18 قىركۇيەك, 12:45 387 0 سپورت انار لەپەسوۆا

دوپينگ قولدانعاندار سىياقى مەن باسپانادان ايىرىلادى

قر پارلامەنتى ماجىلىسىندە «قر دەنە شىنىقتىرۋ جانە سپورت تۋرالى كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىنىڭ ەكىنشى تىڭدالىمى ءوتتى. ماجىلىسمەندەر ءبىر اۋىزدان زاڭ جوباسىن قولداپ قر پارلامەنتى سەناتىنىڭ قاراۋىنا جىبەردى. 

زاڭ جوباسىن ازىرلەۋشى – قازاقستان رەسپۋبليكاسىنىڭ مادەنيەت جانە سپورت مينيسترلىگى. زاڭ جوباسىنىڭ نەگىزگى ماقساتى - قولدانىستاعى دەنە شىنىقتىرۋ جانە سپورت سالاسىنداعى زاڭنامانى جەتىلدىرۋ، دوپينگكە قارسى ەرەجەلەردى قاتاڭداتۋ، ۇلتتىق دوپينگكە قارسى ورتالىقتىڭ مارتەبەسىن كوتەرۋ.

زاڭ جوباسىندا دوپينگ قولدانعان، ونى قولدانۋعا ماجبۇرلەگەن تۇلعالارعا قاتىستى اكىمشىلىك جاۋاپكەرشىلىكتى ەنگىزۋ قاراستىرىلعان، ونىڭ كولەمى 200 ايلىق ەسەپتىك كورسەتكىشتى قۇرايدى.

بۇدان باسقا، زاڭ جوباسىندا دوپينگتى قولدانعانى ءۇشىن:

– جارىستان شەتتەتۋ;

– جارىستىڭ جويىلعان ناتيجەسى ءۇشىن اقشالاي ىنتالاندىرۋدى قايتارىپ الۋ;

– سپورتشىلار مەن باپكەرلەرگە ءومىر بويعى اي سايىنعى ماتەريالدىق قامسىزداندىرۋ تولەمىنەن ايىرۋ;

– سپورت تۇرلەرى بويىنشا قازاقستان رەسپۋبليكاسى قۇراما كومانداسىنىڭ مۇشەلەرىنە ولاردىڭ حالىقارالىق سپورتتىق جارىستاردا سپورتتىق جاراقاتتار الۋى جانە مەرتىگۋى كەزىندە وتەماقى تولەمدەرىنەن ايىرۋ;

– سپورتتىق اتاعىنان ايىرۋ;

– وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرىنە ارنالعان تۇرعىن ۇيدەن ايىرۋ;

– سپورتشىلاردى، باپكەرلەردى سپورت تۇرلەرى بويىنشا قازاقستان رەسپۋبليكاسىنىڭ قۇراما جانە شتاتتىق قۇراما كوماندالارىنىڭ قۇرامىنان شىعارىپ تاستاۋ كوزدەلەدى.

بۇگىنگى تاڭدا قر قولدانىستاعى «دەنە شىنىقتىرۋ جانە سپورت تۋرالى زاڭىندا» وليمپيادا، پاراليمپيادا، سۋردليمپيادا ويىندارىندا التىن مەدال جەڭىپ العان سپورتشىلاردىڭ مەنشىگىنە ءۇش بولمەلى، كۇمىس مەدال العان سپورتشىعا ەكى بولمەلى، قولا مەدال يەگەرىنە ءبىر بولمەلى پاتەر بەرۋ قاراستىرىلعان. زاڭ جوباسىندا وليمپيادا، پاراليمپيادا، سۋردليمپيادا جەڭىمپازدارى مەن جۇلدەگەرلەرىنە باسپانانى 10 جىل مەرزىمىنە دەيىن جالعا بەرۋ، سونىمەن قاتار، وسى مەرزىم ىشىندە ونى قۇقىق مەنشىك يەلەگىنە اۋدارۋعا تيىم سالىنادى، سەبەبى دوپينگ-تەستەردىڭ ساقتالۋ مەرزىمى 10 جىلدى قۇرايدى. وسى ۋاقىت ارالىعىندا ساراپتاما قۇرامىنان دوپينگ تابىلماسا، باسپانا سپورتشى مەنشىگىنە وتەدى. ەگەر وليمپيادا، پاراليمپيادا، سۋردليمپيادا جەڭىمپازى نە جۇلدەگەرى ومىردەن وتكەن جاعدايدا، دوپينگ ناتيجەسىنىڭ وڭ نە تەرىستىگىنە قاراماستان، سپورتشى مۇراگەرلەرىنىڭ اتىنا باسپانا قايتارىمسىز نەگىزدە بەرىلەدى.

دەرەككوز: قر مادەنيەت جانە سپورت مينيسترلىگىنىڭ ءباسپاسوز قىزمەتى

 

سوڭعى جاڭالىقتار