9 قىركۇيەك, 11:21 171 0 ءبىلىم انار لەپەسوۆا

دەنە شىنىقتىرۋ ساباعىندا كوز جۇمعان وقۋشىنىڭ ۇستازدارى جازالاندى

ۇستىنە فۋتبول قاقپاسى قۇلاپ، مەرت بولعان قازىعۇرتتىق وقۋشىنىڭ ولىمىنەن كەيىن جەرگىلىكتى شەنەۋنىكتەر، مەكتەپ باسشىلىعى جانە دەنە شىنىقتىرۋ ءپانى مۇعالىمى جازالاندى.

8-سىنىپ وقۋشىنىڭ دەنە شىنىقتىرۋ ساباعى كەزىندەگى وقىس ءولىمى تۇزدەگى بالاسى ءۇشىن ونسىز دا الاڭداپ وتىراتىن اتا-انالاردىڭ ۇرەيىن كۇشەيتتى. وقيعادان كەيىن تۇركىستان وبلىسىنىڭ قازىعۇرت اۋدانىندا كامەلەت جاسقا تولماعانداردىڭ ىستەرى جونىندەگى كوميسسيانىڭ شۇعىل وتىرىسى وتكەن. ءبىلىم جانە عىلىم ءمينيسترىنىڭ بۇيرىعى بويىنشا، الگوريتم نەگىزىندە بولعان جايت تۋرالى 3 ساعات كولەمىندە حابارلانۋى ءتيىس.اقپاراتتى ءبىلىم سالاسىنداعى ءتيىستى ورگاندارعا جەتكىزۋ كەرەك بولعان. الايدا اتالعان بۇيرىق ورىندالماعان.

كوميسسيا جۇمىسى مەن تەرگەۋ امالدارىنىڭ ناتيجەسىندە كىنالى تۇلعالاردىڭ، سونىڭ ىشىندە اۋەزوۆ اتىنداعى مەكتەپتىڭ دەنە شىنىقتىرۋ ءپانىنىڭ مۇعالىمى ابدىعاپپار ەسەنبەكوۆتىڭ  جاۋاپكەرشىلىگى قارالدى. مۇعالىم جۇمىسىنان ۋاقىتشا شەتتەتىلگەن. وبلىستىق پوليتسيا دەپارتامەنتىنىڭ تەرگەۋ ءبولىمىنىڭ باسشىسى قايبار مالىكتىڭ مالىمدەۋىنشە، سوتقا دەيىنگى تەرگەۋ جۇرگىزىلۋدە.

بۇدان بولەك، مەكتەپ ديرەكتورى ەسكەندىر مۇساقۇلوۆ پەن وقۋ ءىسى جونىندەگى مەڭگەرۋشىسى قانات يساباەۆقا «اتقارىپ وتىرعان قىزمەتىنە لايىق ەمەس» دەپ جاريالاندى. ال ءبىلىم ءبولىمى باسشىسىنىڭ ورىنباسارى ءاليا ەگىزەك قاتاڭ سوگىس، اۋدان اكىمىنىڭ ورىنباسارى سەرىك تۇرسىنقۇلوۆ سوگىس الدى.

بريفينگتە سپورت زالدارىندا سپورتتىق زاتتاردى پايدالانۋ قاۋىپسىزدىگىن قامتاماسىز ەتۋگە باعىتتالعان شارا جۇرگىزىلەتىنى مالىمدەندى. بۇل رەتتە ميني-فۋتبول نەمەسە گاندبول ويناعان كەزدە قاقپانى بەكىتۋ ماسەلەلەسى قارالدى.

 

سوڭعى جاڭالىقتار