16 تامىز, 17:44 357 0 جاڭالىقتار Túrkistan Gazeti

اقتوبەلىك مۇنايشىلار ەكولوگيالىق ۇستەماقىنىڭ ءبىر بولىگىن سوت ارقىلى ءوندىرىپ الدى

اقتوبەدەگى مۇناي كومپانياسىنىڭ جۇمىسشىلار سوت ارقىلى ەكولوگيالىق ۇستەماقىنى تالاپ ەتتى. سوت تەك ءبىر جىلدىق اقشانى وندىرۋگە شەشىم شىعاردى، دەپ حابارلايدى قازاقپارات.

«ساعىز پەترولەۋم كومپاني» جشس-ءىن 50-دەن استام جۇمىسشىسى سوتقا بەردى. ولار 2013 جىلدان بەرى زاڭ بويىنشا تيەسىلى ەكولوگيالىق ۇستەماقىنى الماعان، ءتىپتى، وزدەرىنە بۇل اقشانىڭ تيەسىلى ەكەنىن بىلمەگەن. بۇگىن №2 قالالىق سوتتا شەشىم شىعارىلدى. ساعىز پەترولەۋم كومپاني» جشس-نە جۇمىسشىلارعا ەكولوگيالىق ۇستەماقى تولەم بەرۋ مىندەتتەلدى. بىراق جۇمىسشىلار كۇتكەندەي 6 جىلدىق ەمەس، ءبىر جىلدىڭ اقىسى ەسەپتەلدى. «مۇناي كومپانياسى ورنالاسقان جەر ەكولوگيالىق ايماققا جاتادى. سوندىقتان زاڭ بويىنشا ەكولوگيالىق ۇستەماقى جالاقىعا قوسىلۋى ءتيىس. دەگەنمەن سوت ارىزدى ءىشىنارا قاناعاتتاندىردى.

2017 جىلدىڭ تامىزى مەن 2018 جىلدىڭ ماۋسىم ايىنا دەيىنگى ارالىق وندىرىلەدى. جۇمىسشىلاردىڭ وزدەرى 2017 جىلدىڭ تامىزىندا بىلگەن. ال 2013 جىلدان 2017 جىلدىڭ تامىزىنا دەيىنگى ارالىقتى ءوندىرۋ ارىزىن قاناعاتتاندىرۋسىز قالدىردى. سەبەبى ارىز ءتۇسىرۋ ۋاقىتى ءوتىپ كەتكەن»، - دەپ ءتۇسىندىردى سۋديا نازگۇل قاناپيا.

جۇمىسشىلار بۇل شەشىمگە كەلىسپەيتىندەرىن، اپەللياتسيالىق شاعىم تۇسىرەتىنىن جەتكىزدى. «مەن سوت شەشىمىمەن كەلىسپەيمىن. ءبىز شىن مانىندە بىلمەي قالدىق، ۋاقىت وتكىزىپ العانىمىز ءبىزدىڭ كىنامىز ەمەس. مىندەتتى تۇردە قايتا ارىز جازامىز، جوعارى سوتقا دەيىن بارامىز. ماعان 1,9 ميلليون تەڭگە بەرۋ كەرەك ەدى، سوت تەك 200 مىڭ تەڭگەنى ءوندىرىلدى»، - دەدى مۇنايشى عالىمجان بايبولسىنوۆ. ايتا كەتەيىك، مۇناي كومپانياسىندا 400-دەن استام جۇمىسشى بار. ولاردىڭ تەك ءبىر بولىگى عانا سوتقا جۇگىنىپ، ءوز قۇقىقتارىن قورعادى.

سوڭعى جاڭالىقتار