9 قىركۇيەك, 17:10 323 0 دەنساۋلىق انار لەپەسوۆا

قازاقستاندا قاتەرلى ىسىكتى جارتى ساعاتتا ەمدەيتىن قوندىرعى ىسكە قوسىلادى

ەلىمىزدە  قاتەرلى ىسىك، مي تامىرلارى مەن فۋنكتسيونالدى اۋرۋلاردى ەمدەۋگە ارنالعان "گامما-پىشاق"  قوندىرعىسى ىسكە قوسىلادى. بۇل تۋرالى پرەزيدەنت قاسىم-جومارت توقاەۆ تۆيتتەردەگى پاراقشاسىندا جازدى.

​"ەلباسىمىز قازاقستاننىڭ ەڭبەك ەرى مارتەبەلى اتاعىمەن ماراپاتتاعان، بەلگىلى عالىم-نەيروحيرۋرگ سەرىك اقشولاقوۆتى قابىلدادىم. قاتەرلى ىسىكتەردى، مي تامىرلارى مەن فۋنكتسيونالدى دەرتتەردى ەمدەۋگە ارنالعان "گامما-پىشاق" اتتى بىرەگەي قوندىرعىنىڭ جاقىندا ىسكە قوسىلاتىنى جونىندە ءمالىم ەتتى", - دەپ جازدى توقاەۆ.

بۇعان دەيىن اقشولاقوۆ "گامما-پىشاق" تۋرالى قازاقستان نەيروحيرۋرگتەرى IV كونگرەسىنىڭ كۋلۋارىندا ايتقان ەدى.

"الداعى ون جىلدا الدىمىزعا مۇلدە باسقا مىندەتتەر قويىپ وتىرمىز. بۇل زاماناۋي تەحنولوگيالاردى ەنگىزۋ، سونىڭ ىشىندە Gamma Knife (گامما-پىشاق) راديوحيرۋرگيالىق ادىسىمەن مي ىسىكتەرى مەن مي قان تامىرلارى اۋرۋلارىن ەمدەۋ. بۇل ناۋقاستاردى كومپيۋتەرلىك ادىسپەن ساۋلەلەندىرۋ. ناۋقاس 30-40 مينۋت ىشىندە جازىلىپ كەتەدى. 2019 جىلى بۇل ءادىستى ەنگىزۋدى كوزدەپ وتىرمىز", - دەگەن بولاتىن ول "كازاحستانسكايا پراۆدا" باسىلىمىنا بەرگەن سۇقباتىندا.

سوڭعى جاڭالىقتار