12 قىركۇيەك, 21:13 478 0 جاڭالىقتار انار لەپەسوۆا

6 نەسيەسى بار: نۇر-سۇلتاندا كوپىرگە شىعىپ العان ازاماتتىڭ كوزدەگەنى نە؟

الەۋمەتتىك جەلىلەردە ەسىل وزەنى بويىنداعى كوپىرگە شىعىپ العان ەر ادامنىڭ ۆيدەوسى تارادى. نۇر-سۇلتان اكىمدىگىنىڭ ماماندارى ەل نازارىن وزىنە اۋدارعان ازاماتتىڭ كىم ەكەنىن جانە مۇنداي ارەكەتكە نە سەبەپتى بارعانىن ايتتى.

الەۋمەتتىك دامۋ ءبولىمىنىڭ باسشىسى تالعات راحمانبەردى 1991 جىلى تۋعان ەر ادامنىڭ ءۇش رەت قالالىق اكىمدىككە جۇگىنگەنىن ايتتى.

«بۇگىنگە دەيىن قالا تۇرعىنى اكىمدىككە تۇرعىن ءۇي نەمەسە جەر تەلىمىن بولۋگە كومەك سۇراپ ءۇش رەت جۇگىندى. 9 قىركۇيەكتە «ەڭبەك» باعدارلاماسى بويىنشا سقو-عا جۇمىسقا ورنالاسۋعا جانە باسپانا الۋعا كوشۋ تۋرالى كەلىسىمگە كەلگەن. الايدا، بۇگىن، 12 قىركۇيەكتە، ازامات قۇجاتتارمەن كەلمەگەن، ال ءبىزدىڭ كەلىسىم بۇزىلعان»، - دەپ اتاپ ءوتتى تالعات راحمانبەردى.

«بۇرىن ءبىز ونىڭ جالدامالى باسپانا تولەمىن جانە كەيبىر ماسەلەلەرىن شەشكەن بولاتىنبىز. بۇگىنگى تاڭدا ونىڭ جالپى قۇنى 1,3 ميلليون تەڭگە بولاتىن التى نەسيەسى بار ەكەنىن بىلەمىز. ازامات اۋىرمايدى، جانۇياسى، ەكى بالاسى بار. تۇراقتى جۇمىس بولدى، ول جەردەن جاعىمسىز سەبەپتەرمەن شىعارىلدى»، - دەپ تولىقتىردى ول.

بۇعان دەيىن بەلگىسىز ەر ادامنىڭ ەسىل وزەنى بويىنداعى كوپىرگە شىعىپ العان ۆيدەوسىن جاريالاعان ەدىك.

سوڭعى جاڭالىقتار