22 تامىز, 15:30 313 0 الەۋمەت "تۇركىستان" گازەتىنىڭ اۆتورلارى

بيىل 118 مىڭ تۇرعىن ءۇي سالۋ جوسپارلانعان

جۋىردا قازاقستان پرەزيدەنتى قاسىم-جومارت توقاەۆ «بايتەرەك» ۇلتتىق باسقارۋشى حولدينگى» اق باسقارما توراعاسى ايدار ءارىپحانوۆتى قابىلدادى. كەزدەسۋدە «بايتەرەك» حولدينگىنىڭ «نۇرلى جول» جانە «نۇرلى جەر» مەملەكەتتىك باعدارلامالارىن قارجىلاندىرۋعا قاتىسۋى تۋرالى اڭگىمە بولدى.

سونداي-اق، ايدار ءارىپحانوۆ الەۋ­مەت­تىك جاعدايى تومەن توپتاعى ازاماتتارعا ار­نالعان قولجەتىمدى تۇرعىن ءۇي قۇرى­لىسى، شوب-تى قولداۋ، ەلدىڭ ەكسپورتتىق الەۋەتىن جانە «قاراپايىم زاتتار» ەكو­نوميكاسىن دامىتۋ، قازاقستاننىڭ دامۋ بانكى جەلىسى بويىنشا ءىرى جوبالاردى جۇزەگە اسىرۋ جونىندەگى حولدينگتىڭ ات­قارعان جۇمىستارى تۋرالى ماعلۇمات بەردى.

ستاتيستيكالىق دەرەكتەرگە سۇيەنسەك، قا­زاقستاندا قۇرىلىس جۇمىستارى 6,9 پايىزعا وسكەن. ماماندار بۇل «نۇرلى جول» اياسىندا ينفراقۇرىلىمدى ەنگىزۋگە بايلانىستى دەيدى. ۇلتتىق ەكونوميكا مينيسترلىگىنىڭ وكىلدەرى 2020 جىلعا قاراي 4,5 ميلليون شارشى مەتر تۇرعىن ءۇيدى ىسكە قوسۋ كوزدەلىپ وتىرعانىن ايتقان ەدى.

قر پرەمەر-ءمينيسترى ا.ءماميننىڭ توراعالىعىمەن شىلدە سوڭىندا وتكەن ۇكىمەت وتىرىسىندا «نۇرلى جەر» باعدار­لا­ماسىن ىسكە اسىرۋ بارىسى قارالدى. قر يندۋستريا جانە ينفراقۇرىلىمدىق دامۋ ءمينيسترى رومان سكليار وسى جىلى 6 اي ىشىندە تۇرعىن ءۇي قۇرىلىسىنا 605,7 ملرد تەڭگە ينۆەستيتسيا تارتىلعانىن، بۇل 2018 جىلعى دەڭگەيدەن 15,5 پايىزعا جوعارى ەكەنىن ايتتى.

«وسى جىلدىڭ سوڭىنا دەيىن 118 مىڭ تۇرعىن ءۇي سالۋدى جوسپارلادىق. جارتى جىلدىق قورىتىندى بويىنشا 48 925 تۇرعىن ءۇي بەرىلدى. تۇرعىن ءۇيدى ۋاقتىلى بەرۋ ءۇشىن قۇرىلىس الاڭدارىنا ينجە­نەر­لىك كوممۋنيكاتسيا جۇرگىزۋگە 81,7 ملرد تەڭگە قاراستىرىلعان»، – دەدى ر.سكليار.

جارتى جىلدىق قورىتىندى نەگىزىندە قارجىلاندىرۋ جوسپارى بويىنشا وڭىرلەرگە 36,8 ملرد تەڭگە اۋدارىلدى، ونىڭ 35,8 ملرد تەڭگەسى نەمەسە 96,1% يگەرىلدى. كوپ بالالى وتباسىلار ءۇشىن جالعا بەرىلەتىن تۇرعىن ءۇي سالۋعا جانە ساتىپ الۋعا 50 ملرد تەڭگە قاراستىرىلدى. قارجىلاندىرۋ جوسپارى بويىنشا وڭىرلەرگە 9,7 ملرد تەڭگە اۋدارىلدى، ونىڭ 9,6 ملرد تەڭگەسى نەمەسە 99,6% يگەرىلدى. بارلىق كوزدەردەن 7482 پاتەر بەرۋ جوسپارلانۋدا. مامىر ايىنان باستاپ 1619 كوپ بالالى وتباسىنا تۇرعىن ءۇي بەرىلدى. سونىمەن قاتار ر.سكليار جۇمىس ىستەيتىن جاستاردىڭ ەڭبەك ۇتقىرلىعىن قامتاماسىز ەتۋ ءۇشىن نۇر-سۇلتان، الماتى جانە شىمكەنت قالالارىندا 2019-2021 جىلدارى جىلىنا 1 مىڭ جالدامالى پاتەر سالۋ جوسپارلانعانىن اتاپ ءوتتى. از قامتاماسىز ەتىلگەن وتباسىلاردى جىلدىق 2% جەڭىلدىكپەن نەسيەلەندىرۋ ايا­سىن­دا «تۇرعىنۇي قۇرىلىس جيناق بانكىنە» 50 ملرد تەڭگە ءبولىندى. وڭىرلەر اراسىنداعى نەسيە بەرۋ ليميتتەرى كەزەكتەگىلەر سانىنا بارابار انىقتالعان. 15 شىلدەدە بانك تولەم قابىلەتتىلىگىن الدىن الا باعالاۋ بويىنشا كەزەكتە تۇرعانداردان ءوتىنىش قابىلداۋدى باستادى. قاراۋعا 9,9 ملرد تەڭگە سوماسىنا 920 ءوتىنىش ءتۇستى. نەسيە بەرۋگە 1 ملرد تەڭگەگە 91 ءوتىنىم ماقۇل­دان­دى. ەلباسىنىڭ تاپسىرمالارىن ىسكە اسىرۋ اياسىندا «نۇرلى جەر» باعدار­لا­ماسىن ازىرلەۋدە تۇرعىنداردى جىلۋمەن، سۋ­مەن جابدىقتاۋ جانە سۋ بۇرۋ، كوم­مۋ­نالدىق سەكتوردى جاڭعىرتۋ جانە ۇيلەردى جوندەۋ ماسەلەلەرى بويىنشا جۇمىستار جۇرگىزىلىپ جاتىر. بۇگىندە قولدانىستاعى جانە جاڭا ءىس-شارالاردى قارجىلاندىرۋ تەتىكتەرى پىسىقتالۋدا. جىل سوڭىنا دەيىن «نۇرلى جەر» باعدارلاماسىنىڭ جاڭا رەداكتسياسىن بەكىتۋ جوسپارلانۋدا.

سوڭعى جاڭالىقتار