22 تامىز, 16:59 301 0 نۇر وتان Túrkistan Gazeti

قوعام اپتالىق شولۋ №33

سولتۇستىككە بەت العان كوش

تۇركىستان وبلىسىندا «ەڭبەك» باعدارلاماسى بويىنشا حالىق اراسىندا اقپاراتتاندىرۋ ءىس-شاراسى باستالدى. «Nur Otan» پارتياسى تۇركىستان وبلىستىق فيليالى ەلباسىنىڭ باستاماسىمەن 2015 جىلدان بەرى جۇزەگە اسىپ كەلە جاتقان باعدارلاما اياسىندا حالىقتى وڭتۇستىكتەن سولتۇستىككە كوشىرۋ جۇمىستارىن ناسيحاتتاۋ ماقساتىندا باسقوسۋ وتكىزدى.

جيىندى «Nur Otan» پارتياسىنىڭ تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ اشىپ، وسى باعىتتا اتقارىلىپ جاتقان جۇمىستارعا توقتالدى. «ەلباسى نۇرسۇلتان نازارباەۆتىڭ تاپسىرماسى بويىنشا 2015 جىلدان باستاپ ەلىمىزدىڭ جۇمىس كۇشى از سولتۇستىك وڭىرلەرىنە حالقى تىعىز ورنالاسقان وڭتۇستىك ايماقتاردان حالىقتى ءوز ەركىمەن قونىستاندىرىپ، ولارعا قاجەتتى جاعداي جاساۋ جۇمىستارى باستالعان ەدى. وسى ورايدا، «Nur Otan» پارتياسى تۇركىستان وبلىستىق فيليالى ىشكى كوشى-قون پروتسەستەرىن رەتتەۋ جانە ەڭبەك كۇشى مول ايماقتان، ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە ءوز ەركىمەن حالىقتى قونىستاندىرۋ جۇمىستارىن ناسيحاتتاۋدى قولعا الدىق»، – دەدى بەيسەن تاجىباەۆ.

باعدارلامانى جۇزەگە اسىرۋ وڭىردە 2015 جىلى باستالىپ، بۇگىنگى تاڭدا سولتۇستىك وڭىرگە 881 وتباسى (3 377 ادام) قونىس اۋدارعان. ولار مەملەكەت تاراپىنان بەرىلەتىن ءتۇرلى الەۋمەتتىك كومەكپەن قامتاماسىز ەتىلدى. حالىقتى قونىس اۋدارۋعا ىنتالاندىرۋ ماقساتىندا سولتۇستىك ءوڭىرىنىڭ وكىلدەرى كەزەڭ-كەزەڭىمەن وبلىستا ءتۇسىندىرۋ جۇمىستارىن جۇرگىزىپ جاتىر. سونىمەن قاتار سولتۇستىك، شىعىس وڭىرلەرىندەگى بوس جۇمىس ورىندارى تۋرالى مالىمەت اي سايىن الىنىپ، اۋداندىق، قالالىق جۇمىسپەن قامتۋ ورتالىقتارىنىڭ بازالىق مالىمەتتەرىنە ەنگىزىلدى. ستاتيستيكالىق مالىمەت بويىنشا، تەك اعىمداعى جىلدىڭ ءى توقسانىندا 3 مىڭعا جۋىق جۇمىس ورىندارى ۇسىنىلىپتى.

ايتا كەتەيىك، 2018 جىلعا رەسپۋبليكا بويىنشا بولىنگەن 1 706 كۆوتا نەگىزىندە وبلىستان 455 وتباسى (1 768 ادام) سولتۇستىك وڭىرلەرگە قونىس اۋدارعان. ولار كۆوتامەن، كوشۋ ءۇشىن بەرىلەتىن سۋبسيديامەن قامتاماسىز ەتىلدى. تۇراقتى مەكەنجايلارىن اۋىستىرعانداردىڭ باسىم بولىگى سارىاعاش (91 وتباسى), سايرام (63 وتباسى), ماقتاارال (75 وتباسى), ورداباسى (49 وتباسى) اۋداندارىنىڭ تۇرعىندارى. ال بيىلعى جىلى وبلىستان 427 وتباسىنى كوشىرۋ جوسپارلانىپ وتىر. بۇگىندە 284 وتباسى سولتۇستىك وڭىرلەرگە قونىس اۋدارىپ ۇلگەردى. ولار قوستاناي، شىعىس قازاقستان، سولتۇستىك قازاقستان جانە پاۆلودار وبلىسىنا كوشىپ باردى.

ەسكە سالايىق، «ەڭبەك» باعدارلاماسىنا قاتىسۋشىعا جانە ونىڭ وتباسى مۇشەلەرىنە – وتاعاسىنا جانە ءاربىر وتباسى مۇشەسىنە ءبىر رەت 35 اەك (88 375 تەڭگە) مولشەرىندە كوشۋگە ماتەريالدىق كومەك بەرىلەدى. بۇگىنگى تاڭعا دەيىن تۇركىستان وبلىسىنان قونىس اۋدارعانداردىڭ باسىم بولىگى تۇرعىن ۇيمەن، جۇمىسقا قابىلەتتى وتباسى مۇشەلەرى جۇمىسپەن قامتىلعان. كاسىبىن اشامىن دەۋشىلەرگە ەگىن، مال شارۋاشىلىعىمەن شۇعىلدانۋعا جەر تەلىمدەرى بەرىلۋدە. تۇرعىندارعا بوس تۇرعان عيماراتتار ۇسىنىلىپ، ولاردىڭ كوپشىلىگى سوندا قونىستانىپ جاتىر. سولتۇستىك وڭىرىنە بارعان ازاماتتار سونداي-اق كوشىپ-قونۋعا بايلانىستى مەملەكەت تاراپىنان بەرىلەتىن ماتەريالدىق كومەكپەن قامتاماسىز ەتىلەدى.

 

 

ورتالىق جۇمىسىمەن تانىستى

الماتى قالاسىندا قر پارلامەنتى ءماجىلىسىنىڭ دەپۋتاتى، «Nur Otan» پارتياسى فراكتسياسىنىڭ مۇشەسى زاعيپا باليەۆا بالالاردى ەرتە وڭالتۋ ورتالىعىنىڭ ۇجىمىمەن كەزدەستى.

ورتالىق 75 بالاعا ارنالعان، مۇندا بالالار 15 كۇننەن ەم الادى. 3-تەن 7 جاسقا دەيىنگى بالالار قابىلدانادى. ورتالىقتا مەديتسينالىق قىزمەتكەرلەردەن باسقا بالالارمەن ۇستازدار، لوگوپەدتەر مەن پسيحولوگتار جۇمىس ىستەيدى.  سونىمەن قاتار، ورتالىقتا ارنايى سەنسورلى بولمەدە سويلەۋ قابىلەتى تومەن بالالارعا جەكە جانە توپتىق ساباقتار ۇيىمداستىرىلادى. ۇيىم قىزمەتكەرلەرى ءوز تاراپىنان دەپۋتاتقا دەنساۋلىق ساقتاۋ سالاسىنداعى اقپاراتتىق جۇيەلەر، قوعامدىق كولىك ماسەلەسى، باسپانامەن قامتاماسىز ەتۋ جانە جالاقى ماسەلەسىنە قاتىستى ساۋالدارىن قويدى.

«بۇگىن جۇمىس ساپارى اياسىندا بالالاردى ەرتە وڭالتۋ ورتالىعىنا كەلدىم. بۇل وڭالتۋ ورتالىعى بالالارىمىزعا وتە قاجەت. الماتىنىڭ وزىندە وسىنداي ءتورت ورتالىق بار. سۇراقتاردى «Nur Otan» پارتياسىمەن بىرلەسە قاراستىرىپ، ورتالىق اپپاراتقا جولدايمىز جانە ماجىلىستە، ۇكىمەت اياسىندا كوتەرەمىز. ورتالىقتا 65 بالا بار، جاعدايلارى جاقسى. مىندەتتى تۇردە تەك قانا قالادا ەمەس، ايماقتارعا دا بارىپ ءجۇرمىز. سايلاۋشىلارمەن كەزدەسۋ بارىسىندا ءتۇرلى سۇراقتار تۋىندايدى، اسىرەسە، الەۋمەتتىك تولەمدەر ماسەلەسى، جەر، باسپانا ماسەلەسى كوتەرىلەدى. وتكەن جىلى دەنساۋلىق سالاسىنداعى قىزمەتكەرلەردىڭ جالاقىسى 30 پايىزعا كوتەرىلدى. ەندى مىنە، مۇعالىمدەرگە جاعداي جاسالىپ جاتىر، ولاردىڭ جالاقىسى 4 جىلدىڭ ىشىندە ەكى ەسەگە كوتەرىلەتىن بولادى»، – دەدى زاعيپا باليەۆا.

سونداي-اق، كەزدەسۋ بارىسىندا بالالاردىڭ كەشەندى كومەك الۋعا مۇمكىندىگى بولۋى ءۇشىن وسىنداي ورتالىقتاردىڭ كوپسالالىق باعىتقا اۋىسۋى قاجەت ەكەندىگى دە  اتاپ ءوتىلدى.

 

بالالار ءبىر قۋانىپ قالدى

ەلىمىزدىڭ ءار ايماعىندا جىل سايىن ءداستۇرلى تۇردە «مەكتەپكە جول» اكتسياسى ۇيىمداستىرىلىپ كەلەدى. بۇل شارا از قامتىلعان جانە كوپبالالى وتباسىلاردان شىققان بالالارعا، جەتىم جانە اتا-انا  قامقورلىعىنسىز قالعان بالالارعا كومەك كورسەتۋدى ماقسات ەتەدى.

نۇر-سۇلتان قالاسىنداعى MEGA Silk Way ساۋدا ويىن-ساۋىق ورتالىعىندا وتكەن «مەكتەپكە جول» اكتسياسى اياسىندا «Nur Otan» پارتياسىنىڭ استانا قالالىق فيليالى ەسىل اۋدانىنداعى كومەككە مۇقتاج وتباسىلارعا ماتەريالدىق كومەك كورسەتتى. شارانى ۇيىمداستىرۋشىلار مەن دەمەۋشىلەر مەكتەپ جاسىنداعى 70 شاقتى ۇل مەن قىزعا مەكتەپ قۇرالدارى سالىنعان سومكەلەردى سىيعا تارتتى.

كەزدەسۋ بارىسىندا پارتيانىڭ ەسىل اۋداندىق فيليالىنىڭ كونسۋلتانتى ادىلەت ساپقۇلوۆ بالالارعا جاڭا وقۋ جىلىندا تابىس تىلەدى. «الدىمىزدا جاڭا وقۋ جىلى كەلە جاتىر. الەۋمەتتىك از قامتىلعان ساناتقا جاتاتىن وقۋشىلاردى جاڭا وقۋ جىلىنا دايىنداۋ وڭاي جۇمىس ەمەس. بۇل ورايدا «مەكتەپكە جول» اكتسياسىنا ءۇمىت ارتىپ وتىرعان كوپبالالى وتباسىلار كوپ. كومەككە مۇقتاج جانداردى، ونىڭ ىشىندە بالالاردى مەيىرىم شۋاعىنا بولەيتىن وسىنداي قايىرىمدىلىق اكتسيالارى وڭىرلەردە كوپتەپ ۇيىمداستىرىلسا دەگەن تىلەك بار. بالالاردىڭ قۋانىشى – ءبىزدىڭ قۋانىشىمىز. سوندىقتان اكتسياعا بەلسەندى تۇردە اتسالىسىپ، بۇلدىرشىندەردى قۋانتۋعا اسىعايىق»، – دەيدى ول.

اكتسيا كەزىندە از قامتىلعان وتباسىلاردان شىققان بالالاردىڭ ءتىزىمى جاسالىپ، مەكتەپكە قامتىلماي قالعان بالالاردى انىقتاۋ، مەكتەپكە بارماۋدى بولدىرماۋ ماقساتىندا رەيد جۇرگىزىلگەن بولاتىن. مەكتەپكە قاجەتتى جابدىقتار سالىنعان سومكەلەردى سىيلىققا العان بالالار سالتاناتتى شارادان سوڭ Happylon ورتالىعىنىڭ ويىن اتتراكتسيوندارىنا باردى. جاڭا وقۋ جىلىنىڭ الدىندا بالالارعا جارقىن كوڭىل كۇي سىيلاعان قايىرىمدىلىق اكتسياسىنان وقۋشىلار كوڭىلدى، اتا-انالار دا ريزا بولىپ تارقاستى.

 

كوپ بالالى انا  پاتەرلى بولدى

 شىعىس قازاقستان وبلىسىنىڭ اكىمى دانيال احمەتوۆ كوكپەكتى اۋدانىنا جۇمىس ساپارىمەن بارىپ، كوكپەكتى اۋىلىندا  كوپبالالى وتباسىلارعا، دارىگەرلەرگە، مۇمكىندىگى شەكتەۋلى جاندارعا جانە تولىق ەمەس وتباسى وكىلدەرىنە 13 باسپانانىڭ كىلتىن تابىس ەتتى.

باسپانالى بولعان كوپبالالى انانىڭ ءبىرى – الفيا گۋسەينوۆا. ءتورت بالانىڭ اناسى مەكتەپتە مۇعالىم بولىپ جۇمىس ىستەيدى. باسپاناعا قول  جەتكىزىپ، ەرەكشە قۋانىشقا كەنەلگەن الفيا ءتورت بولمەلى جەر ءۇيدى ءوزى  تاڭداعان ەكەن. «ءار وتباسى باسپانالى بولۋدى ارماندايدى. سونىڭ ىشىندە ءبىز  دە بارمىز. ءساتى ءتۇسىپ باسپاناعا قول جەتكىزدىك. كوپبالالى انا رەتىندە بىزگە  تەگىن ءۇي بەرىلدى. وسى ورايدا بارشا كوپبالالى وتباسىلارعا كومەك قولىن سوزىپ، ولاردى نازاردان تىس قالدىرماعان وبلىس باسشىسى دانيال احمەتوۆكە شىن كوڭىلدەن العىسىمدى بىلدىرەمىن»، – دەدى الفيا گۋسەينوۆا.

وتباسىنىڭ قۋانىشىمەن بولىسكەن ايماق باسشىسى جاڭا قونىسقا ارنايى بارىپ قۇتتىقتاپ، كورىمدىك رەتىندە ۇلكەن تەلەديدار، بالالارعا ەكى سمارتفون جانە ويىنشىقتاردى سىيعا تارتتى. «بۇل جۇمىس وبلىستا جالعاسادى. باسپانالى بولعان بارلىق تۇرعىندى كۋانىشتارىمەن قۇتتىقتايمىن»، – دەدى دانيال احمەتوۆ.

سالتاناتتى شاراعا قاتىسقان كوكپەكتى اۋداندىق تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى قايرات جەلكيشەۆ تە تۇرعىنداردىڭ قۋانىشىمەن ءبولىستى. «بيۋدجەتتىك قاراجات ەسەبىنەن تۇرعىن ءۇي ءبولۋ باعدارلاماسى بويىنشا جوبا جاسالىپ جاتىر، كەلەسى جىلى بەرىلەتىن باسپانالاردىڭ سانىن كوبەيتۋدى جوسپارلاپ وتىرمىز. «Nur Otan» پارتياسىنىڭ «باقىتتى وتباسى» جوباسىن جۇزەگە اسىرۋ الداعى ۋاقىتتا دا جالعاسىن تابادى»، – دەدى قايرات جۇماعاليۇلى.

 

قۇقىقتىق كەڭەس بەرىلدى

اتىراۋ وبلىسىنىڭ يساتاي اۋدانىندا «حالىققا كومەك» جوباسى اياسىندا كوشپەلى قوعامدىق قابىلداۋ ءوتتى.

«Nur Otan» پارتياسى اتىراۋ وبلىسى يساتاي اۋداندىق فيليالى ۇيىمداستىرعان قابىلداۋعا اۋدان اكىمىنىڭ مىندەتىن اتقارۋشى بولاتبەك سيساتوۆ، ءبولىم جانە مەكەمە باسشىلارى قاتىستى. كەزدەسۋ بارىسىندا اۋداندىق ادىلەت باسقارماسى، حالىقتى جۇمىسپەن قامتۋ ورتالىعى، وبلىستىق كاسىپكەرلىك پالاتاسىنىڭ يساتاي اۋداندىق فيليالى، اۋداندىق كاسىپكەرلىك جانە اۋىلشارۋاشىلىق بولىمدەرى، تاعى باسقا سالا باسشىلارى تۇرعىنداردىڭ كوكەيىندە جۇرگەن ساۋالدارىنا جاۋاپ بەردى.

شارا حالىققا قولدانىستاعى زاڭ شەڭبەرىندە قۇقىقتىق كومەك بەرۋ ماقساتىندا جۇزەگە اسىرىلدى. «قابىلداۋعا كەلگەن تۇرعىندارعا وزدەرىنىڭ كوكەيتەستى سۇراقتارىنا قولدانىستاعى زاڭدار اياسىندا جاۋاپ بەرىلىپ، قۇقىقتىق كومەك كورسەتىلدى. تۇرعىندار ماسەلەسىنىڭ باسىم كوپ­شىلىگى اتاۋلى الەۋمەتتىك كومەكتىڭ قان­داي وتباسىلارعا تيەتىندىگى، جۇمىسقا ورنالاسۋ، تۇرعىن ءۇيدى كەزەكسىز الۋ جايى بولدى»، – دەيدى اۋداندىق فيليال توراعاسىنىڭ ءبىرىنشى ورىنباسارى ايباتىر بەكىشۇلى.

اتاۋلى الەۋمەتتىك كومەكتەن ايىرىلعان تۇرعىننىڭ سۇراعىنا اۋداندىق جۇمىسپەن قامتۋ، الەۋمەتتىك باعدارلامالار جانە حال اكتىلەرىن تىركەۋ ءبولىمىنىڭ باسشىسى راشيد مۇقانوۆ جاۋاپ بەردى. ول ءوز كەزەگىندە قارجىلاي كومەكتىڭ كىمگە قالاي تاعايىندالاتىنىن، قانداي جاعدايدا توقتاتىلاتىنىن، قايتا الۋ جولدارىن تولىق ءتۇسىندىردى. جاڭا كاسىپ اشۋ تۋرالى، وعان بەرىلەتىن كومەك تۇرلەرى مەن جەڭىلدىكتەر جونىندە سۇراعان امان مەڭدىعازيەۆ قابىلداۋ بارىسىندا ساۋالدارىنا تولىق جاۋاپ الدى.

 

ىنتا بولسا، جۇمىس جوق ەمەس

جۇمىسسىزدىقتىڭ الدىن الۋ ماقساتىندا «Nur Otan» پارتياسى شىمكەنت قالالىق فيليالىنىڭ قوعامدىق قابىلداۋ بولمەسىندە ازاماتتاردى قابىلداۋ ءوتتى.

ءىس-شارا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» بويىنشا حالىقتى ناتيجەلى جۇمىسپەن قامتۋعا جاردەمدەسۋ جانە ازاماتتاردى كاسىپكەرلىككە تارتۋ ماقساتىندا ۇيىمداستىرىلدى. اكتسياعا 60-قا جۋىق جۇمىس ىزدەۋشى ازامات قاتىستى.

اتاپ ايتار بولساق، قابىلداۋدا شىمكەنت قالالىق ءماسليحاتىنىڭ حاتشىسى عاني تاشقاراەۆ، پارتيالىق فراكتسيا جەتەكشىسى بەكايدار تولەگەنوۆ، قالالىق پارتيا فيليالى توراعاسىنىڭ ورىنباسارى باۋىرجان قۋانىشبەكوۆ، «جۇمىسپەن قامتۋ» ورتالىعىنىڭ ماماندارى جانە جۇمىس بەرۋشىلەر جۇمىسسىز جاستارعا كەڭەس بەردى. قابىلداۋعا كەلگەن ازاماتتاردىڭ كوتەرگەن جۇمىسسىزدىق، اتاۋلى الەۋمەتتىك كومەك، نەسيە الۋ ماسەلەلەرىنە ءتيىستى جاۋاپ بەرىلدى.

جالپى، باعدارلاما كاسىبي ءبىلىم بەرۋ كاسىپتىك وقىتۋ، جاپپاي كاسىپكەرلىكتى دامىتۋ، جۇمىسپەن قامتۋ جانە ەڭبەك رەسۋرستارىنىڭ ۇتقىرلىعىن ارتتىرۋ سياقتى ءۇش باعىت بويىنشا جۇزەگە اسىرىلىپ وتىر. مەملەكەتتىك باعدارلاما اياسىندا 2019 جىلدىڭ 7 ايىنىڭ قورىتىندىسى بويىنشا 15 582 تۇرعىن جۇمىسپەن قامتىلعان. جۇمىسپەن قامتۋ شارالارىمەن 13 797 ازامات، ونىڭ ىشىندە 9 365 تۇرعىن تۇراقتى جۇ-مىسپەن قامتىلسا، 368 جاس الەۋمەتتىك جۇمىس ورىندارىنا تۇراقتاعان. ال اقىلى قوعامدىق جۇمىستارعا 2 000-نان استام ازامات جولداندى. باعدارلاما شەڭبەرىندە 2 009 ازامات جاستار پراكتيكاسىنا قاتىسسا، 402 مۇمكىندىگى شەكتەۋلى ازاماتقا جۇمىسپەن قامتۋدىڭ بەلسەندى شارالارىنا جولداما بەرىلدى.

سوڭعى جاڭالىقتار