26 تامىز 2019, 16:45 588 0 پوەزيا ءTúrkىstan International Political Weekly

ۇزدىك اقىنداردىڭ كىتابى انتولوگياعا اينالدى

ەلوردادا «قازاق پوەزياسىنىڭ ءىنجۋ-مارجاندارى» انتولوگياسى بويىنشا ون ءۇش كىتاپتىڭ تۇساۋكەسەرى ءوتتى. 

انتولوگيا ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى اياسىندا قازاقستان پرەزيدەنتى قاسىم-جومارت توقاەۆتىڭ تىكەلەي قولداۋىمەن جارىققا شىعىپ وتىر.

مەملەكەت باسشىسى وسى توپتاماعا ەنگىزىلگەن ءار اقىننىڭ كىتابىنا جازعان العى سوزىندە «رۋحاني جاڭعىرۋ» تاريحي مۇرالارىمىزدى تۇگەندەپ، جاۋھار پوەزيامىزدى ۇرپاقتىڭ يگىلىگىنە اينالدىرۋ كەرەكتىگىن باسا ايتىپ وتكەن.

«مەملەكەت باسشىسى كوركەم ادەبيەتىمىزدىڭ دامۋىنا ءاردايىم قولداۋ كورسەتىپ، بارلىق مۇمكىندىكتى جاساپ وتىرعانىن بىلەسىزدەر. وسى 13 تومدىقتىڭ ءاربىرى كىرىسپەسىندە جەكە-جەكە توقتالىپ، ءوزىنىڭ العى ءسوزىن قالدىرىپ وتىر. جۇرەكتە بۋىرقانعان ۇلتتىق رۋحتى، تىڭ سەرپىن بەرەتىن اقىندارىمىزدىڭ جالىندى جىرلارىنىڭ توپتاماسى قۇتتى بولسىن دەيمىز. وقىرمان قاۋىمنىڭ «جالعاسىن تابا ما؟» دەگەن كوكەيىندە ساۋالى بارىن بىلەمىز. پرەزيدەنت قاسىم-جومارت كەمەلۇلى العى سوزدەرىنىڭ بىرىندە «الداعى ۋاقىتتا وسى توپتاما جالعاسىن تاۋىپ، كورنەكتى اقىندارىمىزدىڭ شىعارمالارىن جارىققا شىعارا بەرەمىز دەگەن سەنىمدەمىن» دەپ اتاپ وتكەن. جوعارىداعى سۇراقتىڭ جاۋابى وسى دەپ ويلايمىن»، - دەدى ۇلتتىق كىتاپحانادا وتكەن تۇساۋكەسەردە مودەراتور بولعان پرەزيدەنتتىڭ ءباسپاسوز حاتشىسى بەرىك ءۋالي.

اتالعان توپتاماعا 13 اقىننىڭ تۋىندىسى ەنگىزىلگەن. ناقتىراق ايتقاندا، «قازاق پوەزياسىنىڭ ءىنجۋ-مارجاندارى» انتولوگياسىنان اباي، شاكارىم، ماعجان جۇماباەۆ، قاسىم امانجولوۆ، جۇبان مولداعاليەۆ، جۇمەكەن ناجىمەدەنوۆ، تۇمانباي مولداعاليەۆ، قادىر مىرزا ءالى، مۇقاعالي ماقاتاەۆ، فاريزا وڭعارسىنوۆا، ولجاس سۇلەيمەنوۆ پەن مۇحتار شاحانوۆتىڭ ولەڭدەرىن وقي الاسىزدار.

«ەلباسىنىڭ «رۋحاني جاڭعىرۋ» باعدارلاماسى اياسىندا مادەنيەتىمىزگە، ادەبيەتىمىزگە قاتىستى يگى ىستەردىڭ اتقارىلىپ جاتقانىن وزدەرىڭىز بىلەسىزدەر. سول باعدارلامانىڭ اياسىندا ءبىز بيىل ازيا جازۋشىلارىنىڭ ءبىرىنشى فورۋمىن وتكىزەيىك دەپ وتىرمىز. ونىڭ كۇندەرى جاقىنداپ كەلە جاتىر. بۇل كىتاپتار سونىڭ قارساڭىندا جارىققا شىقتى. سول فورۋمعا قاتىساتىن قالامگەرلەرگە وسى كىتاپتار تارتۋ ەتىلەدى. مەملەكەت باسشىسىنىڭ جانە ودان بەرگى مينيسترلىكتەر، مەملەكەتتىك حاتشى – بارلىقتارىنىڭ ادەبيەتكە دەگەن وڭ كوزقاراسى قالىپتاسا باستاعانىن، سونىڭ كورىنىسى ءبىر كورىنىسى ەكەنىن ەرەكشە اتاپ وتكىم كەلىپ وتىر. جازۋشىلار وداعىنا كوپتەن بەرى جاسالماعان جوندەۋ جاسالعالى وتىر. قوماقتى قاراجات ءبولىندى. ۇسىنعان جوبالارىمىز ماقۇلدانۋدا. وسىنىڭ ءبارى ادەبيەتكە كوڭىل ءبولىنىپ جاتىر دەپ ەسەپتەيمىز»، - دەدى تۇساۋكەسەر بارىسىندا قازاقستان جازۋشىلارى وداعىنىڭ توراعاسى ۇلىقبەك ەسداۋلەت.

«قازاق پوەزياسىنىڭ ءىنجۋ-مارجاندارى» انتولوگياسى قازاقستان جازۋشىلارى وداعىنىڭ توراعاسى، اقىن ۇلىقبەك ەسداۋلەتتىڭ، مەملەكەتتىك سىيلىقتىڭ يەگەرى الىبەك اسقاروۆتىڭ، «فوليانت» باسپاسىنىڭ ديرەكتورى نۇرلان يسابەكوۆتىڭ قولداۋىمەن وقىرمانعا جول تارتىپ وتىر. ءاربىر كىتاپ 1 مىڭ دانامەن شىقتى. ءوز كەزەگىندە ولەڭدەرى اتالمىش توپتاماعا ەنگىزىلگەن مۇحتار شاحانوۆ ءسوز سويلەپ، قازاقستان جازۋشىلار وداعى تاراپىنان جاڭا يدەيالار جۇزەگە اسىپ جاتقانىن ايتىپ ءوتتى.

«ەلدىك، شىندىق بيىگىندە باس قوسا بەرەيىك»، - دەدى مۇحتار شاحانوۆ.

 

سوڭعى جاڭالىقتار