13 قىركۇيەك, 10:23 475 0 قوعام دينارا مىڭجاسارقىزى

جانسەيىت تۇيمەباەۆ: اسسامبلەيا ناقتى مىندەتتەردى جۇزەگە اسىرادى

قازاقستان حالقى اسسامبلەياسى الماتى قالاسىنىڭ رەسپۋبليكالىق دوستىق ۇيىندە پرەزيدەنت ق.توقاەۆتىڭ "سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى" اتتى قازاقستان حالقىنا جولداۋىن تۇسىندىرۋگە جانە جولداۋدى ىسكە اسىرۋداعى قازاقستان حالقى اسسامبلەياسىنىڭ ءرولى مەن مىندەتتەرىن تالقىلاۋعا ارنالعان دوڭگەلەك ۇستەل وتكىزدى.

جيىنعا قحا توراعاسىنىڭ ورىنباسارى – حاتشىلىق مەڭگەرۋشىسى ج.ق.تۇيمەباەۆ، قحا توراعاسىنىڭ ورىنباسارى يۋ.ح.كەليگوۆ، قر پارلامەنت ءماجىلىسىنىڭ دەپۋتاتى ا.س.مۋرادوۆ، الماتى قالاسىنىڭ ءماسليحات دەپۋتاتتارى، رەسپۋبليكالىق ەتنومادەني بىرلەستىكتەر جەتەكشىلەرى مەن مۇشەلەرى، قازاقستان حالقى اسسامبلەياسىنىڭ مۇشەلەرى;  زيالى قاۋىم وكىلدەرى; الماتى ق. جوو-نىڭ پروفەسسورلىق-وقىتۋشى قۇرامى مەن ستۋدەنتتەر جانە باق وكىلدەرى قاتىستى.

قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ ءوز سوزىندە «مەملەكەت باسشىسى جولداۋدا بىرقاتار ماڭىزدى باعىتتارعا باسا ءمان بەرۋىمىز كەرەك ەكەندىگىن اتاپ ءوتتى. وسى تاپسىرمالاردىڭ نەگىزىندە ناقتى مىندەتتەر ايقىندالدى. جاقىندا عانا جولداۋدى ورىنداۋعا باعىتتالعان جالپىۇلتتىق ءىس-شارا جوسپارى قابىلداندى. ءبىزدىڭ جيىنىمىز وسى جولداۋدى تالقىلاۋعا جانە وندا العا قويىلعان مىندەتتەردى ىسكە اسىرۋعا اسسامبلەيانىڭ ەتنومادەني ۇيىمدارىنىڭ قاتىسۋى ماسەلەلەرىنە ارنالعان» دەپ اتاپ ءوتتى.

الداعى ۋاقىتتا جولداۋدى قولداۋ قازاقستان حالقى اسسامبلەياسى قىزمەتىنىڭ باستى باعىتتارىنىڭ ءبىرى بولىپ تابىلاتىنىن، قحا-نىڭ بارلىق قۇرىلىمدارى پرەزيدەنتتىڭ باستامالارىن ىلگەرىلەتۋ مەن تۇسىندىرۋگە، سونداي-اق جاڭا مىندەتتەردى ىسكە اسىرۋعا بەلسەندى تۇردە قوسىلاتىنىن جەتكىزدى.

«جاقىندا جولداۋدى ورىنداۋعا باعىتتالعان جالپىۇلتتىق ءىس-شارا جوسپارى قابىلداندى. مۇندا مەملەكەت باسشىسى بارلىعى 81 مىندەت جۇكتەدى. سونىڭ ىشىندە اسسامبلەيا بەس تاپسىرمادان تۋىندايتىن مىندەتتەردى جۇزەگە اسىرۋعا اتسالىساتىن بولادى.

بۇل ازاماتتىق قوعامدى دامىتۋ تۇجىرىمداماسى اياسىندا ۇكىمەتتىك ەمەس ۇيىمداردىڭ ءرولىن ارتتىرۋ، قوعامدا كوپپارتيالىلىقتى، ساياسي باسەكەلەستىك پەن پىكىر ارۋالاندىعىن دامىتۋ، تىلدەردى قولدانۋ مەن دامىتۋدىڭ مەملەكەتتىك باعدارلاماسى اياسىندا مەملەكەتتىك ءتىلدىڭ ەتنيكاارالىق كوممۋنيكاتسيا ءتىلى رەتىندە ءرولىن بەكىتۋ جونىندەگى شارالاردى انىقتاۋ، ءابۋ ناسىر ءال-ءفارابيدىڭ 1150 جىلدىق، ۇلى ابايدىڭ 175 جىلدىق مەرەيتويلارىن جانە قازاقستان تاۋەلسىزدىگىنىڭ 30 جىلدىعىن اتاپ وتۋگە بايلانىستى دايىندىق جۇمىستارىنىڭ جالپىرەسپۋبليكالىق جوسپارىن ازىرلەپ، بەكىتۋ سەكىلدى اۋقىمدى شارالار»، – دەدى جانسەيىت قانسەيىتۇلى.

سونداي-اق، جيىندا اسسامبلەيا توراعاسىنىڭ ورىنباسارى يۋسۋپ كەليگوۆ، «ۆايناح» قاۋىمداستىعىنىڭ تەڭ توراعاسى سۇلتان وزدوەۆ، «قازاقستاندىق ورىس مادەني ورتالىعى» قوعامدىق بىرلەستىگىنىڭ توراعاسى ۆسەۆولود لۋكاشەۆ، قحا جانىنداعى عىلىمي-ساراپشىلىق توبىنىڭ مۇشەسى، پروفەسسور مەندىگانىم شايمەردەنوۆا جولداۋعا قاتىستى ءوز ويلارىن ورتاعا سالدى.

دوڭگەلەك ۇستەل باسىنداعى كەلەلى كەزدەسۋدى قورىتىندىلاۋ كەزىندە ج.تۇيمەباەۆ مەملەكەت باسشىسىنىڭ بيلىك پەن قوعام اراسىندا اشىق ديالوگ ارقىلى تۇراقتى دامۋشى مەملەكەت قۇرۋ جونىندەگى تاپسىرماسىنا بارلىق ايماقتاعى مەملەكەتتىك مەكەمەلەر عانا ەمەس، حالىقپەن قويان-قولتىق جۇمىس جاسايتىن قوعامدىق ۇيىمدار مەن بىرلەستىكتەر دە ءۇن قوسۋى كەرەكتىگىن ەسكە سالدى.
سونىمەن قاتار، دوستىق ۇيىندە «قازاقستان ۆايناحتارى: بىرلىك پەن جاسامپازدىق» اتتى قازاقستاننىڭ شەشەن جانە ينگۋش ەتنوستارىنىڭ مادەنيەت جانە سالت-ءداستۇر كۇنىنە ارنالعان مەرەكەلىك ءىس-شارا جۇزەگە استى.
قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ شەشەن مەن ينگۋش ەتنوستارىنىڭ مادەنيەتى مەن سالت-داستۇرلەرى كۇنىمەن قۇتتىقتاي وتىرىپ:

«شەشەندەر مەن ينگۋشتار – ۇلى دالانى مەكەن ەتكەن باسقا ەتنوستاردىڭ بارلىعىمەن تەرەزەسى تەڭ  حالىق. سىزدەردىڭ سالت-داستۇرگە ادال، نامىستى، قايسار، ۇل-قىزدارىڭىزدى، مەملەكەت جانە قوعام قايراتكەرلەرىن، قازاقستان نامىسىن قورعاپ جۇرگەن سپورتشىلار مەن ونەرپازداردى بارشا قازاقستاندىقتار ماقتان ەتەدى.  ۆايناح پەن قازاق حالقىنىڭ اراسىنداعى دوستىق باۋىرلاستىققا ۇلاسىپ كەتكەن. ءبىزدىڭ دوستىعىمىز تالاي سىننان ءوتىپ، شىڭدالعانىنا ساياسي قۋعىنعا ۇشىراعان شەشەن-ينگۋشتاردىڭ كۇشتەپ جەر اۋدارىلعانىنا 75 جىل تولۋىن اتاپ ءوتۋ بارىسىندا تاعى دا كوز جەتكىزدىك»، - دەدى.

باعدارلاما ارى قاراي «قازاقستاننىڭ شەشەن جانە ينگۋشتاردىڭ تاريحي-مادەني ءومىرى» اتتى كىتاپ كورمەسى جانە فوتوكورمەسىمەن جالعاستى.  سونداي-اق قولدانبالى ونەر كورمەسىندە كونە تۇرمىستىق زاتتار مەن مۋزىكا اسپاپتارى كورسەتىلدى. سونىمەن قاتار، شەشەن جانە ينگۋشتاردىڭ «دوستىق داستارحانى» اتتى تاعامدار كورمەسىنىڭ ۇلتتىق اسحاناسىنىڭ دەگۋستاتسياسى مەن ولاردى دايىنداۋدىڭ شەبەرلىك سىنىپتارى ۇيىمداستىرىلدى.

مەرەكەلىك شارا قازاقستاننىڭ شەشەن جانە ينگۋشتاردىڭ «ۆايناح» قاۋىمداستىعىنىڭ شىعارماشىلىق ۇجىمدارى دايىنداعان كونتسەرتتىك باعدارلامامەن اياقتالدى.

سوڭعى جاڭالىقتار