3 قىركۇيەك, 16:31 433 0 ىشكى ساياسات دينارا مىڭجاسارقىزى

قازاقستانداعى رۋمىن-مولدوۆان اسسوتسياتسياسىنىڭ بولاشاعى

2002 جىلى رۋمىن جانە مولدوۆان حالقىنىڭ وكىلدەرى بىرىگىپ،  قازاقستانداعى رۋمىن-مولدوۆان اسسوتسياتسياسىن قۇردى. بۇل ەكى حالىقتىڭ بىرىگۋىنە ولاردىڭ ءتىلىنىڭ، ءدىنى مەن مادەنيەتىنىڭ، ەتنيكالىق نەگىزىنىڭ ورتاقتىعى سەبەپشى بولعان-دى. سونىمەن بىرگە، ولاردى وسى مادەني قۇندىلىقتاردى، سالت-ءداستۇرىن ساقتاۋ قاجەتتىلىگى بىرىكتىردى.

اسسوتسياتسيانىڭ اشىلۋ سالتاناتىنا وراي رۋمىنيادان ونەر ۇجىمدارى شاقىرىلدى. اسسوتسياتسيا جۇمىسىنىڭ العاشقى جەمىسى - بالالار ۇلتتىق بي ءانسامبلىنىڭ قۇرىلۋى بولاتىن.

قازاقستانداعى رۋمىن-مولدوۆان اسسوتسياتسياسى ەلىمىزدەگى مادەني شارالاردىڭ بارلىعىنا دەرلىك بەلسەنە اتسالىسادى. سونداي-اق، اسسوتسياتسيا شەڭبەرىندە ءداستۇرلى "مەرتسيشور" كوكتەم مەرەكەسىن، پراۆوسلاۆتىق پاسحا مەيرامىن اتاپ وتەدى جانە اسسوتسياتسيا مۇشەلەرىنىڭ شىعارماشىلىعى تۋرالى كورمەلەر ۇيىمداستىرىلىپ وتىرادى. اسسوتسياتسيانىڭ سۇرانىسى بويىنشا رۋمىنيا ۇكىمەتى جوعارى وقۋ ورىندارىندا جاستاردى وقىتۋعا ارنالعان گرانتتار ءبولدى. بۇگىنگى كۇنى ەكى بالا بۋحارەستە ءبىلىم الۋدا. اسسوتسياتسيا قىزمەتىندەگى اسا ماڭىزدى جەتىستىگى – كونتسلاگەرلەردە قازا بولعان 900 رۋمىن اسكەري تۇتقىنىنىڭ ەسىمدەرىن انىقتاپ، ءتىزىمىن جاساۋى بولدى. سونىمەن بىرگە، اسسوتسياتسيانىڭ باستاماسىمەن قاراعاندىدا ولاردىڭ قۇرمەتىنە ارنالعان ەسكەرتكىن ورناتىلدى. بۇل ەسكەرتكىشتى 2003 جىلى 9-قىركۇيەكتە رۋمىنيا پرەزيدەنتى قازاقستانعا جاساعان رەسمي ساپارى بارىسىندا اشقان ەدى.

رۋمىندار مەن مولدوۆاندار كوپ ۇلتتى قازاقستان حالقىمەن ەتەنە ارالاسىپ، تەڭ قۇقىقتى جاعدايدا ءومىر ءسۇرىپ جاتىر. ولار ۇلتتىق تۇرعىدا ەشبىر قىسىم كورىپ وتىرعان جوق جانە ءوز وتانىن ەرەكشە قۇرمەت تۇتادى.

«سترۋگۋراش» اتتى مولدوۆان مادەني ورتالىعى الماتىداعى مولدوۆان دياسپوراسىن بىرىكتىرۋ ماقساتىندا 2006 جىلى 1 ناۋرىزدا اشىلدى. قۇرىلعانىنا ەكى جارىم جىل عانا وتسە دە، قازاقستاننىڭ بارلىق ايماقتارىندا تۇراتىن مولدوۆانداردى بىرىكتىرۋشى ورتالىققا اينالىپ ۇلگەردى. مۇندا مولداۆان دياسپوراسىنىڭ وكىلدەرى ءتۇرلى ماسەلەلەر بويىنشا كەڭەس الۋعا، مادەني-رۋحاني كومەك الۋعا دەگەن وتىنىشتەرىمەن كەلىپ جاتادى.

2005 جىلى 27 تامىزدا مادەني ورتالىق مولدوۆانىڭ تاۋەلسىزدىگى كۇنىن اتاپ وتسە، سول جىلى قىركۇيەكتە الماتىداعى قارتتار ۇيىندە قايىرىمدىلىق شاراسىن ۇيىمداستىردى. بۇل شارادا مادەني ورتالىق وكىلدەرى اعا بۋىن وكىلدەرىمەن سۇحباتتاسىپ، ولارعا كونتسەرتتىك باعدارلاما مەن سىيلىقتارىن ۇسىندى. 2005 جىلى قاراشادا مولدوۆان مادەني ورتالىعىنىڭ جەتەكشىلەرى “لۋچشيە پروگراممى سودرۋجەستۆا” اتتى ءى حالىقارالىق تەلەبايقاۋىنىڭ جۋرناليستەرىمەن كەزدەسۋ وتكىزدى. سونداي-اق، ورتالىق روجدەستۆو مەيرامىن اتاپ ءوتىپ، ايگىلى مولدوۆان اقىنى يون كريانگەنى ەسكە الۋ كەشىن ۇيىمداستىردى. مادەني ورتالىق تاراپىنان جەڭىس كۇنىنە وراي ۇلى وتان سوعىسى ارداگەرلەرىنە ءاردايىم قۇرمەت كورسەتىلىپ وتىرادى.

سوڭعى جاڭالىقتار