16 تامىز, 16:21 371 0 جاڭالىقتار Túrkistan Gazeti

اقتوبەلىك ەرىكتىلەر 4 جاستاعى قىزدى وگەي اكەسىنەن قۇتقاردى

اقتوبەدە 4 جاستان اسقان قىز اناسى قايتىس بولعان سوڭ وگەي اكەسىمەن قالعان. ىشىمدىكتىڭ ورتاسىنا اينالعان ۇيدەن كىر-قوجالاق بالانى پوليتسيا الىپ شىقتى، دەپ حابارلايدى قازاقپارات.

سال اۋرۋىنا شالدىققان بالانىڭ مۇشكىل ءحالى تۋرالى ەرىكتىلەرگە الەۋمەتتىك جەلى ارقىلى حابار تۇسكەن. حابار بەرگەن اقتوبەلىك ول ءۇيدىڭ ىشىمدىك ۇياسى، اشۋلى ادامداردىڭ دەنساۋلىققا زيان كەلتىرۋى مۇمكىن ەكەنىن دە ەسكەرتتى. ەرىكتىلەر جانىنا پوليتسيا قىزمەتكەرلەرىن ەرتىپ، 4 جاستان اسقان قىزدى ۇيدەن الىپ شىقتى.

«ەكى جىل بۇرىن قىزدىڭ اكەسى قايتىس بولىپ، اناسى ازاماتتىق نەكەدەگى كۇيەۋىمەن تۇرعان. تامىز ايىنىڭ 8-ىندە اناسى كوز جۇمىپ، كىشكەنتاي مۇگەدەك قىز وگەي اكەسىنىڭ قاراۋىندا قالعان. بۇل ءۇي ىشىمدىك ىشەتىن ادامداردىڭ جەرىنە اينالىپ كەتكەن. ءبىز پوليتسيامەن بىرگە بارىپ، كىشكەنتاي قىزدى الىپ كەتتىك. قىزدىڭ كۇيى ادام شوشىرلىق جاعدايعا تۇسكەن. شاشى تارالماعان، بەتى جىرىلعان. ارەڭ تىنىس الادى، وكپەسى سىرىلدايدى. دەنە قىزۋى كوتەرىلىپ، دەرتى اسقىنا تۇسكەن. كەيىن قالالىق قورعانشىلىق ورگاندارىمەن بىرگە «ءۇمىت» سابيلەر ۇيىنە اپارىپ، باقىلاۋعا الدىق. ءبىز الداعى ۋاقىتتا دا بارىپ، كومەك كورسەتىپ تۇرامىز»، - دەدى ەرىكتى ەكاتەرينا گولوتينا. «ءۇمىت» سابيلەر ۇيىنە قابىلدانعان 4 جاستاعى قىز قازىر ەم الىپ جاتىر. دارىگەرلەردىڭ ايتۋىنشا، بالانىڭ جاعدايى ورتاشا اۋىر. «تۋا ءبىتتى جۇرەك اۋرۋىمەن ەسەپتە تۇر. وعان كەزىندە وتا دا جاسالعان. ءارى اناسىنان بالاسىنا جيتس جۇقپالى اۋرۋى بەرىلگەن سەكىلدى. بۇل دياگنوز ءالى انىقتالادى»، - دەدى سابيلەر ءۇيىنىڭ ءبولىم مەڭگەرۋشىسى نۇرگۇل سارمانوۆا.

سوڭعى جاڭالىقتار