9 تامىز, 14:37 513 0 سىرتقى ساياسات دينارا مىڭجاسارقىزى

"يەگوۆا كۋاگەرلەرىن" ء"دىني ارازدىق" ءۇشىن سوتتادى

"يەگوۆا كۋاگەرلەرى" اعىمىنىڭ 68 جاستاعى مۇشەسى شاميل حاكيموۆقا ناسىلشىلدىك، ۇلتتىق نەمەسە ءدىني ارازدىق تۋعىزدى دەگەن ايىپ تاعىلعان. ول وزىنە تاعىلعان ايىپتاردى جوققا شىعاردى. حاكيموۆقا قارسى قوزعالعان ءىس بويىنشا سوت 20 تامىزدا جالعاسادى.

Forum 18 ادام قۇقىعىن قورعاۋ ۇيىمىنىڭ حابارلاۋىنشا، حۋدجاند قالاسىنداعى سوت شاميل حاكيموۆ ءىسىن قاراۋدى كەيىنگە قالدىردى - ونىڭ ادۆوكاتى ورىس تىلىنە اۋدارماشى بەرۋىن سۇراعان.

شاميل حاكيموۆ بيىل اقپان ايىندا تىيىم سالىنعان ءدىني ادەبيەت تاراتتى جانە ەكسترەميستىك سيپاتتاعى فوتو جانە ۆيدەوماتريالدار ساقتادى دەگەن ايىپپەن ۇستالدى. ول 5 جىلدان 10 جىلعا دەيىن باس بوستاندىعىنان ايرىلۋى مۇمكىن.

Forum 18 مالىمەتى بويىنشا، ءىس ماتەريالدارىندا تاجىك تىلىنە اۋدارىلعان بيبليا دا ءجۇر. كىتاپتى Institute for Bible Translation فيرماسى اۋدارعان. ساراپتاما جۇرگىزگەن ماماندار كىتاپ رەسمي حانافا مازحابىنا قايشى دەپ تانىپ، ونىڭ تاراتىلۋى تاجىك قوعامىندا ءدىني ارازدىق تۋعىزۋى مۇمكىن دەگەن قورىتىندى جاساعان.

بيلىك "يەگوۆا كۋاگەرلەرىنە" زاڭ كومەگىن كورسەتۋدەن باس تارتقان.

شاميل حاكيموۆ سوعدى پروكۋراتۋراسىنا ۇيىمداسقان قىلمىسپەن كۇرەس باسقارماسىنىڭ قىزمەتكەرلەرى قىسىم كورسەتكەنى تۋرالى ارىزدانعان، ءبىراز شاعىم قاراۋسىز قالعان. بۇعان دەيىن سوعدى وبلىسىنىڭ بيلىگى "يەگوۆا كۋاگەرلەرىن" تەرگەۋ كەزىندە ازاپتاعان دەگەندى جوققا شىعارعان.

 

سوڭعى جاڭالىقتار