12 قىركۇيەك, 13:34 415 0 جاڭالىقتار Túrkistan Gazeti

الماتى وبلىسى اكىمىنىڭ جاڭا ورىنباسارى تاعايىندالدى

بۇعان دەيىن الماتى  وبلىس اكىمى اپپاراتىنىڭ جەتەكشىسى بولعان باتىرجان بايجۇمانوۆ ەندى اكىمنىڭ يدەولوگيا سالاسىنا جاۋاپتى ورىنباسارى بولىپ تاعايىندالدى، دەپ حابارلايدى قازاقپارات ءتىلشىسى.

باتىرجان قۇلايمەرگەنۇلى 1976 جىلى تۋعان، ءبىلىمى جوعارى. 1998 جىلى قازاق مەملەكەتتىك اگرارلىق، 2005 جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتتەرىن عالىم-اگرونوم، مەملەكەتتىك باسقارۋ مەنەدجەرى ماماندىقتارى بويىنشا بىتىرگەن.

ەڭبەك جولىن 1999 جىلى باستاعان. ءار جىلدارى قر پرەمەر-ءمينيسترى جانە قر پرەزيدەنتى كەڭسەلەرىندە باس ساراپشى، پرەزيدەنت اكىمشىلىگىنىڭ مەملەكەتتىك ينسپەكتورى، قازاقستان رەسپۋبليكاسى اۋىل شارۋاشىلىعى مينيسترلىگىنىڭ «كازاگرويننوۆاتسيا»، «ۇلتتىق اگرارلىق عىلىمي-ءبىلىم بەرۋ ورتالىعى» اكتسيونەرلىك قوعامدارى توراعاسىنىڭ ورىنباسارى، 2017 جىلدان وسى ۋاقىتقا دەيىن وبلىس اكىمى اپپاراتىنىڭ باسشىسى بولدى.

«بۇعان دەيىن بۇل قىزمەتتى اقان ابدۋاليەۆ اتقارعان. ول وزىنە ارتىلعان مىندەتتى تولىقتاي ورىندادى. نەگىزى، الماتى وبلىسىنا كەلگىسى كەلەتىندەر كوپ. بىراق، مەن پرەزيدەنت اكىمشىلىگىمەن كەلىسە وتىرىپ، ورىنباسار لاۋازىمىنا وبلىستى بىلەتىن، مەنىمەن بىرگە جۇمىس ىستەگەن كادردى تاعايىنداپ وتىرمىن. ەڭبەگىڭ جەمىستى بولسىن»، دەدى وبلىس اكىمى اماندىق باتالوۆ.

ال، الماتى وبلىسى اكىمىنىڭ اپپاراتى جەتەكشىسى لاۋازىمىنا تەمىرلان بەكتاسوۆ تاعايىندالدى. تەمىرلان امانگەلدىۇلى 1969 جىلى تۋعان، ءبىلىمى جوعارى. 1999 جىلى قازاق مەملەكەتتىك ساۋلەت-قۇرىلىس اكادەمياسىن قۇرىلىس ينجەنەرى ماماندىعى بويىنشا ءبىتىرىپ، ەڭبەك جولىن باستاپ كەتكەن. 1999-2017 جىلدار ارالىعىندا قاراساي اۋداندىق ساۋلەتتەندىرۋ جانە جۇيەلەۋ باسقارماسىنىڭ تەحنيگى، ينجەنەرى، ءبولىم مەڭگەرۋشىسى، «ساۋلەت» مەملەكەتتىك-قازىنالىق كاسىپورىنى ديرەكتورىنىڭ ورىنباسارى، جامبىل، قاراساي اۋداندىق ساۋلەت جانە قالا قۇرىلىسى بولىمدەرىنىڭ باستىعى، الماتى وبلىستىق مەملەكەتتىك ساۋلەت-قۇرىلىس باقىلاۋ باسقارماسىنىڭ  باستىعى، كەربۇلاق اۋدانى تالدىبۇلاق اۋىلدىق وكرۋگىنىڭ اكىمى، وبلىستىق قۇرىلىس باسقارماسى باستىعىنىڭ ورىنباسارى، باسشىسى لاۋازىمدارىن اتقارعان. 2017 جىلدان وسى ۋاقىتقا دەيىن پانفيلوۆ اۋدانى اكىمى لاۋازىمىندا جۇمىس ىستەدى.

جيىن سوڭىندا وبلىس اكىمى ەرتەڭ تالعار، پانفيلوۆ جانە رايىمبەك اۋداندارىنا بارىپ، ءوڭىر اكتيۆتەرىنە جاڭا باسشىلاردى تانىستىراتىنىن ايتتى.

سوڭعى جاڭالىقتار