9 قىركۇيەك 2019, 11:31 347 0 جاڭالىقتار Túrkistan Gazeti

قازاقستاندىق بىتىمگەرلەر بۇۇ مەدالىمەن ماراپاتتالدى

ليۆانداعى ەكىنشى قازاقستاندىق بىتىمگەرشىلىك روتاسىنىڭ اسكەري قىزمەتشىلەرى بۇۇ-نىڭ «بەيبىتشىلىك قىزمەتىندە» مەدالىنە يە بولدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.

جۇلدەنى جيىنتىق روتانىڭ جەكە قۇرامىنا بۇۇ ۋاقىتشا كۇشتەرى شتابىنىڭ باستىعى تابىستادى. مەدالدىڭ ارتقى جاعىندا «IN THE SERVICE OF THE PEACE» دەگەن بەدەرلى جازۋ ورنالاسقان. بۇل «بەيبىتشىلىك قىزمەتىندە» دەگەن ماعىنانى ءبىلدىرىپ، بۇۇ ميسسياسىنا قاتىسقاندىعىن دالەلدەيدى. مىندەتتەردى ورىنداۋ بارىسىندا ءبىزدىڭ بىتىمگەرشىلىك روتا «كاسىپقوي بىتىمگەر» مارتەبەسىنە يە بولدى.

قازاقستان مەن ءۇندىستان ۇكىمەتى اراسىنداعى «ءۇندى باتالونىنىڭ قۇرامىنا قازاقستاندىق بىتىمگەرشىلىك كونتينگەنتىن ورنالاستىرۋ ءتارتىبى تۋرالى» كەلىسىمگە سايكەس ەكىنشى بىتىمگەرشىلىك روتا «ليۆانداعى بۇۇ ۋاقىتشا كۇشتەرى» ميسسياسىنا قاتىسۋعا التى اي مەرزىمگە ءبىرىنشى روتانى اۋىستىرۋ ءۇشىن جىبەرىلگەن ەدى. 2019 جىلدىڭ قاراشا ايىندا بىتىمگەرلەر قۇرامى ەلگە ورالىپ، ولاردى الماستىرۋعا ءۇشىنشى بىتىمگەرشىلىك روتا اتتانادى.

بۇعان دەيىن قازاقستاندىق اسكەريلەر تەك باقىلاۋشىلار رەتىندە قاتىسقان ەدى.

جالپى، قازاقستان بەيبىتشىلىك پەن قاۋىپسىزدىكتى نىعايتۋ جونىندەگى باستامالاردىڭ جاقتاۋشىسى جانە بەلسەندى قاتىسۋشىسى ەكەندىگىن ايتا كەتكەن ءجون. بىتىمگەرشىلىك الەۋەتىن دامىتۋ قر قارۋلى كۇشتەرىن الداعى ۋاقىتتا دامىتۋدىڭ ماڭىزدى مىندەتتەرىنىڭ ءبىرى بولىپ تابىلادى.

ەستەرىڭىزگە سالا كەتەيىك، 1-ءشى قىركۇيەكتە يزرايل اسكەرى ليۆان اۋماعىنا زىمىراندىق سوققى جاساعان بولاتىن، وسىعان بايلانىستى بۇۇ بولىمشەلەرىنىڭ قۇرامىنا كىرەتىن قازاقستاننىڭ ەكىنشى بىتىمگەرشىلىك روتاسى ارنايى مىندەتتەمەلەرگە سايكەس تاپسىرمالاردى ورىنداۋ ءۇشىن تولىق جاۋىنگەرلىك ازىرلىككە كەلتىرىلدى.

سوڭعى جاڭالىقتار