندارىڭىز، سالت-داستۇرلەردى قۇرمەتتەيتىندەرىڭىز جانە حالىق ونەرىن قولدايتىندارىڭىز وتە جاقسى، – دەدى بىشكەكتەن كەلگەن ايتىسكەر جەڭىسبەك توقتوبەكوۆ. ەكى كۇن بويى تەاتر ساحناسىندا 18 ايتىسكەر باس جۇلدە ءۇشىن باق تالاستىراتىن بولادى. شارانىڭ جابىلۋ سالتاناتى وتەتىن 19 قىركۇيەكتە جەڭىمپازدارعا جۇلدە تاپسىرىلادى.

گران-پري يەگەرى 3 ملن. تەڭگە كولەمىندە اقشالاي سىيلىق الادى. ءبىرىنشى ورىن ءۇشىن – 1,5 ملن. تەڭگە، ەكىنشى ورىنعا – 750 مىڭ تەڭگە، ءۇشىنشى ورىن ءۇشىن – 500 مىڭ تەڭگە سىياقى بەلگىلەنىپ وتىر. سونىمەن قاتار ەكى ارنايى جۇلدە قاراستىرىلعان.

سوڭعى جاڭالىقتار