22 تامىز, 19:21 316 0 جاڭالىقتار Túrkistan Gazeti

ماگيستراتۋرا تەستىندە 25 ۇمىتكەر ءوز ورنىنا باسقا بىرەۋدى كىرگىزبەك بولعان

ۇلتتىق تەستىلەۋ ورتالىعىنىڭ ديرەكتورى مىندەتىن اتقارۋشى ديدار سماعۇلوۆ وسى جىلدىڭ 10-15 تامىزى ارالىعىندا ماگيستراتۋراعا ءتۇسۋ ءۇشىن وتكىزىلگەن كەشەندى تەستىلەۋدىڭ قورىتىندىسىن جاريالادى دەپ حابارلايدى قازاقپارات ءتىلشىسى.

«وسى جىلى ماگيستراتۋراعا ءتۇسۋ پروتسەسى ايتارلىقتاي وزگەرىستەرمەن تولىقتى. بىرىنشىدەن، جاڭا فورمات ەنگىزىلدى. وسى جىلعا دەيىن تەك شەت ءتىلى بويىنشا تەستىلەۋ تاپسىرىپ، ەكىنشى كەزەڭدە جوو كافەدرالارىندا بەيىنى بويىنشا بىردەي قاعيداتتارعا نەگىزدەلمەگەن ەستيحان تاپسىراتىن. بۇل ءوز كەزەڭىندە جۇرتشىلىق، قۇقىققورعاۋ ورگاندارى تاراپىنان جەمقورلىق تاۋەكەلدەردىڭ بولۋىنا قاتىستى سىنعا ۇشىرايتىن. بيىل ەمتيحان بارلىق ۇمىتكەرلەر ءۇشىن ستاندارتتى تۇردە كەشەندى تەستىلەۋ فورماتىندا ءوتتى. وسىلايشا، بارلىق تالاپكەرلەرگە بىردەي سۇراقتاردىڭ بەرىلۋىنە كەپىلدىك بەرىپ، بىرەۋدى ارتىق كورۋ مۇمكىندىگىن جوققا شىعاردىق. ەكىنشىدەن، مينيستر اسحات ايماعامبەتوۆتىڭ بۇيرىعىمەن العاش رەت تەستىلەۋ وتكىزۋ ەرەجەلەرىن قامتاماسىز ەتۋ ءۇشىن سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى مەن ارنايى مونيتورينگتىك توپتاردىڭ وكىلدەرى، سونداي-اق باق وكىلدەرى، بەلسەندى ازاماتتار باقىلاۋشى رەتىندە تارتىلدى»، - دەدى ديدار سماعۇلوۆ بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

ونىڭ ايتۋىنا قاراعاندا، تەست تاپسىرۋ پروتسەسى بارلىق 27 پۋنكتتە اشىق جانە شىنايى وتكىزىلگەن.

«بۇل ناتيجەسىن بەردى. كەشەندى تەستىلەۋگە قاتىسۋ ءۇشىن 30 579 ءوتىنىش قابىلداندى. الايدا، تەستىلەۋگە 28 131 ادام قاتىستى. 2500 جۋىق ۇمىتكەر تەست تاپسىرۋعا كەلمەدى. ءبىز مۇنى كۇشەيتىلگەن باقىلاۋ جۇمىسىمەن بايلانىستىرامىز. دەمەك، كوپتەگەن ادام كوشىرۋدىڭ مۇمكىن ەمەس ەكەنىن تۇسىنگەن. سونىمەن قاتار، 1 مىڭنان استام ۇمىتكەر ەمتيحان كەزىندە كوشىرىپ، تىيىم سالىنعان زاتتاردى پايدالانۋعا تىرىسقان. وسىلايشا، 1021 ناتيجە جويىلدى. بۇل تالاپكەرلەر ءتىپتى اقىلى نەگىزدە وقۋعا تۇسە المايدى»، - دەدى ديدار سماعۇلوۆ.

ورتالىق باسشىسى اتاپ وتكەندەي، ەمتيحان كەزىندە بوگدە ادامدار دا انىقتالعان. 25 ادام ءوزىنىڭ ورنىنا باسقا ادامدى ەمتيحانعا كىرگىزۋگە تىرىسقان.

«ءاربىر فاكتى بويىنشا اقپارات ءىىم-گە جولداندى. الەۋمەتتىك جەلىلەردە الاياقتىققا جول بەرگەن وسىنداي ازاماتتاردىڭ ءبىرى ىشكى ىستەر مينيسترلىگىنىڭ اكادەمياسىنىڭ ءمورىن قولدان جاساعان اقتوبە وبلىسىنىڭ پوليتسيا قىزمەتكەرى ەكەنى جازىلدى. بۇل فاكتى بويىنشا دا ءبىز قۇقىققورعاۋ ورگاندارىنا ءتيىستى شارا قولدانۋ ءۇشىن جۇگىندىك. جالپى، 21 مىڭنان استام اسا تىيىم سالىنعان زاتتار تاركىلەندى. ارينە، ەمتيحان تاپسىرۋشىلاردىڭ كوبى ول زاتتاردى ءوز ەركىمەن تاپسىردى»، - دەدى ول.

ديدار سماعۇلوۆ ءوز سوزىندە اتاپ وتكەندەي، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ەمتيحان كەزىندە ءبىر بويجەتكەن تەكسەرۋشىلەردى الداماق بولىپ، تەكسەرۋدەن ءتورت رەت وتكەن. اقىرى، ول شپارگالكا پايدالانعانى ءۇشىن اۋديتوريادان شىعارىلعان. «شىن مانىندە، بارلىعى سونشالىقتى جامان ەمەس. 12853 ۇمىتكەر مەملەكەتتىك ءبىلىم بەرۋ گرانتىنا قاتىسۋعا مۇمكىندىك الدى. ءبىز بۇل ۇمىتكەرلەردىڭ تىيىم سالىنعان زاتتاردى پايدالانباعانىنا، ۇلكەن دايىندىقپەن ءوز بىلىمدەرىنە سەنىپ كەلگەنىنە سەنىمدىمىز. بۇل – مەملەكەت ەسەبىنەن تەگىن ءبىلىم الۋعا لايىقتى پاراساتتى جاندار. ولاردىڭ كوبى سول گرانتتاردى الادى. ويتكەنى، بارلىق گرانتتار سانى سانى - 12809»، - دەدى ديدار سماعۇلوۆ.

سوڭعى جاڭالىقتار