2 قىركۇيەك, 13:39 312 0 ءبىلىم ءTúrkىstan International Political Weekly

«ارىستاندا» العاشقى قوڭىراۋ سوعىلدى

«ارىستان» مامانداندىرىلعان ليتسەيىندە ءداستۇرلى العاشقى قوڭىراۋ 2019 جىلى 2 قىركۇيەكتە ليتسەي الاڭىندا سوعىلدى. العاشقى قوڭىراۋ ءۇنى ۇلكەن ۇمىتپەن كەلگەن جاس جۇرەكتەردى ءبىلىم شۇعىلاسىنا بولەپ، التىن ۇيالارىمەن قاۋىشتىردى، ساعىنىش سەزىمىنە بولەدى.

ليتسەي – زاماناۋي ءبىلىم بەرۋ كەشەنى. ول 2011 جىلى «نۇرسۇلتان نازارباەۆتىڭ ءبىلىم بەرۋ قورى» قوعامدىق قورىنىڭ اياسىندا قۇرىلعان. الماتى وبلىسى، تالعار اۋدانىنىڭ تابيعاتى اسەم بەسقاينار اۋىلىنىڭ ايماعىندا ورنالاسقان. قازاقستاننىڭ بارلىق وڭىرىنەن كەلگەن 9-11 سىنىپتا وقيتىن 240 جاسوسپىرىمدەر مۇندا قايىرىمدىلىق نەگىزىندە ءبىلىم الادى. الدىڭعى ءبىتىرۋشى تۇلەكتەرىمىز قازاقستاندىق جانە شەتەلدىك اسكەري وقۋ ورىندارىندا ءوز بىلىمدەرىن ابىرويمەن جالعاستىرۋدا.

ليتسەيدىڭ نەگىزگى ماقساتى – جاسوسپىرىمدەردى جوعارى دەڭگەيلى بىلىممەن قامتاماسىز ەتۋ، ولاردىڭ بويىندا ەرلىك، قاجىر-قايرات، توزىمدىلىك، جوعارى مادەنيەت، ازاماتتىق بورىش پەن جاڭا قازاقستاندىق ءپاتريوتيزمدى قالىپتاستىرۋ. ليتسەي تۇلەكتەرى ەگەمەندى قازاقستان رەسپۋبليكاسىنىڭ قورعانىس كۇشتەرىنىڭ ءتۇرلى قۇرىلىمدارىندا قىزمەتتەرىن ادال ورىنداۋعا، قۇقىقتىق جانە ازاماتتىق مىندەتتەرىن ابىرويمەن اتقارۋعا ءتيىس.

ليتسەيدىڭ وقۋ-ماتەريالدىق بازاسى كومپيۋتەرمەن، ينتەربەلسەندى تاقتالارمەن جابدىقتالعان. ليتسەي كەشەنى زاماناۋي سىنىپتار مەن لابوراتوريالىق كەشەندەردى، مۇعالىمدەرگە ارنالعان تۇرعىن ۇيلەردى، ليتسەيستەردىڭ جاتىن ورنىن، باسسەين، سپورتتىق جاتتىعۋ كەشەندەرىن، لينگافوندىق كابينەتتەردى، مەدياتەكالاردى، مۋلتيمەديالىق شولۋ ورتالىعى جانە 25 مىڭنان استام عىلىمي جانە كوركەم ادەبيەتتەردەن تۇراتىن كىتاپ قورى بار كىتاپحانانى قامتيدى.

قر پرەزيدەنتى ن.ءا.نازارباەۆ 2013 جىلى ءساۋىر ايىنداعى كەلگەن ساپارىندا «ارىستان» ليتسەيىنە جوعارى باعا بەرىپ، بۇل قايىرىمدىلىق جوباسى جەكە كاپيتالدىڭ جاستارعا مەملەكەتتىك-جەكە مەنشىكتىك مەحانيزم سەرىكتەستىگى ارقىلى قولجەتىمدى، ساپالى ءبىلىم بەرۋدەگى جارقىن كورىنىسى بولىپ تابىلاتىن ايتىپ ءوتتى.

«...سەمسەرى بول، وتاننىڭ قىنابىندا، سەرتكە ۇستاسا، سەلت ەتپەي جالتىلداعان»، – دەپ اقىن مۇقاعاليدىڭ ولەڭدەرىندە ايتىلعانداي، ساپتا تۇرعان جاس ورەندەردىڭ كوزىنەن وتتى ۇشقىن جارقىلدايدى. جيىن قازاقستان رەسپۋبليكاسىنىڭ مەملەكەتتىك ءانۇرانى ورىندالىپ، ليتسەي باسشىسى پەداگوگيكا عىلىمدارىنىڭ دوكتورى، زاپاستاعى گەنەرال-مايور تاۋلانوۆ ءسابيت ساۋمەنۇلىنىڭ قۇتتىقتاۋ سوزىمەن اشىلدى.

ليتسەيستەردى ءبىلىم كۇنىمەن زاپاستاعى گەنەرال-مايور، قازاقستان قك باس شتابىنىڭ بۇرىنعى ورىنباسارى، قۇرمەتتى ارداگەر ۆ.ۆ.تۋزيكوۆ، اتا-انالار كوميتەتىنىڭ باستىعى ج.ن.دانيبەكوۆا، ليتسەي سىنىپ جەتەكشىلەرى بىرلەستىگىنىڭ باسشىسى ق.ت.توعىزباەۆ مىرزالار قۇتتىقتاپ، وقۋدا ساتتىلىكتەر مەن تابىس تىلەدى.

سالتاناتتى ساپتىق تۇزىلىستە ليتسەيستەردىڭ ەرەكشە جەتىستىكتەرى اتالىپ ءوتىلدى. «ۇزدىك روتا»، «ۇزدىك ۆزۆود» اۋىسپالى ماراپاتتارى تاپسىرىلىپ، ليتسەيدىڭ وقۋ-تاربيە ىسىنە بەلسەنە ارالاسقان ۇستازدار ساليموۆا نەسيپگۋل تولەگەنقىزى، شامگانوۆا تازاگۋل سايانوۆنا، ماموشكينا مارينا يۆانوۆنا، گايبۋللاەۆا قۇندىز گايبۋللاەۆنا وبلىستىق ءبىلىم بەرۋ باسقارماسىنىڭ قۇرمەت گراموتاسىمەن ماراپاتتالدى.

كەز كەلگەن مەرەكەنىڭ كوركى – ءان مەن كۇي. ليتسەي الاڭىندا كەلگەن قۇرمەتتى قوناقتار مەن اتا-انالاردىڭ، ليتسەيستەردىڭ قۇرمەتىنە ليتسەي حور توبىنىڭ ورىنداۋىنداعى «كوك تۋدىڭ جەلبىرەگەنى» جانە «ليتسەي ءانى»، 9-سىنىپتاردىڭ فلەشموبى كوڭىلدەردى كوككە شارىقتاتتى. بۇعان قوسا قازاق ءتىلى مەن ادەبيەتى پاندەرىنىڭ مۇعالىمى گۋلداريا اجيكۋلوۆنا شورانوۆا مەن 10 – سىنىپ ليتسەيسى ازاماتۇلى بايمىرزانىڭ ورىنداۋىنداعى «ۇستازىم مەنىڭ» ءانى بارشا قاۋىمدى ءدان ريزا قىلدى.

مەرەكەنىڭ جالعاسى «ارىستان» مامانداندىرىلعان ليتسەي وقۋشىلارىنىڭ تولىق قۇرامى سالتاناتتى شەرۋىنە ۇلاستى. بۇل ءراسىم ءار ليتسەيستىڭ جۇرەگىنە ماقتانىش سەزىمىن ۇيالاتادى.

وسىلايشا العاشقى قوڭىراۋ ءۇنى الاتاۋدىڭ بوكتەرىن ءان مەن كۇيگە بولەپ، «ارىستان» شاكىرتتەرىن ءبىلىم نارىمەن سۋسىنداۋعا شاقىرىپ، ولارعا شابىت پەن قۋانىش كۇيىن سىيلادى.

سىڭعىرلا، العاشقى قوڭىراۋ! ساناعا ءبىلىم قۇيىلسىن، سانالى ۇرپاق جادىنا وتانشىل رۋح پەن ءتالىمدى تاربيە ءنارى ءتۇيىلسىن! جاستار جىلىندا وقۋشىلارىمىزدىڭ جەتىستىكتەرى كوپ بولىپ، مەرەيلەرى ۇستەم ءتۇسسىن! جىل بويى شاكىرتتەر وقۋعا بۇگىنگىدەي سەرگەك تە سەزىمتال شابىتپەن كىرىسسىن! سىڭعىرلا، قوڭىراۋ!

ۋمەردجانوۆا ج.ت.

سوڭعى جاڭالىقتار