20 تامىز, 21:07 355 0 الەۋمەت Túrkistan Gazeti

دارىگەرگە قول كوتەرگەن الماتىلىق جۇكتى ايەلگە ايىپپۇل سالىندى

الماتىدا قۇرساعىنداعى بالاسىنىڭ جۇرەگى سوقپاي تۇر دەگەندى ەستىگەن كەلىنشەك دارىگەرگە قول كوتەردى، دەپ حابارلايدى قازاقپارات.

الماتىداعى №7-ءشى قالالىق اۋرۋحانادا شۋ شىعارىپ، دارىگەرگە قول كوتەرگەن ەمدەلۋشىگە 25 مىڭ تەڭگە كولەمىندە ايىپپۇل سالىندى. 7-ءشى قالالىق اۋرۋحانانىڭ گينەكولوگى گۇلميرا جاماەۆانىڭ ايتۋىنشا، جۇكتى كەلىنشەك ونىڭ كابينەتىنە كىرىپ، اقىلى ۋدز-عا تۇسكەن.

«تەكسەرىلۋگە كەلگەن كەلىنشەك ورىندىققا وتىرا سالىپ، تەلەفون ارقىلى بىرەۋمەن قاتتى ۇرسىستى. مەن ودان تىنىشتالۋىن سۇرادىم. سودان كەيىن ۋلترادىبىستىڭ ناتيجەسىن بەرۋىن ءوتىندىم. ول ماعان جاتىرداعى ۇرىقتىڭ جۇرەك سوعىسى جوق ەكەنىن ايتتى. ول ۋدز جۇكتىلىكتىڭ سەگىزىنشى اپتاسىندا ءتۇستى. نەگىزى جۇرەك سوعىسى بەسىنشى اپتادا سەزىلەدى. مەن وعان مۇنداي جاعدايدا شارانانىڭ ىشتە قاتىپ قالعانىن، جۇرەك سوعىسى جوقتىعىن ايتتىم»،-دەيدى دارىگەر.

مۇنى ەستىگەن كەلىنشەك، اشۋعا بوي الدىرىپ، دارىگەردىڭ ۇستەلىندەگى كومپيۋتەردى لاقتىرىپ، دارىگەرگە قول جۇمساعان. سوسىن تىركەۋ بولىمىندەگى قىزمەتكەرگە دورەكى سويلەپ، بەتىنە تۇكىرىپ جىبەرگەن. جۇمىس ورنىندا بولعان گينەكولوگ ناۋقاستى سوتقا بەردى. سوت وعان دارىگەردى قورلادى جانە ۇردى دەپ ايىپ تاعىپ ، 10 اەك ايىپپۇل سالدى. «سوتتا ول جىلادى، بىراق مەنەن كەشىرىم سۇرامادى. سوت كەلىنشەكتى كىنالى دەپ تانىپ، وعان ايىپپۇل سالدى»،-دەيدى دارىگەر گۇلميرا جاماەۆا.

تەگتەر دارىگەر

سوڭعى جاڭالىقتار