16 تامىز, 11:08 373 0 سپورت ءTúrkىstan International Political Weekly

توكيو وليمپياداسىندا روبوتتار قىزمەت كورسەتەدى

جاپونيالىقتار توكيو وليمپياداسىنا ەرەكشە دايىندالۋدا. ەل بيلىگى مەن حالقى تورتكۇل دۇنيەنىڭ ساڭلاقتارى سايىساتىن بايراقتى باسەكەنى بۇرىنعىدان وزگەشەلەۋ وتكىزبەك. كۇنشىعىس ەلى زاماناۋي تەحنولوگيالاردى پايدالانىپ، وليمپيادا تاريحىندا بۇرىن-سوڭدى بولماعان باستامانى قولعا الىپ وتىر. سپورت دوداسىندا قوناقتارعا قاراپايىم ادامداردان بولەك، روبوتتار قىزمەت كورسەتەدى.

توكيو وليمپياداسىنىڭ باستالۋىنا 1 جىلدان از ۋاقىت قالدى. كەلەر جىلدىڭ 24 شىلدەسىندە كەزەكتى جازعى وليمپيادا ويىندارىنىڭ  تۇساۋى كەسىلەدى. قازىر كۇنشىعىس ەلىنىڭ بيلىگى تورتجىلدىقتىڭ ەڭ ماڭىزدى سپورت وقيعاسىنا تىڭعىلىقتى دايىندالىپ جاتىر. جاپون ەلى سپورتتاعى الەۋەتىن عانا ەمەس، تەحنولوگياداعى جەتىستىكتەرىن دە پاش ەتۋدى كوزدەپ وتىر. بۇل وسى جولعى جازعى وليمپيادانىڭ باستى ەرەكشەلىگى بولماق.

وليمپيادا ويىندارىنا ارنايى روبوتتار قۇراستىرىلعان. قۇلتەمىرلەر كەلۋشىلەرگە بارىنشا كومەكتەسىپ، جول كورسەتەدى. جالپى توكيو وليمپياداسى ادامزات تاريحىنداعى ەڭ يننوۆاتسيالىق دودا بولماق. ۇيىمداستىرۋشىلار وسى سەنىمنەن شىعۋ ءۇشىن بايراقتى باسەكەگە ادامنىڭ ءجۇزىن تانيتىن جۇيە ەنگىزبەكشى. ياعني جارىسقا قاتىساتىن سپورتشىلاردىڭ، قىزمەتكەرلەر مەن اقپارات قۇرالدارى وكىلدەرىنىڭ سۋرەتتەرى روبوتتىڭ بازاسىندا ساقتاۋلى بولادى. وسىلايشا، اتالعان جۇيە ادامداردى اۆتوماتتى تۇردە تانىپ، ىشكە كىرۋگە رۇقسات بەرەدى. «بۇل باستاما وليمپيادا كەزىندە قاۋىپسىزدىكتى ارتتىرۋعا سەپتىگىن تيگىزەدى»، – دەيدى ماماندار.

«وليمپيادا كەزىندە جارىس وتەتىن جەرلەرگە بوتەن ادامدار مەن بوگدە زاتتاردىڭ كىرىپ كەتپەۋى قاتاڭ قاداعالانادى. ال بەتتى تانيتىن جۇيە بۇل جۇمىستى الدەقايدا جەڭىلدەتەدى دەپ ويلايمىز. ويتكەنى كومپيۋتەر، كۇزەتشىلەرگە قاراعاندا، ادامنىڭ بەتىن دالىرەك تانيدى جانە قاتەلەسۋى مۇمكىن ەمەس. قىسقاسى، بۇل باستاما الداعى جازعى ويىنداردا بىزگە كەرەمەت كومەكشى بولماق» – دەيدى توكيو وليمپياداسىنىڭ قاۋىپسىزدىك جونىندەگى اتقارۋشى ديرەكتورى تسۋيوسي يۆاسيتا

2020 جىلى تورتكۇل دۇنيە كوز تىگەتىن ءدۇبىرلى دودادا جانكۇيەرلەر وزدەرىن جايلى سەزىنۋلەرى ءۇشىن دە بارلىق جاعداي جاسالماق. ۇيىمداستىرۋشىلار شىلىڭگىر شىلدەنىڭ اپتاپ ىستىعىنان جانكۇيەرلەردى قورعاۋ ءۇشىن بارلىق كەشەندەرگە سالقىنداتقىشتار ورناتادى. ال اۆتوبۋس ايالدامالارىنا سۋ بۇركيتىن اپپاراتتار قويىلماق.

توكيو قالاسىنىڭ گۋبەرناتورى يۋريكو كويكە «قازىر بىزدە كۇن قاتتى ىسىپ كەتتى. سپورتشىلار ءۇشىن بۇل قالىپتى جاعداي. ولار دايىندىقتارىن جۇرگىزە بەرەدى. ال الەمنىڭ تۇكپىر-تۇكپىرىنەن كەلەتىن جانكۇيەرلەر ءۇشىن اۋىر بولماق. سوندىقتان ولار ەشقانداي قولايسىزدىقتى سەزبەيتىندەي جاعداي جاساۋعا تىرىسىپ جاتىرمىز. كەلەسى جىلى توكيو-2020 وليمپياداسىندا 42 سپورت نىسانى جۇمىس ىستەيدى. وعان 11 مىڭنان اسا سپورتشى قاتىسادى دەپ كۇتىلۋدە. ال مۋلتيسپورتتىق دودانى ۇيىمداستىرۋعا 200 مىڭنان اسا ەرىكتى كومەكتەسەدى. قالاي بولعاندا دا تورتكۇل دۇنيە اسىعا كۇتىپ جۇرگەن بايراقتى باسەكە تارتىسقا تولىپ بولىپ، كوپشىلىكتىڭ كوڭىلىنەن شىعادى دەپ سەنەمىز»، – دەپ وتىر.

سوڭعى جاڭالىقتار