8 تامىز, 16:06 503 0 قاۋىپسىزدىك دينارا مىڭجاسارقىزى

اتامباەۆ مەرزىمسىز ميتينگ جاريالادى

قىرعىزستاننىڭ بۇرىنعى پرەزيدەنتى المازبەك اتامباەۆ بىشكەكتەگى "مەديا فورۋم" عيماراتىنىڭ الدىندا مەرزىمسىز ميتينگ جاريالادى. ەكس-پرەزيدەنتكە تيەسىلى عيماراتتا "اپرەل" تەلەارناسىنىڭ رەداكتسياسى ورنالاسقان.

ء"بىزدى مالعا تەڭەمەس ءۇشىن، ميتينگكە شىعامىز. كەشە ۇستاۋعا ارەكەتتەندى، بيلىك باعىتىن وزگەرتتى. بۇل كەشەندە اتامباەۆتىڭ عانا قارۋى بولدى. باس پروكۋراتۋرا بىلمەگەنسيدى نەمەسە زاڭدى جەتىك بىلمەيدى - مەنىڭ ءۇيىم سوت شەشىمى شىققانشا مەملەكەت كۇزەتىندە، مۇندا ەشقانداي كۇشتىڭ باسىپ كىرۋىنە قۇقىعى جوق", - دەپ مالىمدەدى اتامباەۆ.

قىرعىزستان پرەزيدەنتى سوورونباي جەەنبەكوۆ 8 تامىزدا قاۋىپسىزدىك كەڭەسىندە اتامباەۆ "زاڭدى تەرگەۋ ءىس-شارالارىنا قارسى قارۋلى قارسىلىق كورسەتىپ، كونستيتۋتسيانى جانە ەلدىڭ زاڭدارىن ورەسكەل بۇزدى" دەپ مالىمدەدى.

اتامباەۆ رەزيدەنتسياسى ورنالاسقان كوي-تاش اۋىلىندا قازىر شامامەن 300 ادام تۇر. ولار اق ءۇي مەن ۇكىمەت عيماراتىنا "جەەنبەكوۆ، كەت" دەگەن ۇرانمەن بارماقشى. بۇل تۋرالى جەرگىلىكتى اقپارات قۇرالدارى حابارلادى.

8 تامىزعا قاراعان ءتۇنى قىرعىزستان ۇلتتىق قاۋىپسىزدىك مەملەكەتتىك كوميتەتى ەلدىڭ بۇرىنعى پرەزيدەنتى الماسبەك اتامباەۆتىڭ بىشكەككە جاقىن كوي-تاش اۋىلىنداعى رەزيدەنتسياسىنا شابۋىلدادى. وپەراتسيا ءساتسىز اياقتالدى.

مالىمەتتەرگە قاراعاندا، ارنايى قىزمەت جابىق بولمەلەردىڭ بىرىندە تىعىلعان بۇرىنعى پرەزيدەنتتى ۇستاي المادى. بۇل ۋاقىتتا اتامباەۆتىڭ جاقتاستارى رەزيدەنتسيا قورشاۋىنىڭ ءبىر تۇسىن قۇلاتىپ، ىشكە ەنگەن. ولار ارنايى جاساقتىڭ بىرنەشە مۇشەسىن ۇستاپ، ولاردىڭ قارۋلارىن تارتىپ الىپ، سوققىعا جىققان.

المازبەك اتامباەۆ مالىمدەمە جاسادى. ونى "اپرەل" تەلەارناسىنىڭ ەفيرى ارقىلى كورسەتتى. ول ۇستاۋ ارەكەتى زاڭسىز ەكەنىن مالىمدەگەن. اتامباەۆ بيلىكتى مۇنداي ارەكەتىن دوعارۋعا شاقىرىپ، بۇنىڭ ارتى جاقسىلىققا اپارمايتىنىن ەسكەرتكەن.

جانجالدان، سوڭعى مالىمەت بويىنشا، 52 ادام زارداپ شەكتى، ارنايى جاساقتىڭ ءبىر مۇشەسى وقتان قازا تاپتى. اۋرۋحانالاردا 31 ادام جاتىر. شۋ وبلىستىق ىشكى ىستەر باسقارماسىنىڭ باسشىسى سامات كۋرمانكۋلوۆ كوماعا تۇسكەن، وعان ەكى مارتە وتا جاسالدى. تاعى ءبىر ادام جانساقتاۋ بولىمىندە جاتىر.

بۇرىنعى پرەزيدەنت المازبەك اتامباەۆ ارنايى جاساق ساربازىنىڭ ولىمىنە قازىرگى مەملەكەت باسشىسى سوورونباي جەەنبەكوۆ كىنالى دەپ ەسەپتەيدى. بۇل پىكىرىن ول جاقتاستارىمەن كەزدەسۋدە ايتتى.

اتامباەۆتىڭ ۇيىندە ارنايى جاساقتىڭ التى ساربازى كەپىلدە وتىر. اتامباەۆ جاقتاستارى اۋىلدا ەلەكتر قۋاتى مەن بايلانىستى قالپىنا كەلتىرۋدى تالاپ ەتىپ، سوندا عانا كەپىلدەگىلەردى بوساتاتىنىن ايتقان. كۇش قۇرىلىمدارى بۇرىنعى پرەزيدەنتتىڭ جاقتاستارىمەن كەلىسسوزدەن سوڭ اۋىلدان شىعىپ كەتكەن.

سوڭعى جاڭالىقتار