8 تامىز, 16:24 489 0 كولىك اسەل انۋاربەك

قوناەۆتىڭ كولىگى قويىلعان كورمە

قاپشاعايدا اشىلعان رەترو اۆتوكولىكتەر كورمەسىنە قازاق حالقىنىڭ ءبىرتۋار پەرزەنتى دىنمۇحامەد قوناەۆتىڭ تەمىر تۇلپارى قويىلدى. رەتروكولىكتەردى جيناۋمەن اينالىساتىن كاسىپكەر اشقان كورمەنى تاماشالاۋشىلاردىڭ سانى دا كۇن ساناپ ارتىپ كەلەدى.

«الماتى – وسكەمەن» تاس جولىنىڭ بويىندا ورنالاسقان كورمەگە وتكەن عاسىردىڭ 50-جىلدارىندا شىققان جەڭىل اۆتوكولىكتەر قويىلعان. سولاردىڭ ءبىرى – دىنمۇحامەد قوناەۆتىڭ «چايكاسى». بۇل كولىكتى ديماش احمەتۇلى 1985 جىلعا دەيىن مىنگەن كورىنەدى. بۇل كولىككە قازىر «دودج» اۆتوكولىگىنىڭ قوزعالتقىشى ورناتىلعان. وسى تارىزدەس تاريحقا تولى تەمىر تۇلپارلار كەلۋشىلەردىڭ نازارىنا ۇسىنىلۋدا. كورمەگە قويىلعان رەترو كولىكتەردىڭ ءبارىن كاسىپكەر مۇرات سەرگەباەۆ ءوزى جيناقتاعان. كولىكتەر قاتارىندا «موسكۆيچ»، «ۆولگا»، «زاپوروجەتس»، موتوتسيكلدەردىڭ سان ءتۇرى بار. ونىڭ ۇستىنە، رەتروكولىكتەر سالونىنان تەمىر تۇلپارلاردان بولەك وتكەن عاسىردا شىققان ماگنيتوفون، فوتواپپارات، مۋزىكالىق اسپاپتاردى دا تاماشالاۋعا مۇمكىندىك بار. 15 جىل ىشىندە تالاي ءاۆتوموبيلدى قالپىنا كەل­تى­رىپ، سوڭىندا جيناعان كولىكتەرىن حا­لىققا كورسەتۋگە بەل بايلاعان كاسىپ­كەر كورمەگە كەلۋشىلەر قاتارىنىڭ ارتقانىنا ءدان ريزا.

ايتا كەتەيىك، بۇعان دەيىن تاراز قالاسىندا دا تۇڭعىش رەت ءدال وسىنداي رەترو كولىكتەر كورمەسى ۇيىمداستىرىلعان بولاتىن. تانىمدىق شاراعا قاتىسۋشىلار حح عاسىردا زاۋىتتان شىققان 50 ماشينانى تاماشالادى. بۇل شارادا كوپتىڭ كوزايىمىنا اينالعان كولىكتەر كوشىن 1947 جىلعى «فيات» جەڭىل كولىگى  باستادى. «گاز-67» ماشيناسىنان باستاپ، سوڭعى ۇلگىدەگى تەمىر تۇلپارلارعا دەيىن قويىلعان كور­مەدەن كەلۋشىلەر كونە ۇلگىدەگى «ۆولگا» مەن «موسكۆيچ»، سونداي-اق جول تالعامايتىن جۇردەك دجيپتەردى دە تاماشالاۋعا مۇمكىندىك الدى. ءتىپتى، اتىشۋلى «بريگادا» سەريالىنداعى كولىكتەر دە ايتۋلى كورمەدەن تابىلدى. قالىڭ جۇرتشىلىق نازارىنا ەكىنشى دۇنيەجۇزىلىك سوعىستىڭ كوزىن كورگەن كولىكتەر دە تانىستىرىلدى. سونىڭ ءبىرى «Ford GPW» اۆتوكولىگىن يەسى كورمەگە ەۆاكۋاتورمەن اكەلگەن.

اسەل ماقساتقىزى

سوڭعى جاڭالىقتار