15 تامىز, 16:13 353 0 جاڭالىقتار Túrkistan Gazeti

ەلوردا اكىمى مەكتەپ ديرەكتورلارىمەن كەزدەستى

نۇر-سۇلتان قالاسىنىڭ اكىمى التاي كولگىنوۆ وقۋ جىلى قارساڭىندا مەكتەپ ديرەكتورلارىمەن كەزدەستى. قالا باسشىسى حالىقتىڭ وسۋىنە بايلانىستى الەۋمەتتىك نىساندارعا جۇكتەمە ارتىپ كەلە جاتقانىن اتاپ ءوتتى. بۇل تۋرالى قالا اكىمدىگىنىڭ رەسمي سايتى حابارلادى.

ەلوردادا 10 جىل بۇرىن 73 مەكتەپ پەن 75 مىڭ وقۋشى بولسا، قازىرگى تاڭدا 108 مەكتەپ پەن 162 مىڭ وقۋشى بار. قىركۇيەك ايىندا  24 مىڭ بالا مەكتەپ تابالدىرىعىن اتتايدى. سونىمەن قاتار 17 مىڭ پەداگوگ ەڭبەك ەتۋدە.

وقۋ ورىندارىن بيۋدجەت ەسەبىنەن عانا ەمەس، جەكە ينۆەستيتسيالاردى تارتۋ ارقىلى دا سالۋ كەرەك. ينۆەستورلار ەلوردادا 11 جەكە مەنشىك مەكتەپ سالۋعا نيەت ءبىلدىرىپ وتىر. ينۆەستيتسيا كولەمى 27,6 ملرد تەڭگەنى قۇرايدى. 5 جىلدىڭ ىشىندە 37 جاڭا مەكتەپ سالۋ جوسپارلانعان. بيىل 3 جاڭا مەكتەپ سالىنادى.

كەزدەسۋ بارىسىندا وقۋ ورىندارىنىڭ ديرەكتورلارى مەكتەپتەردە ورىن تاپشىلىعى بار ەكەنىن، كەيبىر مەكتەپتەردە بەينەباقىلاۋ كامەرالارىنىڭ جوقتىعىن، جولداردىڭ ناشار ەكەندىگىن، ماتەريالدىق-تەحنيكالىق قامتۋ دارەجەسىنىڭ تومەن دەڭگەيدە بولۋى سياقتى ماسەلەلەردى ايتىپ جەتكىزدى. قالا اكىمى ا. كولگىنوۆ ورتاشا جوندەۋ جۇمىستارى 32 مەكتەپتە، ال كۇردەلى جوندەۋ جۇمىستارى 8 مەكتەپتە جۇرگىزىلىپ جاتقانىن اتاپ ءوتتى.

«ەلىمىزدە ءبىلىم بەرۋ جۇيەسىنە ەرەكشە كوڭىل بولىنەدى.پەداگوگتاردىڭ بىلىكتىلىگى وتە ماڭىزدى ماسەلەلەردىڭ ءبىرى. بالالاردىڭ مەكتەپ باعدارلاماسىن قانشالىقتى جاقسى مەڭگەرۋى جانە مەكتەپتەن قانداي ءبىلىم الىپ شىعاتىندىعى تەك سىزدەرگە بايلانىستى. ءبىلىم بەرۋ پروتسەسىنىڭ ساپاسىنا كوڭىل ءبولۋ كەرەك. ۋاقىتتىڭ باسىم بولىگىن بالالار مەكتەپتە وتكىزەدى، ولاردىڭ جەكە تۇلعا بولىپ قالىپتاسۋى دا مەكتەپتەن باستاۋ الادى. وقۋشىلاردىڭ كوزقاراسى، ومىرلىك قۇندىلىقتارى جانە ۇستانىمى اينالاسىنداعى ادامدارعا بايلانىستى. بالالاردىڭ رۋحاني دامۋىنا دا كوڭىل ءبولۋ كەرەك»، - دەدى ا. كولگىنوۆ.

قالا اكىمى ا. كولگىنوۆ اتالعان ماسەلەلەر جۇيەلى تۇردە جۇمىستانۋدى تالاپ ەتەتىندىگىن اتاپ ءوتتى.

سوڭعى جاڭالىقتار