5 قىركۇيەك, 10:58 323 0 ايماق Túrkistan Gazeti

الەم جۋرناليستەرى – تۇركىستاندا

«رۋحاني جاڭعىرۋ» باعدارلاماسىنىڭ «جاھانداعى زاماناۋي قازاقستاندىق مادەنيەت» جوباسىن حالىقارالىق دەڭگەيدە تانىتۋ ماقساتىندا شەتەلدىك جۋرناليستەردىڭ قاتىسۋىمەن وبلىستاعى تاريحي-مادەني ورىندارعا ءباسپاسوز تۋرى ۇيىمداستىرىلدى. تۇركىستان وبلىسىنا ءبىر توپ شەتەلدىك باسىلىمداردىڭ تىلشىلەرى كەلىپ، ارىستانباب، قوجا احمەت ياساۋي كەسەنەلەرىنە ساياحات جاسادى.

اۋستريا، گەرمانيا، يتاليا، وڭتۇستىك كورەيا، قىتاي، مىسىر، ۇلى­بري­تانيا، ءۇندىستان، فرانتسيا، شۆەتسيا، شۆەيتساريا سىندى مەملەكەتتەردىڭ 20-عا جۋىق ءجۋرناليسى تۇران دالاسىنىڭ تاريحىمەن تانىسۋدى ارىستانباب كەسەنەسىنەن باستادى. ونداعى كونە جادىگەرلەردىڭ ارحيتەكتۋرالىق ەرەكشەلىگى مەن تاريحي ءمان-ماڭىزى جۋرناليستەردىڭ قىزىعۋشىلىعىن وياتتى.

مۇنان كەيىن «وتىرار» مەملەكەتتىك ارحەولوگيالىق قورىق-مۋزەيى مەن كونە وتىرار قالاشىعىن ارالاپ كوردى. ارنايى جايىلعان داستارقانداعى ۇلتتىق تاعامداردان ءدام تاتتى. بۇدان سوڭ جۋرناليستەر تۇركىستانداعى قوجا احمەت ياساۋي كەسەنەسىندە دە بولدى. تۇركى الەمىنىڭ رۋحاني استاناسى سانالاتىن تۇركىستان شاھارىنىڭ باي تاريحىمەن تانىسقان شەتەلدىك ارىپتەستەر ازىرەت سۇلتان مەملەكەتتىك تاريحي-مادەني مۇراجاي-قورىعىن دا ارالاپ كوردى.

«جاھانداعى زاماناۋي قازاقستاندىق مادەنيەت» جوباسى شەڭبەرىندە ءوتىپ جاتقان ءباسپاسوز تۋرلارى ءتۋريزمدى دامىتۋعا جانە  قازاقستاننىڭ وڭ ءيميدجىن قالىپتاستىرۋعا ىقپال ەتەدى.

 

«تۇركىستان-اقپارات»

سوڭعى جاڭالىقتار