11 قىركۇيەك, 20:16 190 0 جاڭالىقتار Túrkistan Gazeti

سەنات باسشىسى يوردانيا ەلشىسىمەن ۆيزاسىز ءتارتىپ پەن تىكەلەي اۋە باعىتىن اشۋ ماسەلەسىن تالقىلادى

پارلامەنت سەناتىنىڭ توراعاسى داريعا نازارباەۆا يوردانيانىڭ قازاقستانداعى ەلشىسى يۋسەف ابدەلگانيمەن كەزدەسۋ بارىسىندا ەكىجاقتى ىنتىماقتاستىقتى ودان ءارى نىعايتۋ ماسەلەلەرىن تالقىلادى. بۇل تۋرالى سەناتتىڭ ءباسپاسوز قىزمەتى حابارلادى.

سەنات توراعاسى يوردانيا ەلى مەن كورول ابداللا II-ءنىڭ تاياۋ شىعىستاعى كۇردەلى ۇدەرىستەردى رەتتەۋگە قوسقان زور ۇلەسىن اتاپ ءوتتى.

«مەملەكەتىمىزدىڭ جاقىن دوسى – كورول ابداللا II-ءنىڭ ءوز ەلىندەگى قوعامدىق-ساياسي ءومىردى جانە ەكونوميكانى رەفورمالاۋداعى قىزمەتىن، سونداي-اق حالىقارالىق وزەكتى ماسەلەلەر جونىندەگى سىندارلى ۇستانىمىن جوعارى باعالايمىز. كورولدىڭ  2017 جىلعى قاراشا ايىندا قازاقستانعا كەلگەن ساپارىنىڭ ماڭىزى زور». ابداللا II-ءنىڭ تاياۋ شىعىستاعى بەيبىتشىلىك پەن تۇراقتىلىق ماسەلەلەرىنە قوسقان كۇش-جىگەرى ەسكەرىلىپ، «يادرولىق قارۋسىز الەم جانە جاھاندىق قاۋىپسىزدىك ءۇشىن نازارباەۆ سىيلىعىنىڭ» العاشقى يەگەرى اتانعان بولاتىن.

تاراپتار حالىقارالىق جانە ايماقتىق كوپتەگەن ماسەلەلەر بويىنشا نۇر-سۇلتان مەن اممان قالالارى ۇستانىمدارىنىڭ ۇقساس ەكەنىن اتاپ ءوتتى. سەنات توراعاسى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى حاتشىلىقتىڭ كەزەكتى وتىرىسىنا دايىندىق جۇمىستارى تۋرالى ايتا كەلىپ، فورۋمعا قولداۋ كورسەتكەنى جانە بەلسەندى قاتىسقانى ءۇشىن يوردانيالىق تاراپقا العىس ءبىلدىردى.

ەلشى يوردانيا ازاماتتارى ءۇشىن ۆيزاسىز ءتارتىپ ەنگىزۋدى جانە ەكى ەل اراسىنداعى تىكەلەي اۋە قاتىناسىن اشۋدى ءوتىندى. بۇل ساۋدا-ەكونوميكالىق ىنتىماقتاستىقتى كەڭەيتۋگە، تۋريزم الەۋەتىن دامىتۋعا مۇمكىندىك بەرەدى جانە يوردانيا ستۋدەنتتەرىنىڭ كوپتەپ كەلۋىنە جول اشادى.

داريعا نازارباەۆا ەلشىنىڭ ۇسىنىستارىنا قولداۋ ءبىلدىرىپ، ەكى ەل اراسىنداعى ءوزارا ءىس-قيمىلدى نىعايتۋدا ۆيزاسىز ءتارتىپتىڭ ماڭىزدىلىعىن اتاپ ءوتتى.

سوڭعى جاڭالىقتار