13 قىركۇيەك, 13:08 473 0 نۇر وتان انار لەپەسوۆا

باۋىرجان بايبەك جوو-دا جەمقورلىقتى جويۋدىڭ ماڭىزىن ايتتى

«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك «ادال ءبىلىم» جوباسى اياسىندا سىبايلاس جەمقورلىققا قارسى ءىس-قيمىل اگەنتتىگىنىڭ قولداۋىمەن جۇزەگە اسىپ جاتقان قازاق گۋمانيتارلىق زاڭ ۋنيۆەرسيتەتىنىڭ جاڭا جوبالارىمەن جانە كوۆوركينگ-ورتالىعىمەن تانىستى.  

ۋنيۆەرسيتەت رەكتورى تالعات نارىكباەۆتىڭ ايتۋىنشا، سىبايلاس جەمقورلىققا الىپ كەلۋى مۇمكىن جاعدايلاردى ازايتۋ ماقساتىندا بۇگىندە وقۋ ورنىنداعى بارلىق قىزمەت ونلاين تۇردە كورسەتىلەدى.

«2014 جىلى ءبىز ستۋدەنتتەرگە ءبىر تەرەزە قاعيداتى بويىنشا قىزمەت تۇرلەرىن الۋعا مۇمكىندىك بەرەتىن ورتالىق اشتىق. بۇل باعىتتاعى جۇمىستاردى ودان ارى جالعاستىرىپ، قازىر بارلىق قىزمەتتى ەلەكتروندى تۇردە كورسەتەمىز. سايكەسىنشە، اكىمشىلىك شىعىندار قىسقاردى، قوسىمشا الاڭدار بوساپ، ول جەردەن قازىرگى زامانعا ساي كوۆوركينگ ورتالىعىن اشتىق. سونداي-اق، ءبىز ارنايى ءموبيلدى قوسىمشا ازىرلەدىك. ونىڭ كومەگىمەن ستۋدەنت جاتاقحانا الۋعا ءوتىنىش بىلدىرۋگە، وقۋ قۇنىن ەسەپتەۋگە، ەدۆايزەردەن كەڭەس الۋ ءۇشىن جازىلۋعا مۇمكىندىك الادى»، – دەدى رەكتور.

جاستارمەن جۇزدەسۋ بارىسىندا باۋىرجان بايبەك سىبايلاس جەمقورلىققا قارسى ءىس-قيمىل باعدارلاماسىنىڭ جانە ەلباسى، «Nur Otan» پارتياسىنىڭ ليدەرى نۇرسۇلتان نازارباەۆتىڭ باستاماسىمەن قولعا الىنعان پارتيا قىزمەتىن قايتا جانداندىرۋعا قاتىستى جۇزەگە اسىپ جاتقان جۇمىس بارىسى تۋرالى ايتتى. زاڭ ۋنيۆەرسيتەتىنىڭ ستۋدەنتتەرىمەن بىرگە مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا كورسەتىلگەن سوت جانە قۇقىق قورعاۋ جۇيەلەرىندەگى رەفورمالار، سىبايلاس جەمقورلىقپەن جۇيەلى تۇردە كۇرەسۋ، ازاماتتاردىڭ قۇقىقتارىن قورعاۋدى قامتاماسىز ەتۋ جانە ت.ب. جايى تالقىلاندى.

«تسيفرلاندىرۋ – سىبايلاس جەمقورلىقپەن كۇرەسۋدىڭ جانە ونى جويۋدىڭ، جاريالىلىق پەن كورسەتىلەتىن قىزمەتتەردىڭ ساپاسىن ارتتىرۋدىڭ ماڭىزدى قۇرالدارىنىڭ ءبىرى. بۇگىنگى تاڭدا بۇل ۋنيۆەرسيتەتتە ستۋدەنتتەرگە وقىتۋشىلاردى وزدەرى تاڭداۋعا، ولاردىڭ جۇمىسىن جاسىرىن تۇردە باعالاۋعا جاعداي جاسالعان. بۇل وتە ماڭىزدى. ويتكەنى، جاستار وزدەرىنىڭ ءاربىر ءىسى ءۇشىن جاۋاپكەرشىلىكتى سەزىنۋى ءتيىس. ءبىز جوعارى وقۋ ورىندارىنداعى سىبايلاس جەمقورلىققا قارسى ءىس-قيمىلدارعا ايرىقشا ءمان بەرىپ وتىرمىز. سەبەبى، ەگەر ادام جاس كەزىنەن باستاپ ادىلەتسىزدىك كورەتىن بولسا، ونىڭ ومىرگە دەگەن كوزقاراسى دۇرىس قالىپتاسپايدى»، – دەدى باۋىرجان بايبەك.

كەزدەسۋ سوڭىندا «Nur Otan» پارتياسى توراعاسىنىڭ ءبىرىنشى ورىنباسارى ۋنيۆەرسيتەت رەكتورى تالعات نارىكباەۆ پەن ءوزىنىڭ «Nur Otan»-نىڭ قاتارىنا وتكىسى كەلەتىنى تۋرالى ەلباسى نۇرسۇلتان نازارباەۆقا حات جازعان وسى وقۋ ورنىنىڭ تۇلەگى ەرلان تولەگەنوۆكە پارتيالىق بيلەتتەرىن تابىس ەتتى.

سوڭعى جاڭالىقتار