9 تامىز 2019, 14:34 565 0 سىرتقى ساياسات دينارا مىڭجاسارقىزى

المازبەك اتامباەۆ ۇستالدى  

قىرعىزستاننىڭ بۇرىنعى پرەزيدەنتى المازبەك اتامباەۆتى كۇش قۇرىلىمدارى ۇستادى.

8 تامىزدا المازبەك اتامباەۆتىڭ كوي-تاش اۋىلىنداعى ۇيىنەن كۇش قۇرىلىمدارىنىڭ ەكى اۆتوكولىگى شىقتى، جۋرناليستەر سونىڭ بىرىندە اتامباەۆ وتىرعانىن كوردى. "كوي-تاش اۋىلىنداعى جول جابىق بولعاندىقتان، اۆتوكولىكتەر اينالما جولمەن - ىسىككاتين تاس جولى ارقىلى كەتتى" دەپ حابارلادى ازاتتىقتىڭ قىرعىز قىزمەتى.
بۇرىنعى پرەزيدەنت ۇيىنەن ءوزى شىعىپ، كۇش قۇرىلىمدارىنا بەرىلگەن. بۇنىڭ الدىندا ول ءىىم باسشىسىنىڭ ورىنباسارى كۋمار اسانوۆتان ارنايى جاساق ءوزىنىڭ جاقتاستارىنا تيىسپەۋىن تالاپ ەتكەن. اتامباەۆ جاقتاستارى ساياساتكەردى قورعاۋعا تالپىنعان.

"ماعان ءبارىبىر: مەنى اتىپ تاستاڭدار، بىراق جىگىتتەرگە تيىسپەڭدەر!" - دەگەن اتامباەۆ كۇش قۇرىلىمدارىنا بەرىلەر الدىن. اسانوۆتىڭ "ەشكىم وق اتپايدى" جانە "ەشكىم ۇرمايدى" دەگەن ۋادەسىنەن سوڭ عانا اتامباەۆ ەسىكتى اشقان.
بۇرىنعى پرەزيدەنتتىڭ ۇيىنەن ەكى تاپانشا، ون ءۇش اۆتومات جانە ونىڭ 35 وقساۋىتى تاركىلەنگەن. بۇنىڭ الدىندا ساياساتكەر "ۇيدە وزىندە عانا قارۋ بولعانىن" مالىمدەگەن ەدى.
ىشكى ىستەر مينيسترلىگىنىڭ حابارلاۋىنشا، ارنايى وپەراتسيانى ءىىم باسشىسى كاشكار جۋنۋشاليەۆتىڭ ءوزى باسقارعان. مينيسترلىك مالىمەتى بويىنشا، المازبەك اتامباەۆ "تەرگەۋ امالدارىن جالعاستىرۋ ءۇشىن ءتيىستى ورگاندارعا جەتكىزىلەدى".

8 تامىزدا المازبەك اتامباەۆتى ۇستاۋ جونىندەگى ارنايى وپەراتسيانىڭ ەكىنشى كەزەڭى ءوتتى. 7 تامىزداعى ارنايى وپەراتسيا ساتسىزدىككە ۇشىراعان ەدى. دەنساۋلىق ساقتاۋ مينيسرلىگىنىڭ مالىمەتىنە قاراعاندا، 8 تامىزدا كوي-تاشتا بەس ادام جارالاندى. ءبىر كۇن بۇرىنعى جانجال كەزىندە ونداعان ادام جارالانىپ، ارنايى جاساقتىڭ ءبىر ساربازى وقتان مەرت بولدى. مەديتسينالىق كومەككە ءجۇز شاقتى ادام جۇگىنگەن.
قۇقىق قورعاۋ ورگاندارى ارنايى وپەراتسيا كەزىندە شۋلى دىبىس شىعاراتىن گراناتالار مەن باسقا دا ارنايى قۇرالدار پايدالانعان.
پارلامەنت 8 تامىزدا كوي-تاشتاعى جاعدايدا قاتىستى قاۋلى قابىلدادى. دەپۋتاتتار بۇل قاۋلىدا ۇكىمەتتىڭ كۇش قۇرىلىمدارى ارەكەتتەرىن جەتكىلىكسىز ۇيلەستىرگەنىن جانە اتامباەۆتى ۇستاۋ جونىندەگى اقپاراتتى حالىققا ماردىمزىز تاراتقانىن اتاپ كورسەتكەن. بۇعان قوسا دەپۋتاتتار مينيسترلەر كەڭسەسى مەن باس پروكۋراتۋراعا بىرقاتار تاپسىرما بەرگەن.
قۇزىرلى ورگانعا دەپۋتاتتار كوي-تاشتاعى وقيعا بارىسىندا زاڭ بۇزۋشىلىقتاردى ءادىل تەرگەۋىن، اتامباەۆ پەن ونىڭ جاقتاستارىنىڭ ارەكەتىنە قۇقىقتىق باعا بەرۋىن، ارنايى جاساق قىزمەتكەرىنىڭ ءولىمى مەن تاعى بىرنەشە ساربازدىڭ كەپىلگە الىنۋىن، بيلىك وكىلدەرىنە قارسى قارۋ قولدانىلۋىن تەرگەۋدى تاپسىردى.

سوڭعى جاڭالىقتار