26 تامىز, 18:24 327 0 جاڭالىقتار Túrkistan Gazeti

قازاقستاندىق ايەلدىڭ بالاسى رەسەيلىك اكەسىنەن قايتارىلدى

قازاقستاندىق ايەلدىڭ بالاسى كالينينگراد قالاسىنداعى اكەسىنەن قايتارىلدى، دەپ حابارلايدى قازاقپارات ءتىلشىسى.

بۇل تۋرالى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ اپتالىق بريفينگتە مالىمدەدى. «وتكەن جىلى قر ازاماتى دانا امەەۆا ءوز ۇلىن رف كالينينگراد قالاسىنداعى اكەسىنەن قايتارا الماپ ەدى. وسى دەمالىس كۇندەرى ءبىزدىڭ ديپلوماتتاردىڭ كومەگىمەن اتا-انالار كەلىسىمگە كەلدى. قازىر بالا اناسىنىڭ قاسىندا الماتىدا. ولار كەشە ۇشىپ كەلدى. ءبىزدىڭ سانكت-پەتەربۋرگتەگى كونسۋلىمىز كالينينگراد قالاسىنا جەكە ءوزى الىپ باردى جانە بالانىڭ اناسىنا تاپسىرىلۋىن قاداعالادى»، - دەدى ايبەك سمادياروۆ. ەسكە سالا كەتسەك، وتكەن جىلى قازاقستاندىق ايەل دانا امەەۆا بالاسىن قايتارۋ بويىنشا قر سىرتقى ىستەر مينيسترلىگىنەن كومەك سۇراعان ەدى. كەزىندە ول رەسەي ازاماتىنا تۇرمىسقا شىعىپ، كالينينگراد قالاسىنا كوشكەن. وتباسىلىق سەبەپتەرمەن ەكى جىلدان كەيىن اجىراسقان جانە كالينينگراد قالاسىنىڭ سوتى بالانى اناسىمەن قالدىرۋ تۋرالى شەشىم شىعارعان. الايدا، بالانىڭ اكەسى سوت شەشىمىن ورىنداماي، بەلارۋس پەن وزگە دە ەۋروپا قالالارى ارقىلى ءسابيدى الىپ كەتكەن.

سوڭعى جاڭالىقتار