17 قىركۇيەك, 11:30 399 0 جاھان انار لەپەسوۆا

وزبەكستاندا مارقۇمداردىڭ ارۋاعىنا ارناپ اس بەرۋگە تىيىم سالىندى

وزبەكستاندا 2020 جىلدىڭ 1 قاڭتارىنان باستاپ پارلامەنت قابىلداعان «ۇيلەنۋ، وتباسىلىق تويلاردى جانە ەسكە الۋ شارالارىن وتكىزۋ ءتارتىبى جونىندەگى» قاۋلىسى كۇشىنە ەنەدى، دەپ حابارلايدى ورتالىق ازيانىڭ جاڭالىقتار قىزمەتى.

ونداعى تارتىپكە سايكەس، سالتاناتتى شارا تاڭعى ساعات 6-دان كەشكى 11 اراسىندا ءوتۋى ءتيىس. بىراق مۇنىڭ مارقۇمدى سوڭعى ساپارعا شىعارىپ سالۋ شاراسىنا قاتىسى بولمايدى. بۇدان بولەك جەرگىلىكتى اكىمدەر، ءماسليحات دەپۋتاتتارى توي وتكىزۋ ۋاقىتىنا وزگەرىس ەنگىزە الادى.

قۇجاتتا وتباسىلىق شاراعا 200-دەن ارتىق ادامدى جيناماۋعا كەڭەس بەرگەن. ۇيلەنۋ تويىنا شاقىرۋ 250 ادامنان اسپاۋى ءتيىس، ال اسپازدىق شارالارعا 300-گە دەيىن ادام شاقىرۋعا بولادى.

توي ۇيىمداستىرۋشىلار شارا وتكىزەتىنىن ءبىر اپتا بۇرىن جەرگىلىكتى بيلىككە ەسكەرتۋى قاجەت.

سونىمەن بىرگە قاۋلىعا سايكەس، ۇلتتىق داستۇرگە قايشى كەلەتىن شوۋلاردى وتكىزۋگە تىيىم سالىنادى. مۇنان بولەك ادام و دۇنيەلىك بولعان كەزدە وتكىزەتىن جەتىسى، بەيسەنبىلىك ناماز، قىرىق، ءجۇز كۇن جانە جىلدىق اسى دەگەن سەكىلدى ەسكە الۋ شارالارىنا تىيىم سالىنعان.

سوڭعى جاڭالىقتار