15 تامىز, 18:25 351 0 قاۋىپسىزدىك Túrkistan Gazeti

نۇر-سۇلتاندا پوليتسەي شاقالاقتى ورتكە ورانعان ۇيدەن الىپ شىقتى

ەلوردا تۇرعىندارى ورتەنىپ جاتقان ۇيدەن جاڭا تۋعان ءسابيدى الىپ شىققان پوليتسيا قىزمەتكەرىنە العىس ايتتى، دەپ حابارلايدى قازاقپارات ءتىلشىسى قر ءىىم ءباسپاسوز قىزمەتىنە سىلتەمە جاساپ.

ءىىم-نەن حابارلانعانداي، 12 تامىزدىڭ تۇنىندە نۇر-سۇلتان قالاسىنداعى تۇرعىن ءۇي كەشەندەرىنىڭ بىرىنەن ءورت شىققان. پاتەر يەسى جانار سادۋاقاسقىزى ءوز ۇيىندە 14 جاستاعى قىزى مەن جاڭا تۋعان ۇلىمەن وتىرعان. ءتىلسىز جاۋدى بايقاعاننان كەيىن ول بىردەن ءورت سوندىرۋشىلەرگە حابار بەرىپ ۇلگەرەدى. اقىرى، ءوز ۇيىنەن وزدىگىنەن شىعا المايتىنىن اڭعارعاننان كەيىن ەسىكتى اشىق قالدىرعان كۇيى بالكونعا شىعىپ، سىرتتا جۇرگەندەردى كومەككە شاقىرا باستاعان.

«مەن ۇلىمنىڭ اۋزىن دىمقىل شۇبەرەكپەن جاۋىپ قويدىم. بارىنشا اۋا جۇتقانىن قالادىم. بىراق، ءۇيدى كوك ءتۇتىن الىپ كەتكەننەن كەيىن دەمالۋدىڭ ءوزى قيىنعا تۇسە باستادى. جانىمدا 14 جاستاعى قىزىم بار ەدى. كۇيەۋىم بۇل ۋاقىتتا قاراعاندىدان كەلە جاتقان. قانشا ۋاقىتتىڭ وتكەنىن بىلمەيمىن... ءبىرازدان سوڭ ۇيگە پوليتسيا قىزمەتكەرىنىڭ كىرىپ كەلە جاتقانىن بايقادىم. پوليتسيانى شاقىرماعان ەدىم، سوندىقتان تاڭعالىپ قاراپ قالىپپىن. قۇقىق قورعاۋشى ءبارىمىزدى تىنىشتاندىرىپ، ەشقانداي قورعايتىن كيىمسىز ءبىزدى سىرتقا الىپ شىقتى. سول كۇندى ويلاسام ءالى كۇنگە دەيىن جانىم تۇرشىگەدى. ءتارتىپ ساقشىسىنا العىسىمدى قالاي بىلدىرەرىمدى بىلمەيمىن. دىنمۇحامەد سەكىلدى پوليتسەيلەر كوپ بولسا دەگەن تىلەگىم بار. ونىڭ قايسارلىعى مەن كاسىبيلىگىنىڭ ارقاسىندا ءبىز قاۋىپتەن امان قالدىق. ونىڭ ارىپتەسى دە راتسيا ارقىلى جاعدايدىڭ ءبارىن باقىلاۋىندا ۇستاپ وتىردى. ءبىز وسى ەكى پوليتسيا قىزمەتكەرىنە كوپ راحمەت ايتامىز»، - دەدى جانار سادۋاقاسقىزى.

ءورت كەزىندە قايسارلىق تانىتقان پوليتسيا قىزمەتكەرلەرىنىڭ ەسىمى – نۇر-سۇلتان قالالىق پوليتسيا دەپارتامەنتى پاترۋلدىك پوليتسيانىڭ پولك قىزمەتىنىڭ ينسپەكتورى، اعا لەيتەنانت دىنمۇحامەد ماسادىقوۆ پەن اعا لەيتەنانت ەرنار اقانوۆ. «ۇيدە كىشكەنتاي ءبۇلدىرشىننىڭ بارىن بىلگەن كەزدە ەڭ الدىمەن سونى قۇتقارۋدى ويلادىم. سەبەبى، ەرەسەك ادامدار كوك تۇتىنگە شىداس بەرگەنىمەن، ءسابي ونى كوتەرە الا ما!؟ قولىمنان كەلگەنىنىڭ ءبارىن جاسادىم. ءبارى ءساتتى اياقتالعانىنا قۋانىشتىمىن»، - دەدى دىنمۇحامەد.

سوڭعى جاڭالىقتار