6 قىركۇيەك, 11:49 211 0 جاڭالىقتار Túrkistan Gazeti

نۇر-سۇلتاندا قازاقستان مەن چيلي اراسىنداعى ساياسي كونسۋلتاتسيالاردىڭ كەزەكتى وتىرىسى ءوتتى

قازاقستان رەسپۋبليكاسىنىڭ سىرتقى ىستەر مينيسترلىگىندە قر سىرتقى ىستەر ءمينيسترىنىڭ ورىنباسارى ەرجان اشىقباەۆ پەن چيلي سىرتقى ىستەر ءمينيسترىنىڭ ورىنباسارى پاتريسيو توررەستىڭ قاتىسۋىمەن قازاقستان مەن چيلي اراسىنداعى ساياسي كونسۋلتاتسيالاردىڭ ەكىنشى وتىرىسى ءوتتى.

تاراپتار مەملەكەتتەر اراسىنداعى ىنتىماقتاستىقتىڭ نىعايۋىن جانە ەكى ەل ساياسي ۆەدومستۆالارىنىڭ اراسىنداعى ديالوگتىڭ ىلگەرىلەمەلى دامۋىن قولدادى.

كەلىسسوزدەر بارىسىندا ەكىجاقتى جانە كوپجاقتى ارىپتەستىكتىڭ كەڭ سپەكترى، ونىڭ ىشىندە اۋىل شارۋاشىلىعى، تاۋ-كەن قازۋ ونەركاسىبى، جانعىرتىلاتىن ەنەرگيا كوزدەرى سالالارىنداعى ساۋدا-ەكونوميكالىق ىقپالداستىقتى نىعايتۋ، شارت-قۇقىقتىق بازانى كەڭەيتۋ، ۆيزالىق ءتارتىپتى ودان ءارى جەڭىلدەتۋ، ينتەگراتسيالىق پروتسەستەردى ارتتىرۋ ءۇشىن قۇرمەتتى كونسۋلدار ينستيتۋتىن كۇشەيتۋ، قازاقستان مەن چيلي اراسىنداعى مادەني-گۋمانيتارلىق بايلانىستاردى دامىتۋ، سونداي-اق حالىقارالىق قاۋىپسىزدىك پەن كليماتتىڭ وزگەرۋىنە قارسى كۇرەس سۇراقتارى بويىنشا ديالوگتى ساقتاۋ ماسەلەلەرى كەڭ تۇرعىدا تالقىلاندى.

قر سىرتقى ىستەر ءمينيسترىنىڭ ورىنباسارى ەلىمىزدىڭ ورتالىق ازيا وڭىرىندەگى ءرولى، قازاقستاننىڭ ساياسي جانە ەكونوميكالىق دامۋىنىڭ وزەكتى اسپەكتىلەرى، ونىڭ ترانزيتتىك الەۋەتى، شەتەلدىك ينۆەستورلاردى تارتۋ اياسىنداعى جۇمىسى، ەكونوميكانى جاڭعىرتۋ جانە شەتەلدىك ينۆەستورلاردى قورعاۋ جونىندەگى شارالار تۋرالى حابارلادى. قازاقستاندىق ديپلومات قازاقستان-چيلي ديپلوماتيالىق قارىم-قاتىناستارىنىڭ سوڭعى 25 جىل اياسىندا قول جەتكىزگەن سەنىمدى ساياسي ديالوگ ەكى مەملەكەتىمىزدىڭ الدىندا ساۋدا جانە ينۆەستيتسيالار سالاسىندا، ونىڭ ىشىندە ەۋرازيالىق ەكونوميكالىق وداق شەڭبەرىندەگى ىنتىماقتاستىق نىسانىندا ءوزارا ءتيىمدى سەرىكتەستىكتى ىلگەرىلەتۋگە جاڭا مۇمكىندىكتەر اشۋدا ەكەندىگىن جەتكىزدى.

چيلي سىرتقى ىستەر ءمينيسترىنىڭ ورىنباسارى قازاقستانمەن ورناتىلعان ىنتىماقتاستىقتىڭ ماڭىزدىلىعىن اتاپ ءوتتى. مەملەكەت باسشىسىنىڭ جاقىندا حالىققا ارناعان جولداۋىنا پىكىر ايتا وتىرىپ، ول چيلي مەن قازاقستان اراسىنداعى ەكىجاقتى قارىم-قاتىناستارىن دامىتۋعا ودان ءارى سەرپىن بەرۋ قاجەتتىلىگىن باسا ايتتى. «ءبىزدىڭ ەلدەردىڭ دنق-لارى ۇقساس، ءبىز الەمدىك جانە وڭىرلىك ارەنادا ماڭىزدى ءرول اتقارامىز. مەن قازاقستان پرەزيدەنتى قاسىم-جومارت توقاەۆتىڭ حالىققا ارناعان جولداۋىندا ايتقان ۇستانىمىمەن كەلىسەمىن، بىزدە جەتىستىكتەرىمىزدى كوبەيۋتىگە مۇمكىندىك بار»، - دەپ ايتتى ءمينيستردىڭ ورىنباسارى.

سونىمەن قاتار، ول قازاقستاننىڭ يادرولىق قارۋدى تاراتپاۋ، قارۋسىزداندىرۋ، لاڭكەستىككە قارسى كۇرەس، چيلي لاتينامەريكالىق پاۆيلونىندا ءوزىن ويداعىداي تانىستىرعان «ەكسپو-2017» حالىقارالىق كورمە نەگىزىندە الەمدىك ارەنادا جاڭعىرتىلاتىن ەنەرگيا كوزدەرىن پايدالانۋدى تاراتۋ سالالارىنداعى جاھاندىق باستامالارىنىڭ ماڭىزدىلىعىن اتاپ ءوتتى. وسى تۇرعىدا، چيلي ديپلوماتى قازاقستان دەلەگاتسياسى سانتياگو قالاسىندا اعىمداعى جىلدىڭ جەلتوقسان ايىندا وتەتىن بۇۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنتسياسى تاراپتارىنىڭ 25-ءشى كونفەرەنتسياسىنا (سور25) قاتىساتىنىنا ءۇمىت ءبىلدىردى.

كوپجاقتى دەڭگەيدە تاراپتار چيلي نەگىز قالاۋشى ەلدەردىڭ ءبىرى بولىپ تابىلاتىن تىنىق مۇحيت اليانسىمەن بايلانىستاردى دامىتۋ پەرسپەكتيۆاسىن اتاپ ءوتتى. وسى جىلدىڭ شىلدە ايىندا قازاقستان اتالعان وڭتۇستىك امەريكالىق ەكونوميكالىق بلوكتا باقىلاۋشى ەل مارتەبەسىنە يە بولدى.

كەزدەسۋ قورىتىندىلارى بويىنشا ەكى تاراپ قازاقستان مەن چيلي اراسىنداعى ساياسي كونسۋلتاتسيالاردىڭ كەزەكتى وتىرىسىن سانتياگو قالاسىندا ۇيىمداستىرۋعا كەلىستى.

سوڭعى جاڭالىقتار