21 تامىز, 17:05 347 0 ءبىلىم دينارا مىڭجاسارقىزى

گاۋحار الدامبەرگەنوۆا: «ۇلت بولاشاعىنىڭ شامشىراعى»

حالقىمىزدىڭ داڭقتى پەرزەنتى ماعجان جۇماباەۆ: «التى الاشتىڭ بالاسى باس قوسقان جەردە ەڭ قادىرلى ورىن – ۇستازدىكى» دەگەن دانا وي قالدىرعان. ۇلى اقىننىڭ ۇلاعاتتى ءسوزى تەحنيكا مەن تەحنولوگيا قارىشتاپ دامىعان بۇگىنگى كۇندە دە ءوز ومىرشەڭدىگىن جويعان ەمەس. وتاندىق ءبىلىم مەن عىلىمنىڭ قاراشاڭىراعى – قازاق ۇلتتىق قىزدار پەداگوگيكالىق ۋنيۆەرسيتەتى 75 جىل ۋاقىت مەرزىمىندە مۇعالىم ماماندارىن دايارلاۋ مەن پەداگوگتاردىڭ بىلىكتىلىگىن ارتتىرۋدى ءساتتى جۇزەگە اسىرىپ، ءبىلىم بەرۋ نارىعىندا تۋىنداعان قاجەتتىلىكتەرگە ساي جاڭاشىل جۇمىس ىستەۋ تاسىلدەرى ارقىلى مول تاجىريبە جيناي ءبىلدى. ءبىلىم بەرۋ – بۇل تامىرى تەرەڭدە جاتقان، ۇلت پەن دىنگە بولىنبەيتىن، ناتيجەسى ءبىر كۇن نەمەسە ءبىر جىلدا كورىنبەيتىن قۇندىلىق. كوپشىلىك قاۋىمعا ورتاق يگىلىك. حالىق پەن حالىقتى، ادام مەن ادامدى تەڭەستىرەتىن – تەك قانا ءبىلىم. ءبىلىم مەن عىلىمعا قويار تالاپ ارتقان بۇگىنگىدەي زاماندا مۇعالىمگە جۇكتەلەر جاۋاپكەرشىلىك تە ەسەلەنە تۇسۋدە. بىرەگەي ءبىلىم ورداسىنىڭ ۇجىمى وسى جاۋاپكەرشىلىك ۇدەسىنەن شىعۋ جولىندا، باسەكەلەستىككە توتەپ بەرە الاتىنداي مىقتى مامان دايارلاۋ ماقساتىندا جۇمىس ىستەۋدە.

قىزدار ۋنيۆەرسيتەتى – ەلىمىزدىڭ جوعارى وقۋ ورىندارى اراسىندا وزىندىك دارا ورنى بار ءبىلىم وردالارىنىڭ ءبىرى. ورتا ازيا ايماعىندا وسى تاقىلەتتەس وقۋ ورنى جوق. الەمدە دە ساۋساقپەن سانارلىقتاي. ۇلتىمىزدىڭ زاڭعار جازۋشىسى مۇحتار اۋەزوۆتىڭ: «ءتاڭىر جازسا، بۇل ينستيتۋت بولاشاق قازاق قىزدارىنىڭ شامشىراعىنا اينالادى. وسى شامشىراقتىڭ جارىق ساۋلەسى  سونبەسىن دەيىك» دەگەن پايىمى ۋنيۆەرسيتەتتىڭ وزىندىك ەرەكشەلىگى مەن ءمان-ماڭىزىن ايعاقتاپ تۇرعانداي. وقۋ ورنى 75 جىلعا جۋىق ۋاقىت ارالىعىندا ءوزىنىڭ قالىپتاسۋى مەن دامۋى جولىنان ءوتتى. ەكىنشى دۇنيەجۇزىلىك سوعىستىڭ اۋمالى-توكپەلى كەزىندە اشىلىپ، ۇلت زيالىلارى قىزمەت اتقارعان ۇلاعات ۇياسىنان وسى ۋاقىت ارالىعىندا 60 مىڭنان استام بىلىكتى مامان دايارلانىپ، ارماندارىن اسقاقتاتىپ، قياعا قانات قاقتى. ايتۋلى عالىمدارىمىز ءتۇرلى عىلىم سالالارىنا قاتىستى ىرگەلى زەرتتەۋ ەڭبەكتەرىن وسى ۋنيۆەرسيتەت قابىرعاسىندا جازىپ، ەل يگىلىگىنە اينالدىردى. ەلىمىزدىڭ دامۋىنا زور ۇلەس قوسىپ كەلە جاتقان وقۋ ورنى بۇگىندە جوعارى بىلىكتى پەداگوگ كادرلار دايارلايتىن نەگىزگى ورتالىقتىڭ بىرىنە اينالىپ وتىر. قازاقستانداعى ۇلاعاتتى ۇستازدار مەن تالانتتى عالىمداردىڭ ۇلكەن توبى وسى كيەلى شاڭىراقتان شىڭدالىپ شىعىپ، وتانىمىزدىڭ دامۋى جولىندا جەمىستى ەڭبەك ەتىپ جاتىر.

قازىرگى كۇندە ۋنيۆەرسيتەتتىڭ 6 فاكۋلتەتىندەگى 27 كافەدرا 42 باكالاۆريات، 23 ماگيستراتۋرا جانە 4 PhD دوكتورانتۋرا ماماندىقتارى بويىنشا مۇعالىم ماماندارىن دايارلايدى. ال 20 ماماندىق بويىنشا قاشىقتىقتان وقىتۋ تەحنولوگياسى ەنگىزىلگەن. بولاشاق پەداگوگتارعا 41 عىلىم دوكتورى، 193 عىلىم كانديداتى، 22 PhD دوكتورى مەن 202 عىلىم ماگيسترى ءبىلىم بەرەدى.

ەلباسى نۇرسۇلتان نازارباەۆ قىزدار ۋنيۆەرسيتەتىنە كەلگەن ساپارىندا: «ءبىر قىزدى تاربيەلەۋ – ءبىر ۇلتتى تاربيەلەۋمەن بىردەي» دەپ اتاپ ءوتىپ، وقۋ ورنى ۇجىمىنىڭ الدىنا ناقتى مىندەتتەر قويعان بولاتىن. وسى ورايدا تاعىلىمدى تاربيە مەن ءورىستى ءبىلىمنىڭ ىرگەلى ورداسى اتانعان، كوزىقاراقتى زيالى قاۋىم «ىزەتتىلىك پەن ۇلگى-ونەگە وتاۋى» دەپ ات قويىپ، ايدار تاققان ءبىلىم مەن عىلىمنىڭ قاراشاڭىراعى ءوز قىزمەتىندە قازاقستاندىق ءپاتريوتيزمدى، ەلباسىنىڭ «ماڭگىلىك ەل» جالپىۇلتتىق يدەياسىن باستى باعدار رەتىندە ۇستايتىنىن اتاپ وتكەن ابزال. قازىرگى كۇندە بىرەگەي ءبىلىم ۇياسىندا ستۋدەنتتەردىڭ ساپالى ءبىلىم الىپ، عىلىممەن، ونەرمەن، سپورتپەن اينالىسۋى ءۇشىن بارلىق جاعداي جاسالعان. سونىمەن قاتار ۇرپاق تاربيەشىسى سانالاتىن – بولاشاق پەداگوگتاردىڭ بويىندا حالقىمىزدىڭ ۇلتتىق قۇندىلىقتارىن دارىتۋ ورايىندا بىرقاتار جۇمىستار جۇزەگە اسىرىلىپ، ۋنيۆەرسيتەت وتاندىق جوعارى وقۋ ورىندارى اراسىندا ۇلكەن بەدەلگە يە بولىپ وتىرعانى كوڭىلگە قۋانىش ۇيالاتادى. اتاپ ايتقاندا، اككرەديتتەۋ جانە رەيتينگتىڭ تاۋەلسىز اگەنتتىگى (ارتا) جۇرگىزگەن ماماندار دايارلاۋ دەڭگەيلەرى مەن باعىتتارى بويىنشا 2019 جىلعى قازاقستان رەسپۋبليكاسى جوعارى وقۋ ورىندارىنىڭ ۇلتتىق رەيتينگىسىنىڭ قورىتىندىسى بويىنشا قازاق ۇلتتىق قىزدار پەداگوگيكالىق ۋنيۆەرسيتەتى ەلىمىزدىڭ ۇزدىك ۋنيۆەرسيتەتتەرىنىڭ «توپ-20» تىزىمىنە كىرىپ، جوعارى وقۋ ورىندارىنىڭ اراسىندا ەڭ جوعارى پوزيتسيا – 7-ورىندى يەلەندى. ال ينستيتۋتسيونالدىق رەيتينگىدە «ءبىلىم بەرۋ» باعىتى بويىنشا قىزدار ۋنيۆەرسيتەتى 2-ورىنعا يە بولدى. مامانداردى دايارلاۋدىڭ ءارتۇرلى دەڭگەيدەگى ءبىلىم بەرۋ باعدارلامالارىنىڭ رەيتينگتەرىندە قازاق ۇلتتىق قىزدار پەداگوگيكالىق ۋنيۆەرسيتەتى جوعارى كورسەتكىشتەرمەن كوشباسشىلىق ورىندارعا ورنالاستى. ءبىلىم بەرۋ باعدارلامالارىنىڭ ماماندار دايارلاۋ باعىتى مەن دەڭگەيىنە سايكەستىك بويىنشا جوعارى وقۋ ورىندارىنىڭ رەيتينگىسىندە جالپى سانى 25 جۇلدەلى ورىندارىن الدى. ونىڭ ىشىندە باكالاۆريات باعدارلاماسى بويىنشا – 16, ماگيستراتۋرادا – 6 جانە دوكتورانتۋرادا – 3 ورىن.

ال ءبىلىم ساپاسىن قامتاماسىزداندىرۋ بويىنشا تاۋەلسىز اگەنتتىگى قازاقستاننىڭ ۇزدىك جوعارى وقۋ ورىندارىنىڭ اراسىندا جۇرگىزىلگەن رەيتينگ قورىتىندىسىن بويىنشا قىزدار ۋنيۆەرسيتەتى پەداگوگيكالىق جوعارى وقۋ ورىندارى اراسىندا 85,13 كورسەتكىشىمەن ەكىنشى ورىندى يەلەندى. اتاپ ايتقاندا، ۋنيۆەرسيتەت «اكادەميالىق قىزمەت» ساۋالناماسى بويىنشا – 68,12, «ساراپشىلاردىڭ رەپۋتاتسيالىق باعالاۋى» ساۋالناماسى بويىنشا – 5,95 جانە «جۇمىس بەرۋشىلەردىڭ رەپۋتاتسيالىق باعالاۋى» ساۋالناماسى بويىنشا – 11,06 كورسەتكىشىن كورسەتتى.

ۋنيۆەرسيتەت ستۋدەنتتەرى حالىقارالىق، رەسپۋبليكالىق جانە ايماقتىق ءبىلىم، عىلىم، ونەر جانە سپورت جارىستارىندا جۇلدەلى ورىندارعا يە بولىپ، وقۋ ورنىنىڭ مەرەيىن تاسىتىپ كەلەدى. ماسەلەن، 2018-2019 وقۋ جىلىندا قىزدار ۋنيۆەرسيتەتىنىڭ ستۋدەنتتەرى 170-كە جۋىق ءتۇرلى دەڭگەيدەگى بايقاۋلار مەن جارىستاردا «جۇزدەن – جۇيرىك، مىڭنان – تۇلپار» شىقتى. سونىمەن قاتار بىلىمگەرلەر ەلىمىزبەن قاتار شەت مەملەكەتتەردە وتكەن ءتۇرلى عىلىمي جوبالار بايقاۋى مەن زياتكەرلىك ويىنداردا دا باعى جانىپ، جەڭىس تۇعىرىنا كوتەرىلدى. ۋنيۆەرسيتەت داڭقى تەك قانا ءبىلىم سايىستارىندا عانا ەمەس سپورتتىق دودالاردا دا ءجيى شىعىپ ءجۇر.

سوڭعى جىلدارى ۋنيۆەرسيتەتتىڭ ماتەريالدىق-تەحنيكالىق بازاسى نىعايىپ، جاڭا نىساندار اشىلۋدا. ولاردىڭ قاتارىندا قازاق ءالفاۆيتىن لاتىن گرافيكاسىنا كوشىرۋ جونىندەگى ورتالىعى، «Art دارا» ونەر گالەرەياسى، «دارا» پسيحولوگيالىق-پەداگوگيكالىق تۇزەتۋ ورتالىعى مەن سيتۋاتسيالىق-مونيتورينگتىك ورتالىعى بار.

عىلىمي الەۋەتتى دامىتۋ – باسەكەگە قابىلەتتى ەلدەر قاتارىنا اپارار باستى باسپالداقتىڭ ءبىرى. ەلباسىنىڭ وتاندىق جوعارى وقۋ ورىندارى مەن عىلىمي-زەرتتەۋ ۇيىمدارىنىڭ الدىنا عىلىمي الەۋەتتى ارتتىرۋ ماسەلەسىن قويىپ وتىر. قىزدار ۋنيۆەرسيتەتى – ساپالى ءبىلىم بەرۋمەن قاتار، ىرگەلى عىلىمدى دامىتۋعا دا ۇلكەن ۇلەس قوسىپ كەلە جاتقان وقۋ ورنى. اتاپ ايتقاندا، جاقىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ عالىمدارى «YbBiNaFeO5 قۇرامدى ۆيسمۋتتى – فەرريتتى الۋ جولى» اتتى پاتەنتكە يە بولدى. يننوۆاتسيالىق ونەرتابىس نانوقۇرىلىمدى بەيورگانيكالىق ماتەريالدى سينتەزدەپ العانى ءۇشىن بەرىلىپ وتىر. بۇل پاتەنت – قازاق ۇلتتىق قىزدار پەداگوگيكالىق ۋنيۆەرسيتەتىنىڭ العاشقى ونەرتابىستىق يننوۆاتسيالىق پاتەنتى. حيميا عىلىمدارىنىڭ دوكتورى، پروفەسسور مۇحامەتقالي ماتاەۆتىڭ جەتەكشىلىگىمەن قىزدار ۋنيۆەرسيتەتىنىڭ ءبىر توپ عالىمى بىرنەشە جىلدان بەرى جاراتىلىستانۋ فاكۋلتەتىنىڭ بازاسىنداعى كەشەندى حيميا-بيولوگيالىق عىلىمي-زەرتتەۋ ورتالىعىندا تاجىريبە جۇرگىزىپ كەلەدى. ۇزاق جىلعى عىلىمي ىزدەنىستىڭ ناتيجەسىندە ولار كۇن ەنەرگياسىن تۇرلەندىرۋ  قۇرىلعىلارىنا ماگنيتتىك جارتىلاي وتكىزگىش ماتەريالى رەتىندە، سپينترونيكا، ميكروەلەكترونيكا جانە كومپيۋتەرلىك تەحنيكا قۇرىلعىلارىنا ماتەريال رەتىندە قولدانىلا الاتىن ونەرتابىسقا قول جەتكىزىپ وتىر. سونداي-اق ۋنيۆەرسيتەتتە «قازاق ءتىلى مەن ادەبيەتى» جانە «فيلولوگيا» ماماندىقتارى بويىنشا ديسسەرتاتسيالىق كەڭەس قۇرىلدى. كەڭەس قازاقستان رەسپۋبليكاسى ءبىلىم جانە عىلىم مينيسترلىگىنىڭ ءبىلىم جانە عىلىم سالاسىنداعى باقىلاۋ كوميتەتى توراعاسىنىڭ «جوعارى وقۋ ورىندارىندا فيلوسوفيا (PhD) دوكتورى، بەيىنى بويىنشا دوكتورى عىلىمي دارەجە بەرۋ بويىنشا دوكتورلىق ديسسەرتاتسيالاردى قورعاۋ جونىندەگى ديسسەرتاتسيالىق كەڭەستەر اشۋ تۋرالى»  بۇيرىعىنا سايكەس قۇرىلىپ وتىر.  بۇل وقۋ ورنىنىڭ عانا ەمەس، ەلىمىزدەگى فيلولوگيا عىلىمىنىڭ دامۋىنا اشىلعان جول. سەبەبى ديسسەرتاتسيالىق كەڭەس – عىلىمي زەرتتەۋ جولىنا تۇسكەن بولاشاق عالىمداردىڭ ەڭبەگىن سارالاپ، عىلىمي سۇزگىدەن وتكىزەتىن جوعارى عالىمدار كەڭەسى. ۋنيۆەرسيتەت «حابارشىسىنىڭ» قازاقستان رەسپۋبليكاسىنىڭ ءبىلىم جانە عىلىم سالاسىنداعى باقىلاۋ كوميتەتى تاراپىنان عىلىمي زەرتتەۋلەردىڭ نەگىزگى ناتيجەلەرىن جاريالاۋ ءۇشىن ۇسىنىلعان عىلىمي باسىلىمدار تىزىمىنە ەنگىزىلۋى دە وقۋ ورنىنىڭ عالىمدارى ءۇشىن قۋانىشتى جاڭالىق بولدى. جۋرنال «پەداگوگيكا جانە پسيحولوگيا»، «جاراتىلىستانۋ»، «فيزيكا، ماتەماتيكا، ينفورماتيكا»، «تاريح، ەكونوميكا، قۇقىق»، «فيلولوگيا»، «ونەر جانە مادەنيەت» پاندەرى بويىنشا عىلىمي جانە پەداگوگيكالىق مازمۇنداعى قازاق، اعىلشىن جانە ورىس تىلدەرىندەگى ماقالالاردى جاريالايدى. ۋنيۆەرسيتەت باستاماسىمەن ءداستۇرلى تۇردە ۇيىمداستىرىلىپ كەلە جاتقان حالىقارالىق تۇركى الەمى زەرتتەۋلەرىنە ارنالعان سيمپوزيۋم الەمدەگى عىلىم، ءبىلىم سالاسىندا تۇركى الەمىنە قاتىستى زەرتتەۋ جاساپ جۇرگەن عالىمداردىڭ باسىن قوسىپ، جاڭا عىلىمي زەرتتەۋلەرگە جول اشىپ، تۇركى الەمى ادەبيەتى مەن مادەنيەتىنىڭ كەڭەيۋىنە ىقپال جاساپ كەلەدى. وتكەن جىلدىڭ قازان ايىندا وتكەن القالى جيىنعا تۇركيا، قازاقستان، ءازىربايجان، قىرعىزستان، وزبەكستان، تاتارستان مەن باشقۇرتستاننان 300-دەن استام عالىم مەن ساراپشى قاتىستى. ءۇش كۇنگە جالعاسقان باسقوسۋدا عالىمدار پەداگوگيكا، ءتىل، ادەبيەت، تاريح، مادەنيەت، ونەر، حالىقارالىق قاتىناستار، ەكونوميكا، فيلوسوفيا، الەۋمەتتانۋ، گەندەرلىك ماسەلەلەر جايىندا جانە جاراتىلىستانۋ عىلىمدارى سالاسىندا پىكىر الماسىپ، بولاشاقتا تۇركى الەمىندە ورتاق عىلىمي جوبالاردى جۇزەگە اسىرۋ تۋراسىندا ۋاعدالاستى.

قازاقستان جاس پەداگوگ-عالىمداردىڭ ءبىرىنشى رەسپۋبليكالىق سلەتى قارساڭىندا وتاندىق جاس پەداگوگ-عالىمداردىڭ قاۋىمداستىعى قۇرىلعان بولاتىن. قۇرىلتايشىسى قىزدار ۋنيۆەرسيتەتى بولىپ تابىلاتىن قاۋىمداستىقتى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن، جاڭاشا تۇرعىدا ويلاي الاتىن قازاقستاندىق جاس پەداگوگ-عالىمداردى بىرىكتىرۋ، ولاردىڭ ديالوگ الاڭىن قۇرۋ. بۇگىندە جاس عالىمداردىڭ باستاماسىمەن بىرنەشە ىرگەلى جوبالار جۇزەگە اسىرىلۋدا. اتاپ ايتقاندا، قاۋىمداستىق مۇشەلەرى روبوتوتەحنيكا بويىنشا ستارتاپ جوبالار جاساۋدى قولعا الادى. وقۋ ورنىنىڭ بازاسىندا وسى تاراپتا عىلىمي-زەرتتەۋ جۇمىستارىن جۇرگىزۋگە باعىتتالعان ارنايى سەكتسيالىق ۇيىرمەلەر قۇرۋ دا كوزدەلىپ وتىر. وندا ۋنيۆەرسيتەت عالىمدارى روبوتوتەحنيكا بويىنشا وڭىردەگى جوعارى وقۋ ورىندارىنىڭ بىلىمگەرلەرى مەن مەكتەپ وقۋشىلارىن زاماناۋي زەرتحانالىق جۇمىستارعا تارتىپ، ولاردىڭ عىلىمي الەۋەتىن كوتەرمەك. ماقسات – جاستاردىڭ روبوتوتەحنيكا بويىنشا عىلىمي-تەحنيكالىق شىعارماشىلىق قابىلەتىن دامىتۋ. بۇعان قىزدار ۋنيۆەرسيتەتىنىڭ ماتەريالدىق-تەحنيكالىق بازاسى تولىق مۇمكىندىك بەرەدى. فيزيكا-ماتەماتيكا فاكۋلتەتىنىڭ جانىنداعى «روبوتوتەحنيكا» زەرتحاناسى Lego, اrduino جانە Raspberry روبوتتارىمەن، وقۋ-ادىستەمەلىك جانە باعدارلامالىق نۇسقاۋلىقتارمەن جابدىقتالعان. Marwin برەندىمەن جابدىقتالعان جيىنتىقتار ارقىلى ستۋدەنتتەر تەوريا مەن تاجىريبەنى ۇشتاستىرا الادى. زاماناۋي قۇرالدى دا تەرەڭ مەڭگەرە تۇسەدى. سونىمەن قاتار وقۋ ورنىنىڭ جاس عالىمدارىنىڭ باستاماسىمەن «T2T Networking» اتتى جوبا باستاۋ الدى. بۇل باستاما ورتا ءبىلىم بەرۋ سالاسىندا باسشىلىق قىزمەت اتقاراتىن ۋنيۆەرسيتەت تۇلەكتەرى مەن ەلىمىزدىڭ پەداگوگيكالىق جوعارى وقۋ ورنىنداعى جاس عالىمداردىڭ ورتاق سۇحبات الاڭىن قۇرىپ، اۋىلدىق جەردە ورنالاسقان مەكتەپتەردىڭ عىلىمي-پەداگوگيكالىق الەۋەتىن كوتەرۋدى ماقسات تۇتادى. جاستار جىلى مەن قىزدار ۋنيۆەرسيتەتىنىڭ 75 جىلدىعى اياسىندا قولعا الىنعان جوبانىڭ كوزدەگەن ماقساتى مول. جوبا وقۋ ورنى تۇلەكتەرىنىڭ باسەكەگە قابىلەتتىگىن ارتتىرىپ، ولاردىڭ جۇمىسپەن قامتاماسىز ەتۋىنە ىقپال جاسايدى. سونىمەن قاتار پەداگوگتاردىڭ كاسىبي الەۋەتىن جەتىلدىرەدى جانە ءبىلىم بەرۋدە جاڭا تەحنولوگيالاردى قولدانۋدى دامىتادى. ۋنيۆەرسيتەت ستۋدەنتتەرىنىڭ باسىم بولىگى اۋىلدىق مەكتەپتەردىڭ تۇلەگى ەكەندىگىن ەسكەرەتىن بولساق، اتالعان ءبىلىم ۇيالارى جاڭا ءبىلىم بەرۋ باعدارلامالارىن تولىققاندى مەڭگەرىپ، جەتە تانىسقانى وتە ماڭىزدى.

ەلباسى نۇرسۇلتان نازارباەۆ ەلىمىزدى عىلىمي-يننوۆاتسيالىق سالادا زور سەرپىلىس جاساپ، ەۋرازيالىق كەڭىستىكتە وسى سالانىڭ كوشباسشىلاردىڭ ءبىرى بولۋ قاجەتتىگىن مىندەتتەدى. ول ءۇشىن نە ىستەمەك كەرەك؟ راسىندا دا بۇگىندە جان-جاقتى دامىعان عىلىمسىز وركەنيەتتى مەملەكەتتەردىڭ قاتارىنا قوسىلۋ مۇمكىن ەمەس ەكەنى بارشاعا بەلگىلى اقيقات. قازاقستان جاس پەداگوگ-عالىمدارىنىڭ ءبىرىنشى رەسپۋبليكالىق سلەتى مەن قاۋىمداستىق سول عىلىم الەمىندە باق سىناپ جۇرگەن جاس ۇرپاق وكىلدەرىن باسىن قوساتىن شارا. تۋراسىن ايتساق، سول جاستاردىڭ بولاشاعى – ەلدىڭ كەلەشەگى، ۇلتتىڭ ەرتەڭى. بۇل تاراپتا الدىمىزعا قويىپ وتىرعان مىندەتتەر اسا اۋقىمدى. ول ءۇشىن بارىمىزگە ۇلكەن كۇش-قايرات، ەرىك پەن جىگەر كەرەك. باستىسى – ساپالى ءبىلىم مەن عىلىم كەرەك. قازاقستان ەكونوميكاسىنىڭ وزەگى ءبىلىم مەن عىلىمعا نەگىزدەلۋى قاجەت. سوندا عانا جوسپارىمىز ورىندالىپ، كوزدەگەن ماقسات ۇدەسىنەن شىعاتىنىمىزعا سەنىمدىمىز.

ۋنيۆەرسيتەتتىڭ الەمنىڭ بەدەلدى جوعارى وقۋ ورىندارىمەن ارىپتەستىك بايلانىسى دا ارتىپ كەلەدى. بۇگىندە قىزدار ۋنيۆەرسيتەتى جاھاننىڭ 70-تەن استام جوعارى وقۋ ورنىمەن ىنتىماقتاستىق ورناتقان. ولاردىڭ قاتارىندا اقش، ۇلىبريتانيا، ءۇندىستان، تۇركيا، فرانتسيا، قىتاي، رەسەي، گەرمانيا، مالايزيا سىندى مەملەكەتتەردىڭ بەدەلدى ۋنيۆەرسيتەتتەرى بار. وتكەن جىلى ۋنيۆەرسيتەت عالىمدارىنان جاساقتالعان دەلەگاتسيا شەتەلدىڭ بىرنەشە جەتەكشى جوعارى ورنىنا ارنايى ءىس-ساپارمەن بارىپ، بىرقاتار كەلىسىمدەرگە قول جەتكىزدى. اتاپ ايتقاندا، قازاق ۇلتتىق قىزدار پەداگوگيكالىق ۋنيۆەرسيتەتى مەن ۇلىبريتانيانىڭ Western International سollege ءبىلىم بەرۋ، عىلىمي جانە مادەني بايلانىستار بويىنشا ءوزارا ىنتىماقتاستىق جونىندەگى مەموراندۋمعا قول قويدى. قۇجات اكادەميالىق ۇتقىرلىق باعدارلاماسى اياسىندا ستۋدەنتتەر، پروفەسسور-وقىتۋشىلار مەن عىلىمي قىزمەتكەرلەر الماسۋدى، بىرلەسىپ عىلىمي-زەرتتەۋ جوبالارىن ازىرلەپ، جۇزەگە اسىرۋدى، اعىلشىن ءتىلى كۋرستارىن ۇيىمداستىرۋدى، قوس ديپلومدى ءبىلىم بەرۋ باعدارلاماسى اياسىندا وقىتۋدى قاراستىرادى. سونىمەن قاتار پولشاعا جاساعان ارنايى ءىس-ساپارىمىزدىڭ اياسىندا كاتوۆيتسەدەگى ىرگەلى جوعارى وقۋ ورنى – سيلەز ۋنيۆەرسيتەتىنىڭ رەكتورى اندجەي كوۆالچيكپەن كەزدەسىپ، ارىپتەستىك بايلانىس ورناتۋعا ۋاعدالاستىق. سونداي-اق قازاق ۇلتتىق قىزدار پەداگوگيكالىق ۋنيۆەرسيتەتى مەن تۇركيانىڭ نيدە ومەر حاليسدەمير ۋنيۆەرسيتەتى بىرلەسىپ لاتىن گرافيكاسىنا نەگىزدەلگەن قازاق ءالىپبيىن ۇيرەتۋگە بايلانىستى بىرنەشە تىڭ جوبانى جۇزەگە اسىرماق. بۇعان تۇركيا تاراپى ناقتى قولداۋ كورسەتۋگە مۇددەلى جانە ارنايى جۇمىس توبى قۇرىلاتىن بولادى. بۇل تۋرالى قوس جوعارى وقۋ ورىندارىنىڭ باسشىلارى اراسىندا كەلىسسوز ناتيجەسىندە بەلگىلى بولدى. ەكىجاقتى ىنتىماقتاستىقتىڭ جانە ارىپتەستىكتى نىعايتۋدىڭ وزەكتى ماسەلەلەرىن تالقىلاۋ بارىسىندا قوسديپلومدى ءبىلىم بەرۋ باعدارلامالارىن ىسكە اسىرۋ جايى دا تالقىلاندى.

قازاقستان رەسپۋبليكاسىنىڭ  تۇڭعىش پرەزيدەنتى – ەلباسى نۇرسۇلتان نازارباەۆتىڭ 2018 جىلعى 25 جەلتوقسانداعى جارلىعىمەن قازاق مەملەكەتتىك قىزدار پەداگوگيكالىق ۋنيۆەرسيتەتىنە «ۇلتتىق» مارتەبەسى بەرىلدى. بۇل تاريحى تەرەڭ قاراشاڭىراقتىڭ الەمدىك ءبىلىم كەڭىستىگىندە ءوز ورنىن ايقىنداۋعا باعىتتالعان ىرگەلى قادام بولدى. مەملەكەت باسشىسىنىڭ سەنىمى وقۋ ورنىنىڭ الەۋەتىن كوتەرىپ، باسەكەگە قابىلەتتىگىن ارتتىرۋعا سەرپىن بەرەدى جانە ۇجىمعا زور جاۋاپكەرشىلىك جۇكتەيدى.

گاۋحار الدامبەرگەنوۆا،

قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى، پەداگوگيكا عىلىمدارىنىڭ دوكتورى، پروفەسسور

سوڭعى جاڭالىقتار