29 تامىز, 11:12 538 0 نۇر وتان اسەل انۋاربەك

جالپىۇلتتىق ديالوگتىڭ جاڭا دەڭگەيى

اپتا باسىندا نۇر-سۇلتان قالاسىندا دەموكراتيالىق كۇشتەردىڭ «قازاقستان – 2050» جالپىۇلتتىق كواليتسياسىنىڭ سوڭعى وتىرىسى ءوتتى. وسى جيىندا «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك كواليتسيا جۇمىسىن توقتاتۋ تۋرالى ۇسىنىس جاسادى.

ال كواليتسيا شەڭبەرىندە باستالعان قوعامدىق پىكىرتالاس قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ الاڭىندا جالعاسپاق.  «ۇلتتىق قوعامدىق سەنىم كەڭەسى – بۇل ەل دامۋىنىڭ ماڭىزدى ساياسي ماسەلەلەرى بويىنشا جالپىۇلتتىق ديالوگتىڭ جاڭا دەڭگەيى. بۇل كەڭەستىڭ مارتەبەسى مەن ماڭىزدىلىعى پرەزيدەنت قاسىم-جومارت كەمەلۇلى توقاەۆتىڭ توراعالىق ەتۋىمەن راستالادى. سونىمەن قاتار، كەڭەس قۇرامىنا پارتيالار مەن ۇەۇ  وكىلدەرى، قوعام قايراتكەرلەرى، ساراپشىلار كىردى. «Nur Otan» پارتياسى وسى  كەڭەستىڭ جۇمىسىنا بەلسەنە قاتىسادى. بيۋرو مەن ساياسي كەڭەستەگى  تالقىلاۋدان كەيىن ءبىزدىڭ پارتيادان بىرقاتار ماسەلەلەر ەنگىزىلدى. ءارى قاراي  ءبىز ءوز ۇسىنىستارىمىزدى ازىرلەپ، ەنگىزەتىن بولامىز. كواليتسيانىڭ بارلىق  مۇشەلەرىن قازاقستاننىڭ ودان ءارى دامۋى ءۇشىن جالپىۇلتتىق ديالوگتى  دامىتۋعا ۇلەس قوسۋعا شاقىرامىز»، – دەدى باۋىرجان بايبەك.

پارتيا توراعاسىنىڭ ءبىرىنشى ورىنباسارى ءوز سوزىندە جالپىۇلتتىق كواليتسيانىڭ 8 جىل ىشىندە تابىستى جۇمىس اتقارعانىن اتاپ ءوتتى. تاجىريبەلىك قادامداردىڭ ءبىرى – وتكەن جىلى سايلاۋ تۋرالى جاڭا زاڭنىڭ قابىلدانۋى. بارلىق دەڭگەيدەگى الداعى ءماسليحات سايلاۋلارى پارتيالىق ءتىزىم بويىنشا وتكىزىلەتىن بولادى. ناتيجەسىندە ساياسي پارتيالاردىڭ ءرولى ارتا تۇسپەكشى. بۇل دەموكراتيا يندەكسى بويىنشا بارىنشا دامىعان 30 ەلدىڭ جانە باتىس ەۋروپانىڭ باسىم ەلدەرىنىڭ ۇزدىك تاجىريبەسى. «بۇگىن وسى جەردە 5 پارتيانىڭ، سونىڭ ىشىندە، 3 پارلامەنتتىك پارتيانىڭ وكىلدەرى وتىر. سايلاۋ تۋرالى جاڭا زاڭ پارتيادان جاۋاپكەرشىلىكتى ارتتىرۋ جانە سايلاۋشىلارمەن پراكتيكالىق جۇمىستى كۇشەيتۋدى تالاپ ەتەدى. وسى شارتپەن بارلىق پارتيالارعا وعان بەلسەندى دايىندالۋ قاجەت.  «Nur Otan» سايكەس دايىندىقتى باستادى. «Nur Otan» ساياسي كەڭەستىڭ سوڭعى وتىرىسىندا «سەنىم. ديالوگ. بولاشاققا نىق قادام – «Nur Otan» پارتياسىنىڭ 7 سەرپىنى» اتتى پارتيا جۇمىسىن جۇيەلى جاڭعىرتۋ باعدارلاماسى قابىلداندى»، – دەدى باۋىرجان بايبەك.

ال «Aq Jol» دەموكراتيالىق پارتياسىنىڭ توراعاسى ازات پەرۋاشەۆ دەموكراتيالىق كۇشتەردىڭ جالپىۇلتتىق كواليتسياسى پارتيانىڭ بارلىق مۇشەلەرىنە ساياسي جانە ازاماتتىق مادەنيەت مەكتەبى بولعاندىعىن اتاپ ءوتتى. «مەملەكەت قوعاممەن ديالوگقا باعىتتالعان ءوز جۇمىسىندا بارىنشا اشىقتىقتى ۇستانادى. ءبىز مۇنى قۇپتايمىز جانە ءوزارا ارەكەتتەسۋدىڭ كانالى كوپ بولعان سايىن، سوعۇرلىم جاقسى بولادى. «Nur Otan» پارتياسى وزىنە جاۋاپكەرشىلىك الىپ، ۇلكەن جۇمىس اتقاردى. ءبىز پارتيادا ۇلكەن «قايتا جانداندىرۋ» جۇمىستارىنىڭ جاقسى ءجۇرىپ جاتقانىن بايقاپ وتىرمىز. جانە وسى ىستە ارىپتەستەرىمىزگە تابىس تىلەيمىز»، – دەدى ازات پەرۋاشەۆ.

«اتامەكەن» ۇلتتىق كاسىپكەرلەر پالاتاسىنىڭ باسقارما باسشىسى ابىلاي مىرزاحمەتوۆ قوعامدا اشىق پىكىرتالاسقا دەگەن سۇرانىستىڭ ارتقانىن، قوعامداعى ازاماتتىق ينستيتۋتتاردىڭ جاڭا فورماتتا جۇمىس جاسايتىن ۋاقىتى كەلگەنىن اتاپ ءوتتى. «قازىر كۇن تارتىبىندە وسى ماسەلە تۇر.  جاقسى جاعى، قوعامنىڭ بەلسەندىلىگى ارتتى، قوعامدا اشىق پىكىرتالاسقا دەگەن سۇرانىس كۇشتى. ءبىز ۇلتتىق سەنىم كەڭەسىنىڭ قۇرىلعانىن تولىعىمەن قولدايمىز»، – دەدى ابىلاي مىرزاحمەتوۆ.

كواليتسيا جۇمىسىنىڭ سوڭىندا ءسوز العان رەسپۋبليكالىق ايەلدەر كەڭەسىنىڭ جەتەكشىسى نينا كايۋپوۆا ۇلتتىق سەنىم كەڭەسى مەملەكەت پەن حالىق اراسىنداعى ديالوگتىڭ جاڭا فورماتى ەكەندىگىنە توقتالدى. ول كواليتسيا جۇمىسىنىڭ اياقتالعانىنا قاراماستان، «Nur Otan» پارتياسىمەن ارىپتەستىكتىڭ جالعاساتىنىن تىلگە تيەك ەتتى. «ءبىزدىڭ بارلىق جۇمىسىمىز «Nur Otan» پارتياسىنىڭ قولداۋىمەن جۇزەگە اسىرىلدى جانە بۇگىن ەلباسىنىڭ ساياسي كەڭەستە سويلەگەن ءسوزىن تۇسىنە وتىرىپ، ءبىز پارتيامەن بىرگە جۇمىس ىستەۋدى جالعاستىرامىز، بارلىق ماسەلەلەردى، بولاشاعىمىز ءۇشىن، ەگەمەندى مەملەكەتىمىزدىڭ گۇلدەنۋى ءۇشىن بىرگە شەشەمىز»، – دەدى نينا كايۋپوۆا.

«Nur Otan» پارتياسى توراعاسىنىڭ ءبىرىنشى ورىنباسارى سونىمەن قاتار، ۇكىمەتتىك ەمەس ۇيىمدار تۇلعاسىنان كواليتسيا مۇشەلەرىمەن پارتيانىڭ بىرلەسكەن جۇمىسى ارىپتەستىك تۋرالى ەكىجاقتى مەموراندۋم مەن پارتيالىق جوبالار شەڭبەرىندە جالعاسىن تابادى دەپ اتاپ ءوتتى. ءوزارا ارەكەتتەستىك ءۇشىن ۇلكەن الەۋەت «ميراس»، «Nur Otan Talks» جانە «Nur Otan Trends» پارتيالىق ديالوگتىق الاڭدار شەڭبەرىندە دە بار.

 

7 سەرپىن جان-جاقتى ءسوز بولدى

«Nur Otan trends» پىكىرتالاس الاڭىندا ساراپشىلار ەلباسى ساياسي كەڭەستە ۇسىنعان 7 سەرپىن جونىندە وي قوزعاپ، جاڭعىرتۋ جۇمىستارى جايىن تالقىلادى.

پارتيا جۇمىسىن جاڭعىرتۋداعى 7 سەرپىندى «Nur Otan trends» ساراپشىلارى جان-جاقتى تالقىلادى. مودەراتور راقىم وشاقباەۆ ساياسي كەڭەستە قوزعالعان بىرقاتار ماسەلەنى العا تارتتى. پىكىرتالاسقا قاتىسقان ءماجىلىس دەپۋتاتى پاۆەل كازانتسەۆ: «پارتيانى جاڭعىرتۋعا كەلسەك، 3 نە-گىزگى قۇرىلىمدى اتاپ وتكىم كەلەدى. بىرىنشىدەن، پارتيالىق باقىلاۋدى كۇشەيتۋ كەرەك. بارلىق سالا بويىنشا باقىلاۋدى كۇشەيتسەك، پارتيا دامي تۇسەدى. ەكىنشىدەن، پارتيا ەتيكاسى ساقتالۋىن قاداعالاۋ. پارتيالاستار ءبىر-بىرىمەن، حالىقپەن مادەنيەتتى تۇردە قارىم-قاتىناس جاساۋى ءتيىس. باستىسى، پارتيانىڭ سايلاۋالدى تۇعىرنامالارىن ءساتتى ىسكە اسىرامىز. سوندا جۇمىس جۇيەلى جۇرەدى. قاعازدا جازىلعاننىڭ جۇزەگە اسقانىن كورگەندە حالىق سەنىمى قالىپتاسادى»، – دەپ اتاپ ءوتتى.

ال دەپۋتات نۇرجان التاەۆ: «ەلباسى ايتقانداي، جاڭعىرۋ بولۋ كەرەك. ويتكەنى زامان وزگەرگەن سايىن، ادامنىڭ كوڭىل كۇيى، ءومىر ءسۇرۋ قالىبى وزگەرەدى. وزگەرىستەر ورىن العاندا، ەلىمىزدەگى ەڭ ءىرى پارتيا دا شەت قالماۋى كەرەك. پارتيا جۇمىسى زامان تالابىنا سايكەس كەلسە، قۇبا-قۇپ. جۇمىستى جاڭعىرتۋ ءۇشىن مىنا اسپەكتىلەرگە نازار اۋدارعان ءجون. كەرى بايلانىستى كۇشەيتسەك وڭ بولار ەدى. ينتەرنەتتە، الەۋمەتتىك جەلىدە تۇراقتى بايلانىس ورناتۋ كەرەك. مىسالى، Facebook-ءتىڭ تىكەلەي ەفيرىندە قوعامدىق قابىلداۋ جۇرگىزگەن العاشقى دەپۋتاتتاردىڭ ءبىرىمىن. باسىندا تولاسسىز سۇراققا قالاي جاۋاپ بەرەمىن دەگەن قورقىنىش بولدى. جارتى جىل وتكەن سوڭ ناتيجەسىن كورىپ وتىرمىن. Facebook, Instagram-دا حالىق پىكىرىن تىڭداپ، سۇراعىنا جاۋاپ بەرگەن ىڭعايلى. شالعاي اۋىلدان ات ارىلتىپ كەلمەي، ۇيىندە وتىرىپ ساۋال جولداي الادى. ءارى مەنىڭ دە جۇمىسىما سەپتىگى تيەدى»، – دەدى.

ايتا كەتەيىك، «Nur Otan trends» پىكىرتالاس الاڭى وتىرىسىنا ساياساتتانۋشىلار ايدوس سارىم مەن ورازعالي سەلتەەۆ، ساياسي شولۋشى عازيز ءابىشوۆ پەن «شاتالوۆ» telegram-كانالىنىڭ اۆتورى، جۋرناليست نيكيتا شاتالوۆ قاتىسىپ، ءوز ويلارىمەن ءبولىستى.

 

بالالار قۇقىعى – پارتيا نازارىندا

«Nur Otan» پارتياسىنىڭ جانىنداعى بالا قۇقىقتارىن قورعاۋ رەسپۋبليكالىق كەڭەسى «كەدەرگىسىز كەلەشەك» جانە «باقىتتى وتباسى» جوباسى اياسىندا وڭىرلەردە تەكسەرىس جۇرگىزۋدى باستاعان بولاتىن. پارتيالىقتار رۋدنىي قالاسىنداعى سابيلەر ۇيىنە اياق استىنان تەكسەرىس جاساپ، ناتيجەسىندە ونداعى بۇلدىرشىندەردىڭ سۇمدىق جاعدايدا ءومىر ءسۇرىپ جاتقانى انىقتالدى.

پارتيا جۇرگىزگەن تەكسەرىستەن كەيىن قوستاناي وبلىسىنىڭ رۋدنىي قالاسىنداعى سابيلەر ءۇيىنىڭ ديرەكتورى قىزمەتىنەن بوساتىلدى. ال رۋدنىيداعى سابيلەر ۇيىندەگى مۇگەدەك جەتىم بالالاردىڭ كۇتىمىنە قاتىستى زاڭ بۇزۋشىلىقتاردى زەرتتەپ، تەكسەرۋ ءۇشىن وبلىستاعى دەنساۋلىق ساقتاۋ باسقارماسىنىڭ جانىنان ارنايى كوميسسيا قۇرىلدى. تەكسەرىس بارىسىندا ساراپتامالىق توپ اتاعان بۇزۋشىلىقتاردىڭ تولىقتاي تۇزەتىلگەنى انىقتالىپ،  ارنايى مەكەمەدەگى بالالار قوستانايداعى سابيلەر ۇيىنە اۋىستىرىلدى.

اتالعان ماسەلەگە بايلانىستى الەۋمەتتىك جەلىدەگى پاراقشاسىندا پىكىر بىلدىرگەن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك: «پارتيا جانىنداعى بالا قۇقىقتارىن قورعاۋ رەسپۋبليكالىق كەڭەسىنىڭ جۇمىس ساپارى ناتيجەسىندە بارلىق سابيلەر ءۇيىنىڭ جۇمىسىنا ساراپتاما جاسالىپ، بىرقاتار ماسەلەلەر انىقتالدى. ولاردى شەشۋ ءۇشىن قۇزىرەتتى مەملەكەتتىك ورگاندارعا ۇسىنىستارىمىزدى بىلدىرەمىز. قاجەت بولسا، پارلامەنت ماجىلىسىندەگى «Nur Otan» فراكتسياسىمەن بىرلەسە وتىرىپ زاڭنامالىق تۇزەتۋلەردى ازىرلەيمىز»، – دەدى.

وسى جاعدايدان كەيىن ءبىلىم، دەنساۋلىق ساقتاۋ، جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارمالارىنا جەتىم جانە اتا-اناسىنىڭ قامقورلىعىنسىز قالعان بالالارعا ارنالعان مەكەمەلەردە ءتيىستى تەكسەرىس جۇرگىزۋ تۋرالى تاپسىرما بەرىلدى.

 

ماڭىزدى ماسەلەلەر تالقىلاندى

 «Nur Otan» پارتياسى تۇركىستان وبلىستىق فيليالى 21 تامىز كۇنى ەلورداداعى ساياسي كەڭەستە قارالعان وزەكتى ماسەلەلەر مەن ونى وبلىس ايماعىندا ىسكە اسىرۋدىڭ ءتيىمدى جولدارىن تالقىلاۋ ماقساتىندا ساياسي كەڭەس ءماجىلىسىن وتكىزدى.

جيىندا «Nur Otan» پارتياسى ءتۇر­­كىستان وبلىستىق فيليالىنىڭ توراعاسى، وبلىس اكىمى ومىرزاق شوكەەۆ جاڭعىرتۋ باعدارلاماسىنا كەڭىنەن توقتالىپ، وبلىستا جۇزەگە اسىرۋ بارىسى بويىنشا جەتى تاپسىرما جۇكتەپ، باسقا دا جاۋاپتى جۇمىستاردىڭ ورىندالۋىن قاداعالايتىنىن ايتتى. ءبىرىنشى تاپسىرماسىندا ومىرزاق شوكەەۆ پارتيانىڭ بەلسەندى مۇشەلەرىن ايقىنداپ الۋدى تاپسىردى. «پارتيادا ەل دەگەندە جاناشىرلىقپەن جۇمىس ىستەيتىن، حالىققا شىن جانى اشيتىن بەلسەندىلەر ءجۇرۋى كەرەك. ارىس قالاسىنداعى جۇيە سە­كىل­دى ءار اۋداننان بەلسەندى 10 ادامنان جيناپ، پارتيا اتىنان حالىقپەن تىعىز جۇمىس ىستەيتىن وپەراتيۆتىك توپ قۇرۋدى تاپسىرامىن. بۇل توپقا زيالى قاۋىم، ەلگە ءسوزى وتەتىن ازاماتتار، ازاماتتىق قوعام، جاستاردان وكىل ەنۋى ءتيىس. ولاردىڭ ۇسىنىستارىن تىڭداپ، پارتيا اياسىندا بىرگە جۇمىس ىستەۋىمىز قاجەت. پرايمەريز (پارتيا ىشىندەگى داۋىس بەرۋ) ءادىسىن قولدانا وتى­رىپ، ولاردىڭ اراسىنان ەڭ ءۇز­دىگىن تاڭداپ پارتيا مۇشەسىنە قابىلداي­مىز»، – دەدى وبلىس اكىمى.

سونداي-اق،  پارتيا ازاماتتاردىڭ وزەكتى ماسەلەلەرىن شەشۋگە، ولاردىڭ الەۋمەتتىك جاعدايىن تۇزەۋگە كومەك كورسەتۋى ءتيىس دەپ ەسەپتەيتىنىن جەت­كىزدى. مىسالى، حالقى تىعىز قونىستانعان وڭتۇستىك وڭىردەن سولتۇستىككە كوشىرۋ بويىنشا «ەڭبەك» باعدارلاماسىن «Nur Otan» پارتياسىنىڭ تۇركىستان وبلىستىق فيليالى وڭىنان ناسيحاتتاۋدا. سونىمەن قاتار اۋدانداردا قوعامدىق قابىلداۋ ءوت­كىزىپ، ونى الەۋمەتتىك جەلىلەردە تىكەلەي ەفير ارقىلى كورسەتۋدى تاپسىردى.

جيىندا سونداي-اق وبلىستىق پارتيا فيليالى توراعاسىنىڭ ءبىرىن­شى ورىنباسارى بەيسەن تاجىباەۆ سوڭعى جىلدارى وبلىس كولەمىندە بالالار اراسىنداعى قىلمىس، الىمجەتتىك، بالا قۇقىعىنىڭ اياقاستى بولۋى كۇرت ارتىپ كەتۋىنە بايلانىستى وتباسى ينستيتۋتىن قولداۋعا باعىتتالعان «باقىتتى وتباسى» جوباسى اياسىندا وبلىس بويىنشا ومىرلىك قيىن جاع-دايداعى كوپبالالى وتباسىلارعا مو­ني­تورينگ جۇرگىزىلىپ جاتقانىن جەتكىزدى.

ايتا كەتەيىك، «Nur Otan» پارتياسى­نىڭ تۇركىستان وبلىستىق فيليالىندا دەپۋتاتتىق  فراكتسيا جەتەك­شى­سى مەن پارتيالىق باقىلاۋ كوميسسيانىڭ توراعاسى اۋىستى.  تۇركىستان وبلىستىق ماسليحاتتاعى «Nur Otan» پارتياسى فراكتسياسىنىڭ جەتەكشىسى بولىپ مۇرات تولتەباەۆ، ال ايماقتىق پارتيالىق باقىلاۋ كوميسسيانىڭ توراعاسى قىزمەتىنە قاينار اباسوۆ تاعايىندالدى.

سوڭعى جاڭالىقتار