12 قىركۇيەك 2019, 12:01 641 0 الەۋمەت انار لەپەسوۆا

الماتىدا مەكتەپ تەرەزەسىنەن سەكىرگەن وقۋشى اۋرۋحاناعا ءتۇستى

مەكتەپتىڭ ەكىنشى قاباتتاعى تەرەزەسىنەن قۇلاعان الماتىلىق وقۋشى اۋرۋحانادا جاتىر. ءبىلىم بەرۋ مەكەمەسى وقيعانىڭ ءمان-جايىن ايتتى، دەپ حابارلايدى كتك ارناسى.

مۇعالىم ءۇزىلىس كەزىندە بالالاردى سىنىپتان شىعارىپ، كابينەتتى كىلتپەن بەكىتىپ كەتكەن ەكەن. كەيىنىرەك وقۋشىلار ايتقانداي، بالا پارتانىڭ استىنا تىعىلىپ قالعاندىقتان، ۇستاز ونى بايقاماپتى. سىنىپتا جالعىز ءوزى قالعان 1-سىنىپ وقۋشىسى سىرتقا شىققىسى كەلىپ، ەكىنشى قاباتتاعى تەرەزەدەن سەكىرىپ كەتكەن.

"بالالار ونىڭ پارتانىڭ استىندا تىعىلىپ قالعانىن ايتتى. جەتكىنشەك ەكىنشى قاباتتان سەكىرگەن. بىردەن دارىگەرلەردى شاقىردىق. بۇعان دەيىن مۇعالىمدەردىڭ بارىنە قاۋىپسىزدىك تەحنيكاسى ەرەجەلەرى ءتۇسىندىرىلىپ، ولار قولدارىن قويعان بولاتىن. بولعان جايت تۋرالى ايتىپ، قايتا تۇسىندىردىك", - دەدى الماتىنىڭ №80 ورتا مەكتەبىنىڭ ديرەكتورى ايگەرىم بايەكەنوۆا.

مەكتەپ ديرەكتورىنىڭ ايتۋىنشا، بالانىڭ اتا-اناسى مۇعالىمگە كىنا ارتىپ وتىرعان جوق. پەداگوگ جۇمىسىن جالعاستىرا بەرەدى، بىراق قاتاڭ سوگىس العان.

"بالانىڭ جاعدايى ءبىر قالىپتى. ءۇيىن ساعىنادى. مۇعالىمگە دە، مەكتەپكە دە شاعىمىم جوق. تەرەزەدەن سەكىرگەن ءوزى، مۇعالىمنىڭ كىناسى ەمەس", - دەدى وقۋشىنىڭ اكەسى.

دارىگەرلەردىڭ ايتۋىنشا، بالاقاي كوپتەگەن جاراقات العان – ميى شايقالىپ، قۇرساق قۋىسىنىڭ اعزالارىنا زاقىم كەلگەن، وڭ جانە سول جاق بىلەك سۇيەگى سىنعان.

"بالا وياۋ، تاماعىن ءوزى ىشەدى، سويلەسەدى، ەمدەلىپ ءجۇر. ءبىر اپتا ىشىندە اۋرۋحانادان شىعارساق دەپ وتىرمىز", - دەپ اتاپ ءوتتى بالالار جەدەل مەديتسينالىق جاردەم ورتالىعى باس دارىگەرىنىڭ ورىنباسارى دىنمۇحامەد رۋزۋددينوۆ.

سوڭعى جاڭالىقتار