16 قىركۇيەك, 11:59 429 0 قاۋىپسىزدىك انار لەپەسوۆا

جىل باسىنان بەرى وندىرىستە 848 ادام زارداپ شەكتى

جىل باسىنان بەرى رەسپۋبليكا كاسىپورىندارىندا 757 جازاتايىم وقيعا تىركەلدى، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.

«بيىلعى 1 قىركۇيەكتەگى جاعداي بويىنشا رەسپۋبليكا كاسىپورىندارىندا 757 جازاتايىم وقيعا ورىن الىپ، سونىڭ سالدارىنان 848 ادام زارداپ شەكتى. بۇل كورسەتكىش وتكەن جىلدىڭ سايكەس كەزەڭىنەن 13 پايىزعا تومەن (2018 جىلدىڭ 8 ايىندا – 975 ادام). جازاتايىم وقيعالاردان 95 ادام قازا تاپتى، بۇل وتكەن جىلدىڭ سايكەس كەزەڭىنەن 28 پايىزعا تومەن (2018 جىلى-133 ادام)»، - دەلىنگەن ۆەدومستۆو مالىمەتىندە.

ايتا كەتەيىك، جاراقاتتانۋدىڭ ءوسۋى وتكەن جىلدىڭ سايكەس كەزەڭىمەن سالىستىرعاندا جامبىل، اقتوبە، اقمولا، الماتى وبلىستارىندا، سونداي-اق الماتى قالاسىندا بايقالادى. پاۆلودار وبلىسىندا ءولىم-ءجىتىم جاعدايلارىنىڭ سانى ارتتى. 2019 جىلدىڭ ءبىرىنشى جارتىجىلدىعىنىڭ قورىتىندىسى بويىنشا ەكونوميكا سالالارى بويىنشا زارداپ شەككەندەردىڭ ەڭ كوبى تاۋ-كەن مەتاللۋرگيا كەشەنى كاسىپورىندارىندا (96 ادام نەمەسە 15%) جانە قۇرىلىس سالاسىندا( 65 ادام نەمەسە 10%) تىركەلدى.

كەيبىر كاسىپورىنداردا ەكى جانە ودان دا كوپ جازاتايىم وقيعالارى ورىن العاندىعىن ايتا كەتۋ كەرەك: («ارسەلورميتتال تەمىرتاۋ» اق – 20, «قازاقمىس كورپوراتسياسى» جشس – 11 (قاراعاندى وبلىسى), «كازتسينك» جشس – 15, «شىعىستۇستىمەت» جشس – 6 (شقو), «ەكىباستۇز گرەس-1» جشس – 3, «اليۋميني كازاحستانا» اق – 2 (پاۆلودار وبلىسى), «سسكوب» اق - 4, «بايان سۇلۋ» اق - 2 (قوستاناي وبلىسى).

قر باس مەملەكەتتىك ەڭبەك ينسپەكتورى تولەگەن وسپانقۇلوۆتىڭ ايتۋىنشا، جازاتايىم وقيعالاردىڭ نەگىزگى سەبەپتەرى اراسىندا جۇمىس ءوندىرىسىن ءتيىستى دەڭگەيدە ەمەس ۇيىمداستىرۋ، قاۋىپسىز ەڭبەك تاسىلدەرىن وقىتۋداعى كەمشىلىكتەر، ەڭبەك قاۋىپسىزدىگى جانە ەڭبەكتى قورعاۋ ەرەجەلەرىن بۇزۋ انىقتالدى.

سوڭعى جاڭالىقتار