17 قىركۇيەك, 16:47 462 0 ونەر دينارا مىڭجاسارقىزى

بيبىگۇل تولەگەنوۆا ۆوكاليستەرىنىڭ بايقاۋى باستالدى

قازاقتىڭ بۇلبۇل ءانشىسى  بيبىگۇل تولەگەنوۆا ۆوكاليستەرىنىڭ حالىقارالىق ح بايقاۋى باستالدى. بۇل شارا تاۋەلسىز قازاقستان جاس انشىلەرىنىڭ بيىك تالعامىن، ونەرگە دەگەن تەرەڭ تۇسىنىگىن قالىپتاستىرۋدى ماقسات ەتەدى. ءان سايىسى جاڭا تالانتتاردىڭ ەسىمىن انىقتاپ، قازاق كلاسسيكالىق ونەرىن اسقاقتادى ءارى جاستاردىڭ رۋحاني كەمەلدەنۋىنە كومەكتەسەدى.

بۇل بايقاۋدا الەمنىڭ تۇكپىر-تۇكپىرىنەن، اتاپ ايتقاندا رەسەي، قىتاي، ۋكراينا، بولگاريا، تاجىكستان، ازەربايجان، موڭعوليا، ت.ب. ەلدەردەن جانە ەلىمىزدىڭ بارلىق ايماعىنان وپەرا سالاسىنىڭ 50 شاقتى ونەرپازى باس قوسادى. ءداستۇرلى تۇردە ۇيىمداستىرىلاتىن بيبىگۇل تولەگەنوۆا ۆوكاليستەرىنىڭ حالىقارالىق بايقاۋى تەك قانا ونەر سايىسى ەمەس، بۇل الماتى قالاسى مەن قوناقتارى اسىعا كۇتەتىن ءان مەرەكەسىنە اينالعالى قاشان.

بايقاۋدىڭ اشىلۋ سالتاناتىندا مادەنيەت جانە سپورت ۆيتسە-ءمينيسترى نۇرقيسا داۋەشوۆ مينيستر اقتوتى  رايىمقۇلوۆانىڭ قۇتتىقتاۋ ءسوزىن وقىپ بەردى. «بۇل مەرەكەنىڭ ءبىزدىڭ مەملەكەتتە وتەتىنى ۇلكەن قۋانىش. مادەنيەت ۇلتتىڭ بەت-بەينەسى، رۋحاني بولمىسى جانە اقىل-وي پاراساتى.  قازاق ۇلتىنىڭ اسىل قازىناسى مەن مادەني مۇراسىن تانىتۋعكا بار سانالى عۇمىرىن ارناعان بيبىگۇل تولەگەنوۆانىڭ ەڭبەگى زور. جاس انشىلەردىڭ شىعارماشىلىعىن شىڭداۋ ماقساتىندا وتكىزىلىپ جاتقان كونكۋرس تالعات مۇساباەۆ، ناتاليا Music, ازامات جىلتىركوزوۆ، سۇندەت بايعوجين سياقتى قازاقستاننىڭ دارىندى جاستاردىڭ ونەرىن اشتى. بۇل كۇندە ولار بۇكىل الەمنىڭ ساحنالارىندا قازاقستاننىڭ ۆوكالدىق ونەرىن حالىقارالىق دەڭگەيدە كورسەتىپ ءجۇر» دەلىنگەن وندا.

ال وسى بايقاۋدىڭ باستى سەبەپشىسى بيبىگۇل تولەگەنوۆا: «بۇل بايقاۋدىڭ ءوتۋى – ەلىمىز ءۇشىن ابىروي. ماقسات - جاس بۋىندى رۋحاني تۇرعىدان دامىتىپ، ءار حالىقتىڭ كلاسسيكالىق ونەرىن پاش ەتۋ. مەرەيتويلىق بايقاۋعا 50-دەن استام ۇمىتكەر كەلدى. نەگىزىنەن قاتىسۋشىلار 17-22 جاس ارالىعىنداعى جاستار. ولاردىڭ ونەرگە دەگەن جولىن اشىپ، باعىن جاعامىز» دەپ، قاتىسۋشىلارعا ساتتىلىك تىلەدى.

16-26 قىركۇيەك اراسىندا وتەتىن بايقاۋ ىرىكتەۋ جانە اقتىق كەزەڭنەن تۇرادى. بارلىق تىڭدالىم ەل الدىندا وتەدى. انشىلەردىڭ ساحناعا شىعۋ رەتى جەرەبە ارقىلى انىقتالادى. ال سوڭعى اقتىق كەزەڭدە 14 قاتىسۋشى باق سىناپ، سايىسقا تۇسەدى. ءار قاتىسۋشى ءوزىنىڭ ونەرى جايىندا شىعارماشىلىق وكىلدەرىنىڭ پىكىرىن بىلە الادى. بۇل ونەر مەرەكەسى الەمدىك ساحناعا تابانى تيەتىن جاڭا ەسىمدەردىڭ اتىن تانىتادى.

حالىقارالىق بايقاۋ قاتىسۋشىلارىنىڭ ونەرى مەن تالانتىن بەدەلدى ءارى كاسىبي بىلىكتى مامانداردان قۇرالعان ادىلقازىلار باعالايدى. ولاردىڭ قاتارىندا ونەر سالاسىنىڭ مايتالماندارى: پەتر شەرەمەتەۆ، ميحايل مۋنتيان، تامارا نوۆيچەنكو، دامير باسىروۆتار بار. ال توراعاسى - قازاقتىڭ بۇلبۇل ءانشىسى بيبىگۇل تولەگەنوۆا.

بايقاۋدى مادەنيەت جانە سپورت مينيسترلىگى "ميراس" ۇلتتىق قوعامدىق قورىمەن بىرلەسىپ ۇيىمداستىرۋدا. باس سەرىكتەس - "سامۇرىق-قازىنا" اق.

سوڭعى جاڭالىقتار