13 تامىز 2019, 18:01 566 0 ءبىلىم Túrkistan Gazeti

اسحات ايماعامبەتوۆ مەملەكەت مەكتەپ جەتىسپەۋشىلىگى ماسەلەسىن قالاي شەشەتىنىن ايتتى

ءبىلىم جانە عىلىم ءمينيسترى اسحات ايماعامبەتوۆ مەملەكەت مەكتەپ جەتىسپەۋشىلىگى ماسەلەسىن قالاي شەشەتىنىن ايتىپ بەردى. بۇل تۋرالى قازاقپارات حاا حابارلادى.

«مەكتەپتەگى ورىن جەتىسپەۋشىلىگى ماسەلەسىن ءبىز ۇكىمەتتىڭ وتىرىسىندا كوتەردىك. وزدەرىڭىز بىلەتىندەي، مەملەكەت بۇگىنگى تاڭدا بۇل ماسەلەگە ەرەكشە نازار اۋدارىپ، قىرۋار قاراجات ءبولىپ جاتىر. قازىرگى تاڭدا ەلىمىز بويىنشا 200-گە تارتا جاڭا مەكتەپ سالىنۋدا. ماسەلەن، نۇر-سۇلتان قالاسىندا تۋ مەن كوشىپ كەلۋ كورسەتكىشىنىڭ سانى ارتقاننان سوڭ بالا سانى ءبىر جىلدا 20 مىڭعا وسەدى. سول سەكىلدى الماتى وبلىسىندا ءبىر جىلدىڭ ىشىندە ءۇش اۋىسىمدى مەكتەپتەردىڭ سانى 30-دان 53-كە كوبەيىپ جاتىر. بۇل تەك تۋ كورسەكتىشىنە قاتىستى ەمەس، كوشى-قونعا بايلانىستى ماسەلە. سوندىقتان، بۇل تاراپتا قازىر مينيسترلىك جاڭا مەكتەپتەردى سالۋ ادىستەمەسىن جاساپ جاتىر»، - دەدى اسحات ايماعامبەتوۆ ۇكىمەتتىڭ ءباسپاسوز ورتالىعىندا.

ءمينيستردىڭ ايتۋىنا قاراعاندا، وسىدان بىرنەشە جىل بۇرىن بالاباقشا سانىنىڭ جەتىسپەۋشىلىگى وتە وزەكتى ماسەلە بولىپ تۇرعان. «بالاباقشالار بويىنشا جان باسىنا قارجىلاندىرۋ جۇيەسىن ەنگىزگەننەن كەيىن قازىرگى تاڭدا بالالاردى بالاباقشامەن قامتۋ كورسەتكىشى جاعىنان 95,2 پايىزعا جەتتىك. سوندىقتان، مەكتەپ ماسەلەسى بويىنشا جەكەمەنشىك مەكتەپتەردىڭ ۇلەسىن وسىرۋگە ۇلكەن نازار اۋدارۋدامىز. قازىرگى ۋاقىتتا جان باسىنا قارجىلاندىرۋ مەحانيزمى دايىن. ۇكىمەت وتىرىسىندا كورسەتكەندەي، قىسقا مەرزىمنىڭ ىشىندە عانا 25 جاڭا مەكتەپ اشىلىپ جاتىر. جىل سوڭىنا دەيىن ءبىراز مەكتەپتەر اشىلادى. بىراق، ول دا جەتپەيدى. سوندىقتان، قايتا قۇرۋ مەحانيزمىن ەنگىزدىك»، - دەدى مينيستر.

اسحات ايماعامبەتوۆتىڭ ايتۋىنا قاراعاندا، مەكتەپ قۇرىلىسى ماسەلەسىنە كەلگەندە ماسەلەن نۇر-سۇلتان قالاسىندا جەر تاپشىلىعى پروبلەماسى بار. «بىراق، دايىن تۇرعان عيماراتتار بارشىلىق. سول عيماراتتار ارقىلى مەكتەپكە جاعداي جاسايتىن بولساق، عيماراتتاردى دا مەكتەپ رەتىندە اشۋعا بولادى. سول سەبەپتى، بۇل وتە كەشەندى ماسەلە. مينيسترلىك ءتيىستى شەشىم قابىلدايدى»، - دەدى ءبىلىم جانە عىلىم ءمينيسترى. ەسكە سالا كەتسەك، بۇگىنگى ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرگەن ەلوردا اكىمى التاي كولگىنوۆ مەكتەپ بويىنشا قالادا 17 مىڭ ورىننىڭ جەتىسپەيتىنىن حابارلاعان بولاتىن.

سوڭعى جاڭالىقتار