22 تامىز, 17:08 290 0 جاڭالىقتار Túrkistan Gazeti

ن.نىعماتۋلين قىتاي ەلىنىڭ قازاقستانداعى ەلشىسىن قابىلدادى

بۇگىن ءماجىلىس توراعاسى نۇرلان نىعماتۋلين قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان سياونى قابىلدادى. بۇل تۋرالى ءماجىلىستىڭ ءباسپاسوز قىزمەتى حابارلادى. 

تاراپتار قازاقستان مەن قىتاي اراسىنداعى ىنتىماقتاستىقتى پارلامەنتارالىق دەڭگەيدە نىعايتۋ ماسەلەلەرىن تالقىلادى.

نۇرلان نىعماتۋلين اتاپ وتكەندەي، قازاقستان مەن قىتاي باسشىلارىنىڭ ارقاسىندا ەكىجاقتى ىنتىماقتاستىق ستراتەگيالىق سەرىكتەستىك دەڭگەيىنە جەتتى.

قازاقستان مەن قىتاي پارلامەنتشىلەرىنىڭ اراسىنداعى قارىم-قاتىناس ەكى ەلگە ورتاق مۇددەلەر شەڭبەرىندە دامۋدا. ءماجىلىس توراعاسى ارىپتەستەرىنىڭ يننوۆاتسيالىق دامۋ، سونداي-اق ەكونوميكالىق قايتا قۇرۋ رەفورمالارىن زاڭنامالىق قولداۋ تاجىريبەسى قىزىعۋشىلىق تۋدىرىپ وتىرعانىن جەتكىزدى.

نۇرلان نىعماتۋلين «Nur Otan» پارتياسى فراكتسياسىنىڭ جەتەكشىسى رەتىندە ءماجىلىس دەپۋتاتتارى-فراكتسيا مۇشەلەرىنىڭ قىتايلىق ارىپتەستەرىمەن بايلانىستى كەڭەيتۋ ماڭىزدىلىعىن اتاپ ءوتتى.

ءماجىلىس توراعاسى مەن چجان سياو 2019 جىلى 23-24 قىركۇيەكتە ەلوردامىز نۇر-سۇلتان قالاسىندا «ۇلكەن ەۋرازيا: ديالوگ. سەنىم. سەرىكتەستىك» تاقىرىبىندا وتەتىن ەۋرازيا ەلدەرى پارلامەنتتەرى سپيكەرلەرىنىڭ ءتورتىنشى كەڭەسىنە جالپىقىتايلىق حالىق وكىلدەرى دەلەگاتسياسىنىڭ قاتىسۋ ماسەلەلەرىن تالقىلادى. سونداي-اق وسى ۋاقىتتا قىتاي حالىق رەسپۋبليكاسى بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى لي ءچجانشۋدىڭ قازاقستانعا رەسمي ساپارى جوسپارلانعان.

سوڭعى جاڭالىقتار