13 تامىز 2019, 18:29 518 0 ايماق Túrkistan Gazeti

ءۇش قالادا قوسىمشا حقكو اشىلادى

جاڭا فرونت-وفيستەر حالىق كوپ شوعىرلانعان نۇر-سۇلتان، الماتى جانە شىمكەنت قالالارىندا اشىلادى. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتورايىمى اسەمگۇل بالتاشەۆا Facebook-تەگى پاراقشاسىندا مالىمدەدى. 

«مەگاپوليستەردەگى حالىقتىڭ ءوسۋى جەدەل شارالاردىڭ قابىلدانۋىن تالاپ ەتەدى. جارتى جىلدىڭ وزىندە الماتى مەن نۇر-سۇلتان شاھارلارىندا عانا 3,5 ملن قىزمەت كورسەتىلگەن. تامىز ايىنىڭ سوڭىنا دەيىن ءبىز استانامىز بەن الماتىدا قوسىمشا ءبىر-ءبىر حالىققا قىزمەت كورسەتۋ ورتالىقتارىن اشاتىن بولامىز. وعان قوسا، الماتى قالاسىنداعى الاتاۋ اۋدانىنداعى حقكو ءبىر ايلىق ۇزىلىستەن كەيىن قايتادان ءوز قىزمەتىن جانداندىردى»، - دەلىنگەن الەۋمەتتىك جەلىدەگى جازبادا.

وعان قوسا، ەلىمىزدەگى مامانداندىرىلعان حقكو سانى ارتاتىن بولادى. ماسەلەن، الماتى قالاسىندا التىنشى اۆتو حقكو اشىلسا، وعان جاقىن جاتقان تالعار جانە قاراساي اۋداندارىندا تاعى ءبىر-ءبىر ورتالىق ىسكە قوسىلادى. اسەمگۇل سەرىكقىزىنىڭ ايتۋىنشا، جاڭا ورتالىقتار تامىز-قىركۇيەك ارالىعىندا اشىلادى.

«ەڭ ۇلكەن اۆتوبازار وسى مەگاپوليستە، جاقىن جاتقان وبلىس تۇرعىندارى سوندا بارىپ كولىكتەرىن ساتىپ، جاڭاسىن الىپ، تىركەۋ راسىمدەرىن دە سوندا جاساتادى. جارتى جىل ىشىندە قازاقستاندا كولىك سەكتورى بويىنشا كورسەتىلگەن قىزمەت سانى 1,5 ملن جۋىق بولسا، ونىڭ 24%-ى الماتىعا تيەسىلى»، - دەپ اتاپ وتكەن بالتاشەۆا ءوز پاراقشاسىندا.

سونداي-اق، شىمكەنت قالاسىندا دا مامانداندىرىلعان حقو ىسكە قوسىلاتىنى ايتىلعان. وسىلايشا، بۇل شاھاردا قىركۇيەك ايىنان باستاپ 3 اۆتو حقكو قىزمەت كورسەتە باستايدى.

بۇگىندە قازاقستاندا 328 فرونت-وفيس جۇمىس ىستەيدى، كورسەتىلەتىن قىزمەت تۇرلەرىنە قاراي ولار حقكو، تسيفرلىق حقكو، كوشى-قون حقكو-سى، مامانداندىرىلعان حقكو-لار بولىپ جىكتەلەدى. جىل باسىنان بەرى التى اي ىشىندە وندا قازاقستاندىقتارعا 15 ملن قىزمەت كورسەتىلگەن.

 

سوڭعى جاڭالىقتار