5 قىركۇيەك, 11:00 296 0 ادەبيەت تاڭسۇلۋ الدابەرگەنقىزى

اقىن جارىمەن قوشتاسۋ...

«... بار عوي، العاشقى ولەڭدەرى، ماعان جازعان حاتتارى تۇگەل ساقتاۋلى. بىراق ونى جاريالاۋعا بەرە بەرمەيمىن، ءوزىم دە ەستەلىك-سىر جازسام با دەگەن ويىم بار، دەنساۋلىق كوتەرىپ شامام كەلسە، – دەدى ول كىسى كوزىنە جاس الىپ.

مەن ودان سايىن قىزىعا ءتۇستىم. ەكى ساعاتقا سوزىلعان قىزىقتى اڭگىمەدەن كەيىن عانا اقىن جارى كەلىسكەن سىڭاي تانىتتى...»

بۇدان جيىرما جىل بۇرىن جىر سۇيەر قاۋىمعا ەسىمى ەتەنە تانىس جۇ­مە­كەن اقىن ناجىمەدەنوۆتىڭ جارى ءناسىپ اپايمەن بولعان سۇحبات وسىلاي باستالىپتى. ەش جەردە جاريالانباعان اقىننىڭ العاشقى عاشىقتىق حاتتارى سول كەزدە گازەت وقىرماندارىنا جول تارتقان ەدى.

سودان باستاپ اقىن جا­رى ءناسىپ مۇستاققىزىمەن جاقسى ءبىر سىيلاستىق ور­ناعانداي، ءجيى كەزدەسىپ، ول كىسىنىڭ جۇرەگىندەگى قانشاما سىر-مۇڭىن بىرگە تىڭداپ، سىر­لاسا باستادىق. جاقسىلىقتاردا باس قوستىق. اقىنعا ارنالىپ وقىل­عان قۇران-اس داستارقانىندا دامدەس بولدىق. اشىق-جارقىن، مەيىرىمدى جاراتىلىسى كەيدە تىك، كىرپيازداۋ،  سىرت قاراعاندا تاكاپپارلاۋ كورىنەتىن جانى سۇلۋ جان ەدى.

وتكەن ۋاقىتپەن سويلەپ وتىرعانىمىز جانىمىزعا باتسا دا، ءبىر كەزدەگى سىرلاسقان سىرلى كەيىپكەرىمىزدىڭ ارتىنان ءبىراۋىز جىلى ءسوز ايتۋدى پارىز سانادىق. ەل­دىڭ ءبارىن الالاماي، ءىش تارتا جۇرەتىن، قولىنداعى بارىن قازانىنا سالىپ، كول-كوسىر داستارقان جاساپ، جاقسىلاردىڭ باسىن قوسقاندى جانى قالاپ تۇراتىن جايدارى اپامىزدى كەشەگى جەكسەنبى كۇنى ماڭگىلىك مەكەنىنە شىعارىپ سالدىق...

قۋانسا بالاشا قۋاناتىن، بىرەۋدىڭ جۇزىندەگى كوڭىلسىزدىككە كوڭىلى الاي-دۇلەي كۇي كەشەتىن تاعى ءبىر مەيىرىمدى اپامىزدىڭ ءجۇزىن ەندىگى جەردە تەك ساعىنا ەسكە الاتىنىمىز قابىرعامىزعا، ارينە، باتتى. بىراق، «جازمىشتان وزمىش جوق». تاعدىر دەگەنىڭىز ەشكىمگە باعىنبايدى، تەك قانا جاراتۋشىنىڭ قولىنداعى تىرلىك، وعان امالسىز بولسا دا كونەسىز. كونىپ تە كەلە جاتىرمىز. قۋانا بىلەتىن دەگەننەن ەسكە ءتۇسىپ وتىرعانى، اسىرەسە، اقىننىڭ ءتول تۋىندىسى «مەنىڭ قازاقستانىم» انۇرانعا اينالعاندا جاس بالاشا قۋانعانى ءالى كوز الدىمىزدا. ەسى شىعىپ، قۋانىشتان جۇرەگى جارىلا جازداعان اپامىز  «سول كۇنى كۇنى بويى تەلەفوندا وتىردى»، – دەيدى جانارى جاسقا تولعان قىزى ايكەن ەرىكسىز ەگىلىپ.

قالاي قۋانباسىن، جۇرەگىن جارىپ شىققان تۋىندىسى وسىنداي جوعارى مارتەبەگە يە بولىپ جاتسا!؟

سويتكەن تۋىندى، الەمگە تانىمال سول تۋىندى اقىن جارىن باياۋ تەربەتىپ تال بەسىكتەن جەر بەسىگىنە شىعارىپ سالدى. ويتكەنى، جەكسەنبى كۇنى ەلىمىزدىڭ بارلىق ايماعىندا العاشقى قوڭىراۋ سوعىلىپ، ءانۇرانىمىز شىرقالىپ جاتتى... بۇل دا قۇدىرەتى كۇشتى جاراتقاننىڭ ءساتتى سايكەستىگى شىعار.

ءناسىپ اپامىز ناجىمەدەنكەلىنىنىڭ يمانى جولداس بولسىن! گازەت وقىرماندارى اتىنان بالالارىنا، تۋعان-تۋىستارىنا كوڭىل ايتامىز.

تاڭسۇلۋ الدابەرگەنقىزى

 

سوڭعى جاڭالىقتار