15 تامىز, 17:38 350 0 بىلگەنگە مارجان Turkystan Support

قوعام: اپتالىق شولۋ

بالالار الاڭسىز وقىسىن دەپ...

 نۇر-سۇلتان

ەلوردادا «بالانى مەكتەپكە دايىندايىق» اكتسياسى باستالدى. اكتسيا «Nur Otan» پارتياسىنىڭ «باقىتتى وتباسى» پارتيالىق جوباسى اياسىندا جۇزەگە اسىرىلىپ وتىر.

از قامتىلعان جانە كوپ بالالى وتباسىلاردان شىققان 150 مەكتەپ وقۋشىسىنا سىيلىقتار تابىستالدى. مەكتەپكە قاجەتتى قۇرال-جابدىقتار مەن سومكەلەردى اتا-انالارى پارتيا فيليالدارىنا كومەككە جۇگىنگەن العاشقى 150 بالا ال­دى. ەلوردالىق مەتسەناتتارمەن بىرگە پارتيا مۇشەلەرى 1500-دەن استام بالانى جاڭا وقۋ جىلىنا دايىنداۋدى جوسپارلاپ وتىر.

«بالانى مەكتەپكە دايىندايىق» اكتسياسى «باقىتتى وتباسى» پارتيالىق جوباسى اياسىندا وتكىزىلىپ كەلە جاتقان ءداستۇرلى ءىس-شاراعا اينالدى. بۇل يگى ءىس بالالاردى مەكتەپكە دايىنداۋعا مۇمكىندىگى كەلمەيتىن كوپبالالى جانە از قامتىلعان وتباسىلارعا كومەكتەسۋدى ماقسات ەتەدى. بۇل ەڭ جاقسى رەسپۋبليكالىق اكتسيالاردىڭ ءبىرى. بالالاردىڭ ءبىلىمدى، ەڭبەكقور، ەلى­مىز­دىڭ لايىقتى ازاماتتارى بولۋىن تىلەيمىن»، – دەپ اتاپ ءوتتى «Nur Otan» پارتياسى نۇر-سۇلتان قالالىق فيليالى توراعاسىنىڭ ءبىرىنشى ورىنباسارى ەرلان كاناليموۆ.

مەكتەپكە دايىندالۋدا كومەك العىسى كەلەتىن وتباسىلار پارتيانىڭ ەلوردالىق فيليالىنا، سونداي-اق جەرگىلىكتى ءوزىن-ءوزى باسقارۋ ورگاندارىنا جۇگىنە الادى. «بالانى مەكتەپكە دايىندايىق» رەسپۋبليكالىق اكتسياسىنىڭ ماقساتى – قارجىلىق قيىنشىلىقتارى بار وتباسىلارعا مۇمكىندىگىنشە الەۋمەتتىك قولداۋ كورسەتۋ. اكتسيا ەلىمىزدىڭ بارلىق ايماقتارىندا ءوتىپ، وسى ايدىڭ سوڭىنا دەيىن جالعاسادى.

 

شىمكەنت

كوپبالالى انالارعا كومەك بەرۋ ماقساتىندا «مەكتەپكە جول– 2019» قايىرىمدىلىق اكتسياسى باستاۋ الدى.

ايتۋلى قايىرىمدىلىق شاراسىنىڭ ماقساتى – از قامتىلعان جانە كوپبالالى وتباسىلار، جەتىم بالالار مەن اتا-اناسىنىڭ قامقورلىعىنسىز قالعان بالالارعا جاڭا وقۋ جىلىنا دايىندىق كەزەڭىندە كومەك كورسەتۋ جانە ولاردىڭ الەۋمەتتىك سەبەپتەر بويىنشا مەكتەپكە بارماۋىنىڭ الدىن الۋ. شاراعا «Nur Otan» پارتياسىنىڭ مۇشەلەرى، دەپۋتاتتار، ءبىلىم سالاسىنىڭ قىزمەتكەرلەرى، «Jas Otan» جق شىمكەنت قالالىق فيليالى، ۇكىمەتتىك ەمەس ۇيىمدار مەن باق وكىلدەرى قاتىستى.

العاشقى قۇتتىقتاۋ ءسوزدى «Nur Otan» پارتياسى شىمكەنت قالالىق فيليالى توراعاسىنىڭ ءبىرىنشى ورىنباسارى  باحادىر نارىمبەت ايتتى. «ءداستۇرلى تۇردە وتەتىن «مەكتەپكە جول» رەسپۋبليكالىق اكتسياسى اياسىندا ءبىز الەۋمەتتىك جاعدايى از قامتىلعان وتباسىلارعا قول ۇشىن بەرىپ كەلەمىز. بۇلدىرشىندەردىڭ قاجەتتى قۇرال-جابدىقتارمەن تولىققاندى قامتىلماۋى – ءبىزدىڭ ازاماتتىعىمىزعا ۇلكەن سىن. جاڭا وقۋ جىلىندا مەكتەپ تابالدىرىعىن اتتايتىن بالالاردىڭ ىشىنەن بولاشاقتا مىقتى مامان يەلەرى شىعادى دەپ سەنەمىن. ءبىز تەك قانا ولارعا دەمەۋ جاساپ، بۇلاقتىڭ كوزىن اشۋىمىز كەرەك. وسىناۋ شاراعا فراكتسيا مۇشەلەرى مەن دەپۋتاتتار تاراپىنان كورسەتىلگەن كومەكتەر مەن قولداۋلاردىڭ ۇلەسى زور»، – دەپ الداعى جاڭا وقۋ جىلىنا اق جول تىلەدى.

ءىس-شارا بارىسىندا شاراعا دەمەۋشىلىك كورسەتكەن شىمكەنت قالالىق ءماسليحاتىنىڭ دەپۋتاتى ەركىن ساتقانباەۆ ءاربىر وقۋشىنىڭ بيىل مەكتەپكە دايىندىعى نازاردان تىس قالماۋ كەرەكتىگىن ايتتى. اكتسيا شەڭبەرىندە دەپۋتاتتار تاراپىنان 60-قا جۋىق بالالارعا كيىم-كەشەك پەن سومكەلەر تاراتىلىپ، 25 مىڭ تەڭگەدەن قارجىلاي سىيلىق ۇلەستىرىلدى.

ال اكتسياعا قاتىسۋشىلاردىڭ ءبىرى 34 جاستاعى كوپبالالى انا مادينا دۇيسەنبيەۆا كوپ بالالى وتباسىلارعا بالالارىن مەكتەپكە دايىنداۋ وڭايعا تۇسپەيتىنىن ايتتى. «مەن 8 بالانىڭ اناسىمىن. بارلىق بالامدى بىردەي مەكتەپكە دايىنداۋ وڭاي ەمەس. پارتيا ۇيىمداستىرىپ وتىرعان وسىنداي شاراعا وتكەن جىلى دا قاتىسقان بولاتىنبىز. بالاما سومكە جانە اقشالاي سىيلىق بەردى. بالالار دا قۋانىشتى. ءبىز سياقتى كوپ بالالى وتباسىلارعا مۇنىڭ ءوزى ۇلكەن كومەك. «Nur Otan» پارتياسىنىڭ شىمكەنت قالالىق فيليالىنا ۇلكەن العىسىمدى بىلدىرەمىن»، – دەدى مادينا دۇيسەنبيەۆا.

 

پاۆلودار

جىل سايىن رەسپۋبليكالىق «مەكتەپكە جول» اكتسياسى ەلىمىزدىڭ بارلىق ايماعىندا وتكىزىلەدى. ءداستۇرلى تۇردە وتەتىن شارادا قايىرىمدى جاندار وقۋشىلاردى جاڭا وقۋ جىلىنا دايارلاۋعا اتسالىسىپ، بۇلدىرشىندەرگە قۋانىش سىيلاۋعا اسىعادى.

قايىرىمدىلىق اكتسياسى «Nur Otan» پارتياسىنىڭ پاۆلودار وبلىستىق فيليالىندا دا جالعاسىن تاپتى. وعان دەپۋتاتتار، مەملەكەتتىك ورگاندار باسشىلارى، كاسىپكەرلەر جانە ءتۇرلى شارۋا قوجالىقتارىنىڭ باسشىلارى بەلسەنە قاتىستى. شارا بارىسىندا بالالار مەن ولاردىڭ اتا-انالارىنا ارنالعان مەرەكەلىك كونتسەرت ۇيىمداستىرىلدى. سونداي-اق كوپبالالى جانە از قامتىلعان 17 وتباسىعا مەكتەپ سومكەسى تابىستالدى. سومكەلەر ءاربىر مەكتەپ وقۋشىسىنا ارنالعان قاجەتتى كەڭسە تاۋارلارىمەن: قالامساۋىت، قالامساپ، قارىنداشتار، البوم، كۇندەلىك، داپتەرلەر جانە باسقا دا زاتتارمەن تولتىرىلعان.

«ءبىز اتا-انالارعا بالانى مەكتەپكە دايىنداۋعا جان-جاقتى كومەكتەسەمىز. اسىرەسە، «مەكتەپكە جول» شاراسىن كاسىپكەرلەر قولداپ وتىر. سونىڭ ارقاسىندا كومەككە مۇقتاج اتا-انالاردىڭ بالالارىنا مەكتەپ فورمالارى، وقۋشى سومكەسى، كەڭسە تاۋارلارى، سپورتتىق ۇلگىدەگى كيىمدەر ۇلەس­تى­رىلىپ، قوسىمشا ماتەريالدىق كومەك كورسەتىلەدى»، – دەيدى شارانى ۇيىمداستىرۋشىلار.

ءۇش بالا تاربيەلەپ وتىرعان تاتيانا ەدرەشەۆا دا ءوز كەزەگىندە اكتسيانى ۇيىمداستىرۋشىلارعا العىسىن جەتكىزدى. «ءۇش بالانى مەكتەپكە دايىندايتىن ۋاقىتتا قينالىپ قالاتىنىم بار. وسىنى ەسكەرىپ اكتسيانى ۇيىمداستىرۋشىلار جىل سايىن بىزگە كومەكتەسىپ كەلەدى. وتكەن جىلى دا وسى اكتسياعا قاتىسقانمىن. بالالارىما وقۋعا قاجەتتى كەرەك-جاراقتىڭ ءبارىن سىيعا تارتتى. سوندىقتان شارانى ۇيىمداستىرۋشىلارعا ايتار العىسىم زور. ارقاشان بۇلدىرشىندەردىڭ كۇلكىسىنە كۋا بوپ، انالاردىڭ العىسىن الىپ جۇرە بەرگەيسىزدەر»، – دەپ اعىنان جارىلدى كوپبالالى انا.

ايتا كەتەيىك، «مەكتەپكە جول» اكتسياسى شەڭبەرىندە مەكتەپكە بارمايتىن بالالاردى انىقتاۋعا، مەكتەپكە دايىنداۋ بويىنشا الەۋمەتتىك قورعالماعان وتباسىنان شىققان بالالارعا كومەك كورسەتۋگە دە باسا نازار اۋدارىلدى.

 

 ەلگە قولايسىزدىق تۋدىرعان

الماتى سياقتى ۇلكەن مەگاپوليستىڭ ءوز تۇيتكىلى جەتەرلىك. اسىرەسە، قو­عام­دىق ورىنداردا ءتارتىپتىڭ ساقتالماۋىنا تۇرعىنداردىڭ شاعىمى كوپ. وسى اپتادا الماتى قالاسى، اۋەزوۆ اۋدانىنا قاراستى اقساي-2 ىق­شام اۋدانىنداعى 16 ا ءۇيىنىڭ بىرنەشە تۇرعىنى ءبىرىنشى قاباتتاعى ءدامحانالاردىڭ زاڭسىز جۇمىس ىستەپ جاتقانىنا نارازى ەكەنىن جەتكىزدى.

«Nur Otan» پارتياسىنىڭ قالالىق فيليالىنان كومەك سۇراپ، پارتيانىڭ اۋەزوۆ اۋداندىق فيليالىنىڭ قوعامدىق قابىلداۋىنا شاعىم تۇسىرگەن تۇرعىندار كۇنى بويى قۋىرىلعان ماي، شوشقا ەتىنەن پىسىرىلگەن كاۋاپتىڭ ءيىسى مەن ءتۇتىنى پاتەر ءىشىن الىپ كەتەتىنىن ايتادى. ماسەلەن، «كونتۋر»، «زولوتوە رۋنو» ءدامحاناسىنىڭ ۇستىڭگى قاباتىندا تۇراتىن تۇرعىندار ءۇشىن اتالعان تاماقتانۋ ورىندارى كوپ ىڭعايسىزدىقتار تۋدىرعان-دى.

تۇرعىندار شاعىمىنان كەيىن پارتيا وكىلدەرى سول دامحانالارعا بارىپ، زاڭ بۇزۋشىلىق ارەكەتتەردىڭ بەتىن اشتى. بۇل نىسانداعى جاعدايدى ەندى مەملەكەتتىك ورگاندار باقىلاماق. قالالىق ساۋلەت-قۇرىلىس باسقارماسى مەن جەر ينسپەكتسياسى ءدامحانالاردىڭ ارەكەتىنە زاڭدى تۇردە جازا قولدانۋعا كىرىسپەكشى.

ءدامحانانى ارالاپ، تۇرعىنداردىڭ مۇڭ-مۇقتاجىن تىڭداعان الماتى قالاسى ءماسليحاتىنىڭ دەپۋتاتى ەربولات قاسىموۆتىڭ ايتۋىنشا، زاڭ بۇزۋشىلىق كوزگە ۇرىپ تۇر. «قالالىق ساۋلەت باسقارماسى بار جەر ينسپەكتسياسى تەكسەرۋگە كەلەدى. زاڭدى تۇردە جازا قولدانىلادى. ارى قاراي بۇل ماسەلە پارتيا باقىلاۋىندا بولماق» دەدى.

جالپى، اۋەزوۆ اۋدانىندا 120 ءدامحانا، 25-كە جۋىق مەيرامحانا قىزمەت كورسەتەدى ەكەن. تۇرعىندار شاعىمىنىڭ ناتيجەسىندە بۇلار دا  تەكسەرىستەن وتەتىن بولدى.

 

ابايدىڭ جىرىن وقىپ، شىڭىنا شىقتى

الماتى قالاسىندا قازاقتىڭ ۇلى اقىنى اباي قۇنانبايۇلىنىڭ 175 جىلدىق مەرەيتويىنا وراي اباي شىڭىن باعىندىرۋ شاراسى ءوتتى. شارانى «Jas Otan» جاستار قاناتىنىڭ الماتى قالالىق فيليالى ۇيىمداستىردى.

ءۇش نايزاتاستان قۇرالعان اباي شىڭى 3600 مەتر بيىكتىكتە قاسقايىپ تۇر. شىڭ باسىنا شىققان جۇزدەگەن ادام اقىننىڭ ولەڭدەرىن وقىپ، اندەرىن اۋەلەتە شىرقادى. ءارى قاراي كاسىبي الپينيستەر توبى 4010 مەتر بيىكتىكتەگى اباي شىڭىنا كوتەرىلىپ، ول جەردە قازاقستاننىڭ جانە «Jas Otan» جاستار قاناتىنىڭ تۋىن كوكتە جەلبىرەتتى. شاراعا قاتىسىپ، اتسالىسقاندار اراسىندا پارتيا وكىلدەرى، بلوگەرلەر، سپورتشىلار جانە وزگە دە ەرىكتى جاستار بولدى.

«وسىدان 20 كۇن بۇرىن شىلدە ايىندا ابايدىڭ 175 جىلدىعىن اتاپ وتۋگە قانداي ۇلەس قوسامىز دەگەن وي بولعان ەدى. قازىر قاراپ وتىرساق جاستار شارتتى تۇردەگى جينالىستاردان، كەزدەسۋلەردەن شارشادى. سوندىقتان بۇل شارانى جاڭا فورماتتا، ەرەكشە قىلىپ وتكىزەيىك دەپ كەلىستىك. بۇل ءبىر جاعىنان سالاۋاتتى ءومىر سالتىن قالىپتاستىرسا، ەكىنشى جاعىنان ۇلى اقىنىمىزدىڭ رۋحاني مۇراسىن دارىپتەۋدىڭ تاپتىرماس جولى. ءبىزدىڭ ۇسىنىسىمىزدى «تاسساي»، «سامال» سۋلارى، سونداي-اق قالالىق اكىمدىك پەن پارتيا باسشىلىعى دا قولدادى. شاراعا قاتىسۋشىلارعا «شىمبۇلاق» تا قولداۋ ءبىلدىردى. قاتىسۋعا نيەت بىلدىرگەندەر – ءارتۇرلى جاستاعى قالا تۇرعىندارى. ولار تىزىمگە ونلاين تىركەۋ ارقىلى ەندى. جالپى العاندا شاراعا 80-گە جۋىق ادام قاتىستى. جاستار اباي اسۋىنا شىعىپ، «جەلسىز تۇندە جارىق اي»، «كوزىمنىڭ قاراسى» اندەرىن ورىنداعان كەزدە كەرەمەت اسەردە بولدىق»، – دەيدى «Jas Otan» جاستار قاناتى الماتى قالالىق فيليالىنىڭ توراعاسى ءمادي احمەتوۆ.

ەسكە سالا كەتەيىك، پرەزيدەنت قاسىم-جومارت توقاەۆ اقىننىڭ 175 جىلدىق مەرەيتويىن اتاپ ءوتۋ تۋرالى رەسمي جارلىققا وسى جىلدىڭ 30 مامىرىندا قول قويعان بولاتىن. الماتى جاستارى مۇنداي شارالاردى الداعى ۋاقىتتا دا جالعاستىراتىنىن ايتتى. ولار وسىنداي ەرەكشە فورماتتاعى باستامالار ءتۇسى­نىكسىز جيىن، ءمانسىز ءىس-شارا مەن ستاندارتتى جينالىستاردان الدەقايدا پايدالى بولاتىنىن دالەلدەدى. تاۋعا شىعۋ شاراسىنان كەيىن #ابايشىڭى حەشتەگى ارقىلى كوپتەگەن قاتىسۋشىلار ۇيىمداستىرۋشىلارعا الەۋ­مەتتىك جەلىدە العىسىن ءبىلدىردى.

 

باسپانالى بولۋعا تاعى ءبىر مۇمكىندىك

تالدىقورعان قالاسىنىڭ تۇرعىنى ەلۆيرا تۋلاقباەۆا «باقىتتى وتباسى» مەملەكەتتىك باعدارلاماسى بويىنشا باسپانالى بولدى. ول الماتى وبلىسى بويىنشا العاشقى ءۇي العان تۇرعىن بولىپ تىركەلدى.

«Nur Otan» پارتياسى تالدىقورعان قالالىق فيليالىنىڭ توراعاسى عالىمجان ءابدىرايىموۆ «تۇرعىن ءۇي قۇرىلىس جيناق بانكىنە» ارنايى كەلىپ، ەلۆيرا تۋلاقباەۆانى قۇتتىقتادى. «باقىتتى وتباسى» مەملەكەتتىك باعدارلاماسىن ەنگىزگەن مەملەكەتكە راقمەت. 2 پايىزبەن يپوتەكالىق نەسيە بەرۋ – حالىققا وتە ۇلكەن كومەك»، – دەدى ەلۆيرا مۇحتارقىزى قۋانىشىن جاسىرا الماي.

قازىرگى ۋاقىتتا تالدىقورعان قالاسىندا باعدارلاماعا قاتىسۋعا 246 ادام ءوتىنىش بىلدىرسە، ولاردىڭ 84-ءى كوميسسيالىق بايقاۋدان وتكەن. ال قالعان ازاماتتار بايقاۋدىڭ ناتيجەسىن كۇتۋدە.

«باقىتتى وتباسى» مەملەكەتتىك باعدارلاماسى – نەسيەگە ءۇي الۋعا جەڭىلدىك رەتىندە قۇرىلعان باعدارلاما. نەسيە جىلىنا 2 پايىزدىق مولشەرلەمەمەن 19 جىلعا بەرىلەدى. العاشقى جارنا كولەمى – 10 پايىز. ەگەر باعدارلاماعا قاتىسۋعا نيەت بىلدىرگەن كوپبالالى، ءال-اۋقاتى تومەن، مۇگەدەك بالانى اسىراپ وتىرعان جالعىزباستى انالار نەمەسە اكەلەر العاشقى جارنانى تولەۋگە مۇمكىندىگى بولماعان جاعدايدا اكىمشىلىك تاراپىنان 1 ملن تەڭگە كولەمىندە تۇرعىن ءۇي سەرتيفيكاتىن الۋعا مۇمكىندىگى بار.

الايدا ولار باسپاناعا مۇقتاج وتباسىلار ساناتىنا جاتاتىنىن دالەلدەۋى قاجەت. ول ءۇشىن اتقارۋشى ورگاننان كوپبالالى وتباسى ەكەنىن دالەلدەيتىن انىقتاما الىپ، ونى بانككە تاپسىرادى. بۇل باعدارلاماعا قاتىسۋشىلارعا قويىلاتىن ەڭ باستى تالاپ – قازاقستان تۇرعىن ءۇي قۇرىلىس جيناق بانكىنىڭ سالىمشىسى بولۋى مىندەتتى. ولاي بولماعان جاعدايدا، بانكتەن دەربەس شوت اشۋعا قۇقى بار.

 

پاندۋستار نەگە تالاپقا ساي ەمەس؟

قوستاناي وبلىسىندا الەۋمەتتىك ءالسىز توپتارعا جاتاتىن جاندار ءۇشىن ءبىرشاما ءىس-شارالار ۇيىمداستىرىلدى. سولاردىڭ ءبىرى – رەيد شارالارى. «كەدەرگىسىز كەلەشەك» جوباسى اياسىندا «Nur Otan» پارتياسىنىڭ رۋدنىي قالالىق فيليالى شاعىن شاھارداعى الەۋمەتتىك نىسانداردىڭ مۇمكىندىگى شەكتەۋلى جاندار ءۇشىن قانشالىقتى قولايلى ەكەندىگىنە باقىلاۋ جۇرگىزدى.

 رۋسلان بايعانين ارباعا تاڭىلسا دا، ەشقاشان قوعامدىق باستامالاردان تىس قالعان ەمەس. بۇل جولى ول پارتيالىقتاردىڭ مۇرىندىق بولۋىمەن وتكىزگەن رەيد شاراسىنا قاتىستى. ونىڭ ايتۋىنشا، سوڭعى جىلدارى نۇروتاندىقتاردىڭ كومەگىمەن كوشەلەردەگى پاندۋستاردىڭ سانى ارتقان. «پارتيا وكىلدەرى جوبا اياسىندا نىسانداردىڭ مۇمكىندىگى شەكتەۋلى جانداردىڭ ءجۇرىپ-تۇرۋ قولايلىلىعىن تەكسەرۋ ماقساتىندا رەيد ۇيىمداستىردى. وڭىردە جارىمجان ازاماتتاردىڭ ەركىن ءومىر سۇرۋىنە بارىنشا جاعداي جاسالىپ كەلەدى. دەگەنمەن كەيبىر كاسىپ وكىلدەرى مۇگەدەكتىگى بار جانداردى ۇمىتىپ كەتەتىن سياقتى»، – دەيدى رۋسلان بايعانين.

رەيد توبى وكىلدەرى دۇكەندەر، ءدارىحانالار مەن سۋپەرماركەتتەردى تەكسەردى. بىرقاتار نىسانداردا ەسىك، باسپالداق، پاندۋس ولشەمدەرى ارنايى تالاپتارعا ساي كەلمەيدى. پارتيالىقتار نىسان باسشىلارىنا ەسكەرتۋ جاساپ، ولقىلىقتاردىڭ ورنىن تولتىرۋ كەرەگىن باسا ايتتى.

«Nur Otan» پارتياسىنىڭ وكىلدەرى الداعى ۋاقىتتا دا  رەيد شارالارىن توقتاتپايدى. سىن-ەسكەرتپەلەر جاسالعان نىساندار تاعى ءبىر مارتە تەكسەرىستەن وتكىزىلەدى.

سوڭعى جاڭالىقتار