21 تامىز, 12:17 457 0 تەحنولوگيالار ءTúrkىstan International Political Weekly

تۋريستەر اۋديوگيد كومەگىنە جۇگىنە الادى

تۇركىستانداعى «ازىرەت سۇلتان» مەملەكەتتىك تاريحي-مادەنيەت قورىق-مۋزەيىندە اۋديوگيد جوباسى ىسكە قوسىلدى.

ەندى كەسەنەگە كەلۋشىلەر مەن تۋريستەر اتالعان قۇرىلعىدان قازاق، ورىس، اعىلشىن تىلدەرىندە مالىمەت الىپ، ساياحات جاساي الادى.

كەسەنەنى ارالاۋشىلار تاريحي ورىننىڭ ارحيتەكتۋراسى مەن قۇرىلىمى، ياساۋي ءومىرى، حاندار مەن بي-سۇلتاندار، تاريحي جادىگەرلەرمەن تانىسقىسى كەلسە اۋديوگيد قۇرىلعىسىنىڭ كومەگىنە دە جۇگىنە الادى.

قازىرگى تاڭدا اۋديوگيد جوباسىنا كەسەنەنىڭ ءىشى عانا ەنگىزىلسە، جاقىن كۇندەرى قورىق-مۋزەيگە قاراستى مادەني - تاريحي ورىندار مەن ارحەولوگيالىق قازبا جۇمىستارى جايلى مالىمەتتەر قامتىلاتىن بولادى دەپ كۇتىلۋدە.

«العاشقى جوبا رەتىندە 10 قۇرىلعى ىسكە قوسىلدى. ءاربىر قوناق اۋديوگيد قىزمەتىن تاڭعى ساعات 08:00-دەن كەشكى 20:00 ارالىعىندا 1 ساعات بويى قولدانا الادى. اتالعان قىزمەت ءتۇرى – تەگىن كورسەتىلەدى. اپپارات قولدى بولىپ كەتپەس ءۇشىن كەسەنە ىشىندەگى جاۋاپتى قىزمەتكەرلەرگە كەپىل رەتىندە جەكە قۇجات تاپسىرىلۋى ءتيىس»،- دەيدى تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ.

كەسەنە قىزمەتكەرلەرىنىڭ سوزىنشە، تەلەديدار ءپۋلتى ءتارىزدى شاعىن قۇرىلعىداعى تاريحي اقپاراتتاردى بەلگىلى ءبىر ساندار رەتتىلىگى ارقىلى تىڭداۋعا بولادى. ماسەلەن، 1 سانى قوجا احمەت ءياساۋيدىڭ ءومىرى مەن مۇرالارى بولسا، 2 سانى كەسەنەنىڭ سالىنۋ تاريحى جانە ارحيتەكتۋرالىق كەلبەتىنە ارنالعان. اۋديوگيد اپپاراتىن ەڭ العاشقى بولىپ پايدالانعان فرانتسيادان كەلگەن تۋريست قۇرىلعىنىڭ تۋريستەر ءۇشىن وتە كەرەمەت كومەكشى ەكەنىن ايتادى.

«ساۋلەتتىك كەلبەتى جاعىنان ءستيلى ەرەكشە عيماراتتىڭ سالىنۋ تاريحى، تايقازان، تاريحي ماڭىزى بار ۇلكەن بولمەلەر جايلى اقپاراتتار ەرەكشە قىزىقتىردى. اۋديوگيد قاجەتتى اقپاراتتى الا وتىرىپ، وڭاشا سەرۋەندەۋگە دە وتە قولايلى. قازاقستانعا جاساعان ساپارىمنىڭ بارىسىندا تۇركىستانداعى جاڭالىقتىڭ ەڭ العاشقى قولدانۋشىسى بولعانىم مەن ءۇشىن تاريحي جاعداي»،- دەدى مەرلين.

ايتا كەتسەك، اۋديوگيد جوباسى ءۇش تىلدە قولعا الىنعانىمەن الداعى ۋاقىتتا تۇرىك، فرانتسۋز، قىتاي تىلدەرىن دە قوسۋ جوسپارلانۋدا. سونىمەن قاتار، كوزى ناشار كورەتىن جاندارعا دا ارناپ جəدىگەرلەر سيپاتتالعان ءماتىن جانە دىبىستىق جازۋى بار نۇسقاسى ەنگىزىلمەك.

 

 

سوڭعى جاڭالىقتار