8 تامىز, 16:01 386 0 ونەر دينارا مىڭجاسارقىزى

«بيزنەس پو-كازاحسكي» ءفيلمىنىڭ ءتورتىنشى ءبولىمى تۇسىرىلەدى

نۇرلان قويانباەۆ «بيزنەس پو-كازاحسكي» ءفيلمىنىڭ ءتورتىنشى ءبولىمىن تۇسىرۋگە كىرىستى. 2016 جىلى باستالىپ، كورەرمەننىڭ ىستىق ىقىلاسىنا بولەنگەن ءفيلمدى بۇعان دەيىن الماتى، لوس-اندجەلەس، دۋباي قالاسى مەن افريكا قۇرلىعىندا تۇسىرگەن بولاتىن. ءفيلمنىڭ ءتورتىنشى ءبولىمىن ءتۇسىرۋ جۇمىستارى وڭتۇستىك كورەيانىڭ استاناسى سەۋل قالاسىندا وتەدى دەپ جوسپارلانۋدا.

وسىعان وراي فيلم اۆتورى نۇرلان قويانباەۆ ءوزىنىڭ Instagram پاراقشاسىندا «كەيىپكەرلەرگە ارناپ ەڭ قىزىقتى ەپيزود ويلاپ تاپقان 4 ادام ءتۇسىرىلىم توبىمەن بىرگە سەۋلگە اتتانادى» دەگەن بايقاۋ جاريالادى. بۇگىنگى كۇنى وقىرمانداردان 4 مىڭنان اسا ءازىل ءتۇسىپ ۇلگەردى.

ءفيلمنىڭ ءتۇسىرىلىمى الماتى قالاسىندا باستالادى. شىعارماشىلىق توپ  10 كۇندى وسى جەردە وتكىزىپ، ودان سوڭ جالعاسىن ءتۇسىرۋ ماقساتىندا وڭتۇستىك كورەياعا اتتانادى. كارتينا ۇلكەن ەكرانعا جەلتوقسان ايىندا جول تارتادى.

 «ءداستۇردى بۇزباي، ءفيلمدى ادەتتەگىدەي جاڭا جىل قارساڭىندا ەكرانعا شىعارامىز. ءبىر اي بويى الماتى مەن سەۋلدە تىنباي جۇمىس ىستەپ، قالعان ۋاقىتتى پوستپروداكشنعا ارنايمىز. جاڭا بولىمدە ستسەناريستەر ءفيلمنىڭ العاشقى بولىكتەرىندەگى ەڭ ۇتىمدى ساتتەردى ساقتاپ قالۋعا تىرىستى. كورەرمەنگە بۇرىنعىداي ىزگىلىككە، ادامگەرشىلىككە، جىلى ازىلگە تولى تۋىندى ۇسىنامىز دەپ ۋادە بەرەمىز»، - دەيدى نۇرلان قويانباەۆ.

«بيزنەس پو-كازاحسكي ۆ كورەە» ءفيلمىنىڭ سيۋجەتى ارقىلى فيلم اۆتورلارى وڭتۇستىك كورەيانىڭ بۇگىنگى كەلبەتىن، كارىس جاستارىنىڭ ءومىرىن، «ك-pop» ءستيلىن كەڭىنەن اشىپ كورسەتكىسى كەلەدى. فيلمدە باستى رولدەردىڭ ءبىرىن ادەتتەگىدەي گۇلناز جولانوۆا سومدايدى. گۇلناز بۇعان دەيىنگى ءۇش بولىمدە باس كەيىپكەردىڭ جۇبايىنىڭ ءرولى ارقىلى كورەرمەنگە جاقسى تانىس.

ءفيلمنىڭ جەلىسى بويىنشا وتباسىلىق قوناق ۇيدە حالىقارالىق كونفەرەنتسيا وتۋگە ءتيىس. باس كەيىپكەر جومارت كەلگەن قوناقتارعا جاڭا تەحنيكانى تانىستىرماقشى. وسى ماقساتپەن ول قوناق ءۇيدى جوعارى تەحنولوگيالى تۇرمىستىق تەحنيكامەن جابدىقتاۋعا كوشەدى. الايدا شۆەيتسار باقداۋلەت اڭداۋسىزدا كليەنتتىڭ باعالى قۇرىلعىسىن سىندىرىپ الادى. ال ول تەك قانا سەۋل قالاسىندا جوندەلەتىن بولعاندىقتان،  كەيىپكەرلەرگە وڭتۇستىك كورەياعا اتتانۋعا تۋرا كەلەدى. بۇعان دەيىنگى 3 بولىمدە دە جومارتتىڭ بيزنەسمەن رەتىندە قالىپتاسۋ جولى سۋرەتتەلسە، ءتورتىنشى بولىمدە ول اياعىن نىق باسقان كاسىپكەر، تۇلعا رەتىندە سومدالادى.

 "جاڭا ەل جايىندا ۇزاق ويلاندىق. العاشىندا ەۋروپانى، اۆستراليانى بولماسا رەسەيدى كوزدەدىك. بىراق الەۋمەتتىك جەلىدە جۇرگىزگەن ساۋالناما ناتيجەسىندە سەۋلدە تۇسىرەتىن بولىپ شەشتىك. وڭتۇستىك كورەيامەن كەلىسسوز ۇزاق ءجۇردى. سەۋل قالاسىنىڭ تىنىس-تىرشىلىگىن سەزىنۋ ءۇشىن بىلتىر دا، بيىل دا ول جاققا ۇشىپ باردىق. مادەنيەتىمەن، حالقىنىڭ ومىرىمەن تانىسىپ، لوكاتسيا تاڭدادىق»، - دەيدى باس پروديۋسەر.

2018 جىلى كوپشىلىككە ۇسىنىلعان «بيزنەس پو-كازاحسكي ۆ افريكە» ءفيلمىن كينوتەاترلاردان 800 مىڭنان استام كورەرمەن تاماشالاعان بولاتىن. جاڭا 4-ءشى ءبولىمنىڭ بيۋدجەتى شامامەن جارتى ميلليون دوللاردى قۇرايدى دەپ جوسپارلانۋدا.

فيلمدە رولدەردى جان بايجانباەۆ، داريعا بادىقوۆا، گۇلناز جولانوۆا، نۇرلان قويانباەۆ، رامازان امانتاي، قاجەت سماعۇل، ديلناز احماديەۆا، قايرات قۇدايبەرگەن   جانە تاعى باسقا اكتەرلار سومدايدى.

سوڭعى جاڭالىقتار