15 تامىز, 18:45 810 0 جاڭالىقتار Túrkistan Gazeti

تامىز كەڭەسى – وزەكتى ماسەلەلەر كوتەرىلەتىن الاڭ

جىل سايىن تامىز ايىندا وتەتىن پەداگوگتاردىڭ تامىز كونفەرەنتسياسىندا ەلدەگى ءبىلىم، عىلىم سالاسىنىڭ تۇيىتكىلدى ماسەلەلەرى تالقىلانادى. بيىلعى القالى جيىن 16-تامىز كۇنى نۇر-سۇلتان قالاسىندا وتەدى. بۇل تۋرالى BAQ.KZ حابارلادى.

جيىنعا قاتىسۋشىلاردىڭ ءبىرى – تاراز قالاسىنداعى بالالاردى قولداۋ ورتالىعىنىڭ ديرەكتورى ايجان مەيرحانوۆا وسىعان بايلانىستى پىكىر بىلدىرگەن ەدى.

«مەن جەتىم بالالارمەن جانە اتا-انانىڭ قامقورلىعىنسىز قالعان بالالارمەن جۇمىس ىستەيمىن. 2018 جىلى ك.سارىمولداەۆ اتىنداعى جەتىم بالالار ءۇيى كامەلەتتىك جاسقا تولماعان بالالارعا ارنالعان ورتالىقپەن قوسىلىپ، «قيىن جاعدايداعى بالالاردى قولداۋ ورتالىعى» بولىپ قايتا قۇرىلدى. ءبىزدىڭ ورتالىقتا بالالاردىڭ ءومىر ءسۇرۋى مەن دامۋى ءۇشىن بارلىق جاعداي جاسالعان. جەتىم بالالاردى وتباسىلارعا ورنالاستىرۋ، ياعني پوتروناتتىق تاربيەلەۋ، بالانى قامقورلىققا الۋ، اسىراپ الۋ بويىنشا جۇمىستار جاساۋدامىز. سونداي-اق، وتباسىلىق تيپتەگى بالالار ءۇيىن قۇرۋ بويىنشا شارالار اتقارىلۋدا. بالا اسىراپ الۋعا نيەتتى اتا-انالارعا كەڭەس بەرەمىز. بالالارعا الەۋمەتتىك كومەك كورسەتەمىز، ولاردىڭ مۇلىكتىك قۇقىعىن قورعاۋىنا قولداۋ بىلدىرەمىز. ءبىزدىڭ ورتالىقتىڭ تۇلەكتەرى كاسىپتىك ءبىلىم بەرەتىن كوللەدجدەرگە، جوعارعى وقۋ ورىندارىندا ءبىلىم الادى. بۇل جەردە دە ءبىز ولارعا ۇنەمى قولداۋ كورسەتىپ وتىرامىز»، - دەيدى ايجان مەيرحانوۆا.

ايجان مەيرحانوۆا بيىلعى تامىز كەڭەسىندە اتا-انانىڭ قامقورلىعىنسىز قالعان بۇلدىرشىندەردى قولداۋ ماسەلەلەرى كوتەرىلىپ، وسى باعىتتاعى شارالار مەملەكەت تاراپىنان قولداۋعا يە بولادى دەگەن ويدا.

«ەلباسى ن.نازارباەۆ ءبىر سوزىندە «جەتىمدەر ءۇيى – بۇل ماسەلە مەنى قاتتى الاڭداتادى.قازاقستاندا بالالار ءۇيى بولماۋى ءتيىس دەپ ەسەپتەيمىن» دەگەن ەدى. بۇگىندە ەلىمىزدەگى وتباسىلارىڭ بالا اسىراپ الۋىنا جاعداي جاسالۋدا. وسىلايشا، ەلدەگى بالالار ءۇيىنىڭ سانى ازايۋدا. تامىز كەڭەسى – ءبىلىم بەرۋ، بالالاردى قورعاۋ سالاسىندا ەڭبەك ەتەتىن مامانداردىڭ باس قوسىپ، ۇرپاق تاربيەسىندەگى كەلەلى ماسەلەلەردى قوزعاپ، ءوزارا پىكىر الماساتىن ورىن. بيىلعى تامىز كەڭەسىندە قيىن جاعدايداعى بالالاردى قورعاۋ، قولداۋعا بايلانىستى وزەكتى پروبلەمالار كوتەرىلەدى دەگەن ويدامىن»، - دەيدى مەيرحانوۆا

سوڭعى جاڭالىقتار