22 تامىز, 19:13 328 0 جاڭالىقتار Túrkistan Gazeti

مارات ءتاجين «رۋحاني جاڭعىرۋ» جونىندەگى ۇلتتىق كوميسسيانىڭ وتىرىسىن وتكىزدى

اقوردادا قازاقستان رەسپۋبليكاسىنىڭ مەملەكەتتىك حاتشىسى مارات ءتاجيننىڭ توراعالىعىمەن «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى ءوتتى. بۇل تۋرالى قازاقپارات ءتىلشىسى حابارلادى.

وندا باعدارلامانى ىسكە اسىرۋدىڭ ەكى جارىم جىل ىشىندەگى قورىتىندىلارى قارالدى جانە الداعى كەزەڭنىڭ مىندەتتەرى تالقىلاندى.

وتىرىستى اشقان مەملەكەتتىك حاتشى مارات ءتاجين باعدارلامانىڭ بارلىق باعىتتارى بويىنشا اۋقىمدى جۇمىس جۇرگىزىلگەنىن اتاپ ءوتتى.

قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى ۇكىمەتتىڭ كەزەڭدىك ءىس-شارالار جوسپارىنا سايكەس جالعاسۋدا. ورفوگرافيالىق، ادىستەمەلىك، تەرمينولوگيالىق جانە اقپاراتتىق جۇمىس جونىندەگى 4 توپ جۇمىس ىستەيدى.

«جاڭا گۋمانيتارلىق ءبىلىم» جوباسى بويىنشا   Cambridge University Press, Oxford University Press جانە باسقا دا ءىرى حالىقارالىق باسپالارمەن ىنتىماقتاسا وتىرىپ، فيلوسوفيا، ساياساتتانۋ، دۇنيەجۇزىلىك تاريح، ەكونوميكا، ادەبيەت تەورياسى، حالىقارالىق قۇقىق، وريەنتاليستيكا، پەداگوگيكا جانە باسقا دا عىلىمدار بويىنشا 48 وقۋلىق قازاق تىلىنە اۋدارىلىپ، شىعارىلدى. بۇل جۇمىسقا جوعارى وقۋ ورىندارىنىڭ بىلىكتى وقىتۋشىلارىنان، رەداكتورلاردان، اۋدارماشىلار مەن لينگۆيستتەردەن قۇرالعان 300-دەن استام مامان قاتىستى. وقۋلىقتار ەلىمىزدىڭ 113 جوعارى وقۋ ورىنىنا جەتكىزىلدى جانە وقىتۋشىلار مەن ستۋدەنتتەردىڭ جوعارى باعاسىنا يە بولۋدا. ولاردىڭ ەلەكتروندىق نۇسقالارى ەركىن وقۋ ءۇشىن «قازاقستاننىڭ اشىق ۋنيۆەرسيتەتى» پورتالىندا ورنالاستىرىلدى.

«تۋعان جەر» جوباسى  بويىنشا 10 مىڭنان اسا مەتسەناتتىڭ قاتىسۋىمەن  1800 مادەنيەت، ءبىلىم، سپورت نىسانى جاڭادان سالىنىپ، 1,5 مىڭ نىسان قايتا قالىپقا كەلتىرىلدى.

«جاھاندىق الەمدەگى زاماناۋي قازاقستاندىق مادەنيەت» جوباسى بويىنشا تاريحىمىزدا تۇڭعىش رەت قازاقستاندىق پوەزيا مەن پروزا انتولوگياسى بۇۇ-نىڭ 6 تىلىنە اۋدارىلىپ، جارىققا شىعارىلدى، ونىڭ حالىقارالىق تانىستىرىلىمى قىركۇيەك ايىندا باستالادى.

«قازاقستاننىڭ كيەلى گەوگرافياسى» جوباسى بويىنشا 28 تاريحي نىسان قايتا قالىپقا كەلتىرىلىپ، اۋقىمدى عىلىمي-زەرتتەۋ جۇمىسى جۇرگىزىلدى. «وتىرار» جانە «تامعالى» ۆيزيت ورتالىقتارىنىڭ قۇرىلىسى اياقتالۋدا. تاريحي-مادەني مۇرا نىساندارىن قورعاۋ جانە پايدالانۋ تۋرالى زاڭنامالار جەتىلدىرىلۋدە. BBC World News, «Euronews» تەلەارنالارىمەن ىنتىماقتاستىقتا قازاقستاننىڭ كيەلى نىساندارى تۋرالى دەرەكتى فيلمدەر تسيكلى ءتۇسىرىلدى.

قازاقستاندىق قوعامدىق دامۋ ينستيتۋتى جانە وڭىرلەردە جوبالىق وفيستەر قۇرىلدى.

مادەنيەت جانە سپورت مينيسترلىگىمەن مادەنيەت سالاسىنداعى مەتسەناتتىقتى ىنتالاندىرۋ جونىندەگى ۇسىنىستار دايىندالدى. ءبىلىم جانە عىلىم مينيسترلىگى ۆولونتەرلىك قىزمەتى ءۇشىن ستۋدەنتتەردى ماتەريالدىق ىنتالاندىرۋدىڭ تەتىكتەرىن ازىرلەدى.

4-6 قىركۇيەكتە قازاقستان ەلورداسىندا ازيا قالامگەرلەرىنىڭ ءبىرىنشى فورۋمى وتەدى، وعان قىرىققا جۋىق ەلدىڭ تانىمال اقىن-جازۋشىلارى قاتىسادى.

تامىز ايىنىڭ سوڭىندا «مۋزەيدەگى ءتۇن» جوباسى ىسكە قوسىلادى، وندا قازاقستاندىقتار ءار ايدىڭ ءتورتىنشى سەنبىسىندە ساعات 21-دەن 3-كە دەيىن ەلدى مەكەندەگىمۋزەيلەردىڭ ءبىرىن تەگىن ارالاي الادى.

جاڭا تەلەۆيزيالىق ماۋسىمدا رەسپۋبليكالىق ەفيرگە مادەنيەتتانۋشىلىق سيپاتتاعى راديو جانە تەلەۆيزيالىق باعدارلامالار تسيكلى ەفيرگە شىعادى.  حالىقتى لاتىن گرافيكاسىنداعى جاڭا الىپبيگە وقىتۋعا باعىتتالعان بەينەروليكتەر مەن بەينە لەكتسيالار تەلەارنالار ەفيرلەرىنە شىعارىلادى، سونداي-اق ينتەرنەتكە ورنالاستىرىلادى. كلاسسيكالىق مۋزىكانى باعالاۋشىلاردىڭ سۇيىكتىسىنە اينالعان «كلاسسيك» راديوسىنىڭ تاراتۋ اۋماعىن كەڭەيتۋ جوسپارلانۋدا.

2020 جىل ۆولونتەرلەر جىلى دەپ جاريالاندى. وسىعان بايلانىستى مەملەكەتتىك حاتشى مارات تاجينمەملەكەتتىك ورگاندارعا ستۋدەنتتەردىڭ قوعامدىق پايدالى قىزمەتىنە قولداۋ كورسەتۋ شارالارىن قابىلداۋدى جەدەلدەتۋدى تاپسىردى.

وتىرىستا پرەزيدەنت اكىمشىلىگى باسشىسىنىڭ ورىنباسارى مالىك مۋرزالين، اقپارات جانە قوعامدىق دامۋ ءمينيسترى داۋرەن اباەۆ، مادەنيەت جانە سپورت ءمينيسترى اقتوتى رايىمقۇلوۆا، ءبىلىم جانە عىلىم ۆيتسە-ءمينيسترى فاتيما جاقىپوۆا ءسوز سويلەدى.

سوڭعى جاڭالىقتار