13 تامىز, 18:16 282 0 الەۋمەت Túrkistan Gazeti

«7-20-25»: جىل باسىنان بەرى 10 مىڭ ءوتىنىش ماقۇلدانعان

2019 جىلدىڭ قاڭتارىنان باستاپ «7-20-25» باعدارلاماسىنا قاتىسۋعا 16 677 ءوتىنىش كەلىپ ءتۇسىپ، ونىڭ 9813-ءى ماقۇلدانعان. بۇل تۋرالى ۇلتتىق بانك توراعاسى ەربولات دوساەۆ ۇكىمەت وتىرىسىندا مالىمدەدى. بۇل تۋرالى BAQ.KZ حالىقارالىق اگەنتتىگى حابارلايدى.

«ۇلتتىق بانك «7-20-25» باعدارلاماسىن ىسكە اسىرۋدا. 2019 جىلى 8 تامىزداعى جاعداي بويىنشا 188 ملرد 300 ملن تەڭگەگە 16 677 ءوتىنىش بەرىلدى. ونىڭ ىشىندە بانكتەر 112 ملرد 700 ملن تەڭگە سوماعا 9813 ءوتىنىمدى ماقۇلدادى. ناتيجەسىندە يپوتەكالىق كرەديتتەۋ دامىدى. بىلتىر شىلدە ايىنان باستاپ باعدارلاما ىسكە قوسىلعاننان بەرى بانكتەردىڭ يپوتەكالىق پورتفەلى 30,5% 1,5 ترلن تەڭگەگە ءوستى»، - دەدى دوساەۆ.

ۇلتتىق بانك توراعاسى ەكونوميكانىڭ باسىم سەكتورلارىن قارجىلاندىرۋ ءۇشىن بانكتەرگە ۇزاقمەرزىمدى رەسۋرستار بەرىلەتىنىن ايتتى. «بانكتەر 51 ملرد 400 ملن سوماعا 106 جوبانى ماقۇلدادى. 31 ملرد سوماعا 69 قارىز بەرىلدى. قر ازاماتتارىنىڭ بورىش جۇكتەمەسىن ازايتۋ تۋرالى پرەزيدەنت جارلىعىن ىسە اسىرۋ شەڭبەرىندە ۇكىمەت پەن بانكتەرمەن، ميكروقارجى ۇيىمدارىمەن بىرلەسىپ ەكى باعىت بويىنشا جۇمىس جۇرگىزىلۋدە. ءبىرىنشى – حالىقتىڭ الەۋمەتتىك وسال توپتارى ءۇشىن كەپىلسىز قارىزدار بويىنشا 300 مىڭ تەڭگەگە دەيىنگى بەرەشەكتەردى وتەۋ. ازاماتتاردىڭ تىزىمدەرى بويىنشا اقپاراتتار جيناپ، اقى تولەۋگە ءتىزىم جاسالدى. بەرەشەكتەردى وتەۋ تامىز سوڭىنا دەيىن اياقتالادى. ازاماتتار بانكتەرمەن ميكروقارجى ۇيىمدارىنا جۇگىنبەيدى، بۇل دەربەس جۇرگىزىلەدى. كرەديتورلار ءاربىر قارىز الۋشىعا ءتيىستى حابارلاما جىبەرەدى»، - دەدى ۇلتتىق بانك توراعاسى.دوساەۆ بۇكىل قازاقستاندىقتارعا كەپىلسىز قارىزدار بويىنشا 2019 جىلى 1 شىلدەگە ەسەپتەلگەن ايىپپۇلدار مەن ءوسىمپۇلداردى ەسەپتەن شىعارۋ بويىنشا 30 شىلدەدە بانكتەر مەن ميكروقارجى ۇيىمدارى 33 ملرد 600 ملن سوماعا 1 ملن 200 مىڭ ازاماتتىڭ ايىپپۇلدارى مەن ءوسىمپۇلدارىن كەشىرگەنىن ايتتى.بۇعان دەيىن ۇلتتىق بانك توراعاسى ەربولات دوساەۆ ۇكىمەت وتىرىسىندا جەتى ايداعى ينفلياتسيا دەڭگەيىنىڭ جانە تەڭگە باعامىنىڭ ديناميكاسى تۋرالى ايتقان بولاتىن.

 

سوڭعى جاڭالىقتار